Skrynšot ź videa
Centralny praśpiekt Rustavieli ŭ Tbilisi pierakryty, a terytoryja pierad parłamientam całkam zapoŭnienaja ludźmi. Pavodle acenak miascovych ŚMI, ich kolkaść dachodzić da 10 tysiač.
Apazicyja vystaviła ŭładam Hruzii dva patrabavańni: adklikać zakonaprajekt ab zamiežnych ahientach i vyzvalić zatrymanych padčas učarašnich vystupleńniaŭ. Pavodle źviestak hruzinskaj palicyi, kolkaść zatrymanych dasiahnuła 77 čałaviek.
U vypadku nievykanańnia ŭmoŭ aktyvisty «piarojduć da inšych krokaŭ», zajaviŭ lidar apazicyjnaj partyi «Stratehija Ahmašeniebieli» Hieorhij Vašadze i daŭ na vykanańnie patrabavańniaŭ usiaho hadzinu.
Naturalna, za hety termin ułady na sastupki nie pajšli, tamu mitynhoŭcy pryniali rašeńnie pačać «abłohu parłamienta». Za prapanovu ŭdzielniki akcyi hałasavali padniatymi rukami.
«My prapanujem nastupny krok: mirna i spakojna z abodvuch bakoŭ akružyć parłamient… Davajcie zrobim heta mirnym šlacham. My zaklikajem palicyju nie supraćstajać mirnym pratestoŭcam», — zajaviŭ Vašadze.
Častka mitynhoŭcaŭ pry hetym zaklikaje da bolš radykalnych dziejańniaŭ.
7 sakavika deputaty parłamienta Hruzii ŭchvalili ŭ pieršym čytańni adzin z dvuch zakonaprajektaŭ ab zamiežnych ahientach — «Ab prazrystaści zamiežnaha ŭpłyvu». Za jaho prahałasavali 76 deputataŭ, suprać — 13. Heta vyklikała šmattysiačnyja pratesty ŭ stalicy, ludzi pryjšli da parłamienta.
Razhaniajučy akcyju, hruzinskija siłaviki ŭžyli ślezaciečny haz i vadamioty. Pozna ŭviečary supraćstajańnie la parłamienta abvastryłasia: demanstranty ŭžyli «kaktejli Mołatava», a siłaviki — humovyja kuli. Palicyja zatrymała dziasiatki ludziej, ale častka demanstrantaŭ zastavałasia na miescy akcyi da ranicy, apazicyja paabiacała praciahnuć pratesty.
Pratestoŭcaŭ padtrymała prezidentka Hruzii Sałame Zurabišvili, jakaja akurat u toj čas znachodziłasia ź vizitam u ZŠA. Ale ŭ Hruzii prezident — pasada bolš cyrymanijalnaja, realny kiraŭnik dziaržavy — premjer-ministr.
Čytajcie taksama:
U Hruzii prachodziać žanočyja maršy suprać zakona ab inšaziemnych ahientach
U Hruzii vybuchnuli masavyja pratesty suprać pryniaćcia zakona ab «zamiežnych ahientach»
