Ad čaho ŭźnikaje mazol na nazie

Naša skura składajecca z troch słajoŭ: epidermisu (vierchni), dermy i tłušču.

Kali my chodzim biez škarpetak u skuranym abutku, to epidermis z kožnym krokam prylipaje da skury našaha abutku. Pry hetym derma zastajecca na miescy.

Takim čynam, naša ŭjaŭleńnie pra toje, što abutak nam naciraje mazol, niapravilnaje. Na samaj spravie, abutak chapajecca za epidermis i z kožnym krokam ruchaje jaho to ŭvierch, to ŭniz. Takim čynam epidermis patrochi adździrajecca ad dermy. Drobnyja złučeńni tkanak razburajucca.

Pieršaj prykmietaj zaradžeńnia mazala źjaŭlajecca lohkaje adčuvańnie piakučaści padčas chadźby. Kali na hetym etapie nie zrabić nijakich dziejańniaŭ, to dalej u miescy razbureńnia tkanak patraplaje płazma ź mižkletkavaj prastory. Praces z kožnym krokam paskarajecca. Źjaŭlajecca puchir, jaki praź niekatory čas łopajecca. Kali praciahvać chadźbu, to pačynaje razburacca derma.

Padobnym čynam adbyvajecca, kali my abuvajem niajakasnyja škarpetki. Unutry škarpetki (pamiž joju i epidermisam) pavinna być dobraje ślizhańnie. Pry hetym škarpetka nijakim čynam nie pavinna čaplacca za epidermis.

Ni ŭ jakim razie nielha prakołvać mazol. Epidermis — idealny płastyr. Jon abaraniaje dermu. Pakul ceły epidermis, nijaki mikrob nie patrapić unutr.

Jak vydalić z-pad epidermisu vadkaść

U hetym dapamoža śpirtavy kampres. Źviartajem uvahu na toje, što śpirt pavinien być vysokaj kancentracyi (ad 85%).

Čamu vykarystoŭvajecca śpirt? Śpiecyjalisty viedajuć: kali prykłaści da miesca nazapašvańnia vadkaści pad epidermisam, jaki adpłastavaŭsia, niejki kancentravany srodak, to vadkaść vyjdzie na pavierchniu. Akramia hetaha, śpirt zabje mikroby, praduchilić nahnajeńnie, abiazbolić (prykładna na 10 chvilin) i abiastłuścić skuru. Kali puchir apuścieje (na heta spatrebicca ad dźviuch hadzin), to źvierchu nakładvajecca płastyr. Kali ž pad płastyram puzyr znoŭ utvorycca, to śpirtavy kampres nakładvajecca pavierch płastyru. Kali jon adkleicca z-za śpirtu, to nieabchodna nakleić novy.

Śpirtavy kampres dapamoža i ŭ vypadku, kali mazol parvaŭsia. Jon zabiaśpiečyć vychad toj vadkaści, što zastałasia, i razryvy epidermisu prylipnuć da dermy. Mazol pierastanie pavialičvacca. Kali niejkija abryvy epidermisu pieraškadžajuć nakłaści płastyr, to ich možna zrezać.

Zusim inšaja sprava, kali puzyr parvaŭsia i rana pačała krovatačyć. U takim vypadku treba abiastłuścić i vyvieści lišniuju vadkaść sa skury vakoł. Nieabchodna zrabić tak, kab z rany nie vyciakała płazma, limfa, syvaratka kryvi. Jany pieraškadžajuć prykleicca płastyru.

Jaki płastyr vykarystoŭvać

Płastyr nieabchodna vykarystoŭvać doŭhi i šyroki. Pry hetym jon pavinien być dastatkova tonkim, kab lepš pieradavaŭ formu nahi, i z materyjału, jaki prapuskaje vadu, kab vychodziła płazma. Akramia hetaha, tonki płastyr nie pieraškodzić ślizhańniu nahi ŭ škarpetcy. Dla taho, kab škarpetka lepš zabiaśpiečvała ślizhańnie, jaje treba myć z kandycyjanieram, bo jon utrymlivaje silikon. Možna škarpetki namačyć kandycyjanieram i vysušyć. Varta ŭziać trochi kandycyjanieru z saboju ŭ pachod.

