Plušavy desant. Fota z paviedamleńnia «Našaj Nivy» za 4 lipienia 2012 hoda
4 lipienia 2012 hoda, na druhi dzień paśla śviatkavańnia aficyjnaha Dnia Niezaležnaści, Biełaruś uskałychnuła niezvyčajnaja navina.
Harady Biełarusi byli «bambardavanyja» plušavymi cackami. Adkaznaść za heta na siabie ŭziali dva šviedy, jakija zdoleli na svaim lohkamatornym samalocie niezaŭvažna dla sił supraćpavietranaj abarony krainy pierasiačy pavietranuju prastoru Biełarusi i na małoj vyšyni dalacieć da Minska.
U toj ža dzień źjaviłasia niekalki videa hetaj akcyi. Pa ich dakładna možna było vyznačyć miesca akcyi. Heta byŭ haradski pasiołak Ivianiec i ŭskrainy Minska (Sucharava i Malinaŭka). Na videa byŭ bačny piłot, jaki schavaŭ tvar pad maskaj miadźviedzika, i jahony siabra, jaki skidaŭ plušavyja cacki z pryčeplenymi da ich ulotkami, što zaklikali da vykanańnia svabody słova ŭ Respublicy Biełaruś.
Źjaviłasia videa desantu miadźviedzikaŭ nad Biełaruśsiu.
Na druhim videa było bačna, jak ź nieba spuskajucca miadźviedziki na parašucikach.
Novaje videa desantu miadźviedzikaŭ: samalot nad Minskam.
Žychary Ivianca paćvierdzili, što bačyli samalot. Jany raskazali, što plušavyja cacki ŭ miastečku sabrała milicyja.
Jak stała paźniej viadoma, samalot startavaŭ z aeradroma ŭ Pačunach (Pačunaj) kala Koŭna, pierasiek miažu ź Biełaruśsiu kala vioski Baranavičy Iŭjeŭskaha rajona. Šviedy kažuć, što bajalisia, kab samalot nie byŭ źbity biełaruskaj SPA. Pavodle słoŭ piłotaŭ, što brali ŭdzieł u akcyi, jany prabyli ŭ pavietranaj prastory Respubliki Biełaruś prykładna 1—1,5 hadziny i bieź ciažkaściaŭ viarnulisia ŭ Litvu.
Ministerstva abarony Biełarusi zajaviła, što nijakich nieapaznanych samalotaŭ u biełaruskaj pavietranaj prastory 4 lipienia nie źjaŭlałasia. A videa palotu, maŭlaŭ, mantaž i «hruba sfabrykavanaja pravakacyja».
Bolšaść ŚMI paličyła, što zajavy šviedaŭ byli pijaram.
Toje, što fakt pierasiačeńnia miažy ŭsio ž taki byŭ, Alaksandr Łukašenka pryznaŭ tolki 26 lipienia.
31 lipienia jon vyzvaliŭ ad pasady kamandujučaha Vajskova-pavietranymi siłami i vojskami supraćpavietranaj abarony Dźmitryja Pachmiełkina i staršyniu Dziaržaŭnaha pahraničnaha kamiteta Ihara Račkoŭskaha. Pryčyna — «nienaležnaje vykanańnie słužbovych abaviazkaŭ pa zabieśpiačeńni nacyjanalnaj biaśpieki Respubliki Biełaruś».
Tahačasnyja dziaržaŭny sakratar Rady Biaśpieki Leanid Malcaŭ i staršynia KDB Vadzim Zajcaŭ atrymali vymovy. Ministr abarony Juryj Žadobin i načalnik Hienštaba Uzbronych Sił Piatro Cichanoŭski byli papiaredžanyja ab niapoŭnaj słužbovaj adpaviednaści.
Kanflikt pryvioŭ i da zamarožvańnia dypłamatyčnych adnosin sa Šviecyjaj (dypłamaty abiedźviuch krain viarnulisia dachaty) i ŭskładnieńnia adnosin ź Litvoj.
Rasśledavańnie pravodziŭ Śledčy kamitet. U adpaviednaści ź jaho vynikami, pry pierasiačeńni miažy samalot zaŭvažyŭ pamiežny narad i paviedamiŭ dziažurnamu pa pamiežnym pastu «Subotniki». Ale dziažurny nie pieradaŭ daniasieńnie ŭ padraździaleńni Vajskova-pavietranych sił i vojskaŭ supraćpavietranaj abarony i vyšejstajačamu načalstvu. Za hetaje parušeńnie dziažurny atrymaŭ dva hady pazbaŭleńnia svabody.
15 lipienia KDB zatrymaŭ fatohrafa Antona Surapina, jaki pieršym raźmiaściŭ fota akcyi na svaim sajcie, i ryełtara Siarhieja Bašarymava, jaki dapamoh z arendaj žylla lehalna pryjechaŭšym šviedam, jakija ź ziamli zdymali akcyju.
Praŭda, kali paraŭnoŭvać ź ciapierašnimi časami, to abodva, možna skazać, abyšlisia «lohkim spałocham», bo ŭžo 17 žniŭnia abodva abvinavačanych byli vyzvalenyja pad padpisku ab niavyjeździe, a 28 červienia 2013 hoda KDB publična abjaviŭ ab spynieńni kryminalnaj spravy suprać ich i źniaćci abvinavačańniaŭ.
U 2016 hodzie Surapin navat adsudziŭ materyjalnuju kampiensacyju maralnaj škody. Ciapier heta ŭsprymajecca jak niešta ŭvohule kazačnaje, ale časy tady byli inšyja — režym byŭ zacikaŭleny ŭ palapšeńni adnosin z Zachadam, i hetaje žadańnie było ŭzajemnym.
Što tyčycca siłavikoŭ, hałovy jakich tady palacieli, to ich karjera ŭ siłavych strukturach była niezvarotna spynienaja. Adnak Ihar Račkoŭski paśpiachova praciahnuŭ jaje ŭ inšaj halinie: užo 1 listapada 2012 hoda jon staŭ pieršym vice-prezidentam Nacyjanalnaha alimpijskaha kamiteta, heta značyć pieršym namieśnikam samoha Łukašenki. A voś imia Dźmitryja Pachmiełkina paśla ŭ novaj jakaści nie ŭspłyvała.
Ciapierašniaja situacyja nieparaŭnalna bolš surjoznaja va ŭsich sensach, dy i časy bolš surovyja. Tamu, u pryncypie, varta čakać i kudy bolš surjoznych łukašenkavych kadravych «pieratrachivańniaŭ» u śfierach, adkaznych za vajskovuju avijacyju. Ci jany adbuducca nasamreč — pakaža najbližejšy čas. Pakul što Łukašenka, prynamsi, publična abyšoŭsia choć i strohimi, ale tolki słovami.
Čytajcie taksama:
«Žestačajšaj dyscypliny!» Łukašenka adčytaŭ kiraŭnictva siłavoha błoku. Chrenin siadzieŭ jak myła źjeŭšy
