Mark Mandžarda. Fota: ABC7 New York

Mark Mandžarda. Fota: ABC7 New York

Telekanał ABC7 New York 17 sakavika pakazaŭ siužet pra amierykanca Marka Mandžarda, arhanizm jakoha zdolny piermanientna vypracoŭvać śpirt. Mužčyna padzialiŭsia, jak jon z hetym žyvie i jak heta adbivajecca na jaho žyćci.

Mandžarda raspavioŭ, što pieršyja simptomy źjavilisia jašče ŭ 2006 hodzie. Tady mužčyna pracavaŭ nastaŭnikam u škole, ale supracoŭniki pačali skardzicca, što ad jaho pachnie ałkaholem. Mark śćviardžaŭ, što nikoli nie piŭ na pracoŭnym miescy, ale nichto jamu nie pavieryŭ. U vyniku mužčyna razam ź siamjoj byŭ vymušany pierajechać u inšy horad i ŭładkavacca na novuju pracu.

«Ja nikoli hetaha nie zrabiŭ by, bo ja nastaŭnik. Mianie heta vielmi niepakoiła. Ja sapraŭdy paniaćcia nie mieŭ, što adbyvajecca, ale inšyja nie pavieryli mnie, kali ja skazaŭ, što nie pju», — raskazaŭ Mark Mandžarda.

Zatym mužčynu adnojčy spyniła palicyja za toje, što jon nibyta kidaŭ śmieccie na darohu. Jaho pravieryli ałkatestaram, jaki pakazaŭ 0,18 — 0,19 mh/ł (zvyš 0,3 pramile, što raŭnaznačna ŭžyvańniu adnoj butelki piva abjomam 0,33 mł za 15 chvilin da pravierki ałkatestaram). Mark Madžarda byŭ šakavany, bo jon nie piŭ i navat nie adčuvaŭ siabie pjanym. Paźniej jaho abvinavacili ŭ kiravańni mašynaj u pjanym stanie.

Mužčynu znoŭ zvolnili z pracy, na jaho zaviali kryminalnuju spravu za kiravańnie mašynaj u niećviarozym stanie. Jon byŭ u tatalnym adčai.

«Tady ja straciŭ usio. Ja straciŭ usio, što tolki možna stracić. Ja pavinien byŭ pradać svoj dom, ja pavinien byŭ pradać svaju mašynu. Ja nie moh uładkavacca na pracu ŭ adukacyjnaj śfiery, ja nie moh uładkavacca na pracu ŭ praduktovaj kramie. Mianie abvinavačvali ŭ ciažkim złačynstvie. Vy viedajecie, mnie pahražała turma z-za dźviuch kryminalnych spraŭ pa kiravańni ŭ niećviarozym stanie», — padzialiŭsia Mandžarda.

Adnak jahonaja maci vyrašyła pašukać infarmacyju ŭ internecie i znajści choć niešta, źviazanaje ź simptomami syna. U vyniku jana daviedałasia pra sindrom aŭtabrovara, pry jakim arhanizm čałavieka moža rehularna vypracoŭvać śpirt.

Tady Mark adrazu źviarnuŭsia da doktara Prasana Vikremiesinhche, adnaho ź niešmatlikich prafiesijanałaŭ, jaki śpiecyjalizavaŭsia na lačeńni takoj chvaroby. Chutka analizy paćvierdzili zdahadki ab najaŭnaści vyšejzhadanaha sindromu.

Doktar Vikremiesinhche ličyć, što sindrom aŭtabrovara vyklikajuć antybijotyki, jakija parušajuć mikrafłoru ŭ kišečniku čałavieka, što dazvalaje hrybku i draždžam raści ŭ arhaniźmie. Kali čałaviek ź sindromam aŭtabrovara ŭžyvaje cukar ci vuhlavody, kišečnik pierapracoŭvaje ich i «vyrablaje» śpirt, jaki raspaŭsiudžvajecca ŭ kryvi.

Vikremiesinhche taksama śćviardžaje, što zamoŭčvańnie takoj chvaroby i niaviedańnie ludziej ab tym, što takoje ŭvohule isnuje, vyklikaje šmat prablem u chvorych na jaje ludziej. Viadomy vypadki, kali kiroŭcu, jaki pakutavaŭ ad sindromu aŭtabrovara i pry hetym byŭ ćviarozy, źmiaščali ŭ turmu i pazbaŭlali prava kiravać mašynaj. Takoje zachvorvańnie moža sapraŭdy zrujnavać čałaviečaje žyćcio.

«Prapanavany mnoju sposab lačeńnia praduhledžvaje pryniaccie supraćhrybkovych preparataŭ pieraralna albo, pry nieabchodnaści, unutryvienna. Ja prapanuju pacyjentam prytrymlivacca strohaj dyjety biez vuhlavodaŭ na praciahu pieršych šaści tydniaŭ lačeńnia, a paśla hetaha ŭžo pieravodžu ich na dyjetu ź nizkim utrymańniem vuhlavodaŭ na praciahu nastupnych niekalkich miesiacaŭ, źnižajučy pryjom supraćhrybkovych preparataŭ», — tłumačyć doktar Vikremiesinhche.

Jon adznačaje, što takim sposabam užo vylečyŭ 30 svaich pacyjentaŭ, a taksama maje namier dabicca pryznańnia i pryniaćcia svajoj mietodyki lačeńnia miedycynskaj supolnaściu. 

Nahadajem, što raniej my pisali ab tym, što, niahledziačy na ​​ŭsiu škodu ałkaholu, jaho maleńkaja doza zdolnaja pryvieści da stanoŭčych źmien u arhaniźmie čałavieka.

Čytajcie taksama:

Doktarka raskazała, ci sapraŭdy žavalnaja humka abaraniaje ad karyjesu

U chvoraha na rak prastaty raźviŭsia niekantralavany zamiežny akcent

Filip Kirkoraŭ zrabiŭ płastyčnuju apieracyju na torsie. Dziela čaho?

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?