Važna źviartać uvahu na lipkaść płastyru, jon u pachodzie pavinien doŭha trymacca. Pa hetych pryčynach lepš za ŭsio padychodzić płastyr u rułonie na tkanaj asnovie.

Jak pravilna nakłaści płastyr

Spačatku abiastłuščvajem skuru śpirtam i dajom joj vysachnuć. Dla taho, kab vyjšła ŭsia vilhać, lepš za ŭsio padychodzić bienzin (naprykład, dla zapalničak ci harełak). Zatym z dapamohaj asistenta ad rułona papiarednie nahretaha płastyru adrazajem kavałak z zapasam. Dla piatki zapas pavinien zachodzić za kostki ščykałatak z abodvuch bakoŭ.

U čatyry ruki raspraŭlajem i nakładvajem płastyr ad centra mazala na piatku, jakuju pa mahčymaści treba zakleić poŭnaściu. Dla hetaha paśla pryklejki pieršaha kuska, adrazajecca i naklejvajecca pa viersie na 2/3 druhi. Na mužčynskuju piatku sychodzić čatyry kavałki šyrynioj 5 sm. Vierchni słoj pavinien być na adnym uzroŭni z kostkami ščykałatki.

Naklejvać płastyr treba vielmi akuratna, pastajanna jaho razhładžvać, dabivacca ščylnaha pryklejvańnia. Pry nasoŭvańni na nahu škarpetki treba imknucca nie začapić i nie adadrać krai płastyru.

U dalejšym nieabchodna prytrymlivacca nastupnych pravił:

nie myć nohi da kanca pachodu i imknucca nie mačyć płastyr;

abrazać krai płastyru, jak tolki jany zadralisia;

svoječasova sušyć nohi ad potu i mianiać škarpetki chacia b raz na dzień;

kali nieabchodna, zamacoŭvać płastyr novymi słajami z zachopam novych častak skury, jakija papiarednie abiastłuścić;

škarpetki nieabchodna zdymać aściarožna, kab nie zadralisia krai płastyru;

kali daviałosia źniać płastyr całkam, to novy nakładvajecca pa toj ža prahramie.

Asnoŭnaja zadača — dazvolić mazalu zažyć pad płastyram ci danieści jaho takim čynam da doktara.

Kali bačna, što mazol staŭ nahnojvacca, to źvierchu na jaho nakładvajecca na karotki čas śpirtavy kampres, kab zabrać vadkaść praz płastyr. Ci možna vykarystać hipiertaničny rastvor kuchonnaj soli (ad 10%).

Zažyŭleńnie mazala (a na heta zvyčajna patrebny tydzień) pavinna adbyvacca pad płastyram. I hety płastyr lepš nie čapać.

Z pravilna nakładzienym płastyram možna praciahnuć pachod u tym ža abutku.

Što rabić, kali niama płastyru

Samy prosty sposab — na nahu nadzieć pakiet, na pakiet u rajonie piatki nakapać rycynavaha aleju, źvierchu nadzieć druhi pakiet ci niekalki. Zatym naciahvajecca škarpetka.

Pierad nadziavańniem pakieta taksama nakładvajecca kampres. Adnak jon budzie mienš efiektyŭnym. Kali niama z saboj śpirtu, to vykarystoŭvajecca hipiertaničny rastvor kuchonnaj soli.

Kali niama pakieta, to naha zmazvajecca rycynaj (jana maje vydatny vodaadbiŭčy efiekt. Joju mažuć nohi i ruki padčas vodnych pachodaŭ). I vykarystoŭvajecca kapronavaja škarpetka. Jaje naciahvajuć pavierch škarpetki.

