Darja Łosik i Jahor Lebiadok. Kałaž: BAŽ
Advakaty Jahora Lebiadka asprečvali rašeńnie Minskaha abłasnoha suda, jaki letaś pakaraŭ niezaležnaha analityka 5 hadami źniavoleńnia pavodle dvuch kryminalnych artykułaŭ za «sadziejničańnie ekstremisckaj dziejnaści» (art. 361, prym. 4, č. 1 i art. 361, prym. 4, č. 2).
Na praces byŭ pryznačany sudździa Uładzimir Čaravač, jaki na padstavie «supastaŭleńnia faktaŭ» pryjšoŭ da vysnovy, što sud pieršaj instancyi mieŭ «absalutnuju racyju» ŭ vyznačeńni stupieni vinavataści fihuranta i pastanaviŭ admović u zadavalnieńni apielacyi.
Na pačatku hoda Jahora Lebiadka pieraviali ź SIZA №1 Minska, dzie jon utrymlivaŭsia ad pradjaŭleńnia abvinavačańnia, u SIZA №6 Baranavič. Ciapier jaho čakaje etapavańnie ŭ adnu z kałonij dla adbyćcia pakarańnia.
Ahladalnika ŭ vajskovych pytańniach zatrymali 12 lipienia 2022 hoda pa miescy žycharstva ŭ Smalavičach. Spačatku aryštavali na 15 sutak za «niepadparadkavańnie supracoŭnikam» (pavodle art. 24.3 KaAP), a zatym raspačali kryminalnuju spravu na padstavie artykuła 361-4.
Farmalnaj pryčynaj dla pieraśledu staŭ udzieł ekśpierta ŭ prahramach «Jeŭraradyjo» — pry tym, što zatrymańnie ahladalnika zdaryłasia na tydzień raniej, čym miedyja atrymała status «ekstremisckaha farmavańnia».
Śledam ułady pazbavili Jahora Lebiadka vajskovaha zvańnia «staršy lejtenant» (razam ź dziasiatkami inšych «zdradnikaŭ») za «pravaparušeńni i dyskredytujučyja praviny, niesumiaščalnyja sa statusam vajennasłužačaha». Havorka pra publičnaje asudžeńnie hvałtu siłavikoŭ u 2020 hodzie. Tady jon padpisaŭ zvarot navukovaj supolnaści ŭ suviazi z falsifikacyjaj prezidenckich vybaraŭ i nastupnymi mirnymi pratestami.
Letaś 14 śniežnia ŭ Minskim abłasnym sudzie raspačaŭsia razhlad spravy, a praz 10 dzion sudździa Alena Miśnik pryznačyła abvinavačanamu 5 hadoŭ pazbaŭleńnia voli ŭ kałonii ŭzmocnienaha režymu.
Jahor Lebiadok — kolišni łaŭreat prezidenckaj stypiendyi talenavitym navukoŭcam — kandydatam navuk. Małodšy navukovy supracoŭnik Instytuta fiziki NAN Biełarusi, namieśnik zahadčyka łabaratoryi optaelektroniki i hałahrafii. Abaraniŭ dysiertacyju «Aptymizacyja paramietraŭ łaziernych dyjodnych liniejek» na stupień kandydata fizika-matematyčnych navuk.
U 2019 hodzie stvaryŭ Telehram-kanał @Lebiadok — niezaležnuju placoŭku pra vajskovuju biaśpieku krainy. Vystupaŭ u biełaruskich i zamiežnych vydańniach.
Jak i ŭ vypadku ź Jahoram Lebiadkom, abarona Darji Łosik u apielacyjnaj skarzie namahałasia dakazać, što status chatniaj haspadyni nie maje ničoha ahulnaha z kanstatavanym Bresckim abłasnym sudom «sadziejničańniem ekstremisckaj dziejnaści».
Adnak sudździa Viarchoŭnaha suda Juryj Rutkoŭski nie znajšoŭ padstaŭ, kab pierahledzieć ci prynamsi źmiakčyć prysud žančynie, u jakoj hetaksama asudžany muž, a maleńkaja dačka zastałasia biez baćkoŭ.
Napiaredadni apielacyjnaha pasiadžeńnia pravaabaroncam stała viadoma, što ŭ znak pratestu suprać metanakiravanaha pieraśledu siamji Ihar Łosik sprabavaŭ učynić suicyd u navapołackaj kałonii.
Darju Łosik zatrymali 18 kastryčnika 2022 hoda paśla pieratrusu ŭ jaje kvatery ŭ Baranavičach. Žančynu advieźli ŭ Brest i źmiaścili ŭ SIZA-7, a paźniej vystavili abvinavačańnie pavodle č. 1 art. 361-4 Kryminalnaha kodeksa (sadziejničańnie ekstremisckaj dziejnaści).
Padstavaj stała jaje intervju telekanału «Biełsat» pra akaličnaści spravy suprać muža, pakaranaha pa tak zvanaj «spravie Cichanoŭskaha» 15 hadami źniavoleńnia va ŭmovach uzmocnienaha režymu.
Spravu Darji Łosik pačali razhladać 18 studzienia ŭ Bresckim abłasnym sudzie. Na pieršym ža pasiadžeńni prakurorka Kaciaryna Pakała zaprasiła dla fihurantki 2 hady źniavoleńnia ŭ kałonii ahulnaha režymu — mienavita stolki i pryznačyŭ na nastupny dzień sudździa Mikałaj Hryharovič.
Čatyrochhadovuju dačku Ihara i Darji ciapier vychoŭvajuć baćki asudžanych.