Kali niama ni pakietaŭ, ni kapronavaj škarpetki, to naha zmazvajecca rycynaj kožnyja paŭhadziny-hadzinu.

I samy krajni varyjant: da nahi prymacoŭvajucca vuściłki, pavierch jakich naciahvajucca škarpetki. Źvierchu možna ŭsio zamacavać skotčam. Naha zastajecca biez abutku.

Što rabić z mazalom paśla pachodu

Pajści da doktara ŭ dvuch vypadkach:

kali mazol nahnaiŭsia i vyklikaje bol u spakoi;

kali mazol vysach i stvaryłasia treščyna, jakaja kravatočyć.

Kali niama takoj mahčymaści — 2 razy na dzień rabić vannački z hipiertaničnym rastvoram soli.

Kali niama abiedźviuch mahčymaściej, to nie nahružać abutkam mazol i dać jamu svabodna zahaicca ci pad płastyram, ci pad suchoj marlevaj paviazkaj.

Jak praduchilić źjaŭleńnie mazaloŭ

Nakleić płastyr na ŭsie zony ryzyki da vychadu ŭ pachod. Idealny varyjant — zrabić heta viečaram pierad pachodam i lehčy spać u škarpetkach.

Na maršrucie nieabchodna pierad lubym abuvańniem vysušvać nohi (płastyr).

Nie zabyvacca rabić škarpetki ślizkimi (vykarystoŭvać silikon u jakaści łubrykantu).

Kantralavać cełasnaść płastyru i absłuhoŭvać jaho.

Kali na nahach niama płastyru

U hetym vypadku nieabchodna ŭvažliva sačyć za stanam noh. Paśla pierachodu ručajoŭ i rek, zabałočanych miescaŭ nohi treba nie tolki vysušvać, ale i abtrasać, nie ekanomić na heta času. Pry nieabchodnaści dla paskareńnia vysušvańnia nohi možna pracierci śpirtam.

Rehularna mianiać škarpetki. Kali niama mahčymaści ich myćcia ŭ prazrystaj vadzie, to lepš prosta vysušyć i vytraści ad piasku i soli.

Štodzionna myć nohi, kab zmyć sol.

Jakija škarpetki nadzieć

Dla pachodu nieabchodna vykarystoŭvać śpiecyjalnyja trekinhavyja škarpetki. Kali ich niama, to zvyčajnyja škarpetki treba nadzieć švami vonki.

Ni ŭ jakim razie nie nasić machrovyja, čysta vaŭnianyja i čysta bavaŭnianyja.

Nieśpiecyjalizavanyja škarpetki nadziavać pa dźvie pary, vybirajučy pry hetym maksimalna tonkija. Ni ŭ jakim razie pieršymi nie nadziavać kapronavyja škarpetki.

Jaki abutak vybrać

Vybirać dla pachodu śpiecyjalny abutak. Kali takoha niama, to papiarednie raznošany. U im možna abkleić unutranuju častku piatki płastyram.

Što nieabchodna ŭziać z saboj pierad pachodam

Samy tonki płastyr 5 m/5 sm na bavaŭnianaj asnovie.

Śpirt 95%, charčovy ci kaśmietyčny (100 mł).

Bienzin «Kałoša» (10 mł).

Rycynavy alej (50 mł).

Polietylenavyja tonkija pakiety (ad 4-ch štuk).

Dźvie pary samych tonkich kapronavych holfaŭ (ełastan).

10 mł kandycyjanieru dla bializny.

Manikiurnyja nažnicy.

Vatnyja dyski ci survetki.

Zapasny abutak (lepš za ŭsio hałošy).

Kuchonnuju sol.

Čytajcie jašče:

Našto paryć nohi ŭ vocacie? Prosty srodak ad prablem, pra jakija nie pryniata havaryć

Zamačycie nohi ŭ pierakisie vadarodu — i vy pazbaviciesia nadakučlivaj prablemy

Клас
22
Панылы сорам
3
Ха-ха
5
Ого
4
Сумна
3
Абуральна
6