Skrynšot STB
«Ja liču, što nam u lubym vypadku treba papularyzavać biełaruskuju movu, umacoŭvać biełaruskamoŭnaje asiarodździe i ŭ tym liku rabić peŭnyja zachady, jakija davali b mahčymaść kožnamu hramadzianinu volna kamunikavać pa-biełarusku.
Ja liču, što režym pazityŭnaj dyskryminacyi — značyć umacavańnia biełaruskaj movy, bo ŭ jaje inšaj radzimy, akramia Biełarusi, niama — vielmi važny»,
— vykazaŭsia ŭ efiry Marzaluk.
«Voj pa vas projducca niekatoryja błohiery», — adpuściŭ repliku viadučy pieradačy i hałoŭny redaktar «Minskaha kurjera» Kirył Kazakoŭ.
«Mnie načchać. My pryjšli ŭ hetuju situacyju nie ŭčora i nie ŭ 1991 hodzie, ja tut nie budu aktualizavać usie momanty, źviazanyja z pałanizacyjaj i rusifikacyjaj. Heta majo subjektyŭnaje mierkavańnie, nie kamisii, nie parłamienta — ja liču, što było b pravilna na siońnia viarnucca da toj praktyki, jakaja była ŭ Ministerstvie adukacyi, kali humanitarnyja dyscypliny (hieahrafija Biełarusi, historyja Biełarusi, hramadaznaŭstva) vykładalisia tolki pa-biełarusku», — padzialiŭsia deputat.
Marzaluk dadaŭ, što takoje musić być i ŭ ruskamoŭnych škołach.
«Ja zakančvaŭ viaskovuju škołu ŭ Krasnapolskim rajonie. Kali mnie raskazvajuć, što matematyku, albo fiziku, albo chimiju nielha vykładać na biełaruskaj movie, heta śmiešna, tamu što mnie vykładali ŭvieś kompleks dyscyplin, za vyklučeńniem ruskaj movy i litaratury, pa-biełarusku».
Svaimi słovami Marzaluk aburyŭ niekatorych łukašystaŭ i prarasijskich dziačaŭ.
«Jak vam takoje? Byccam Orueła čytaju. Ale prachodzicca pa Marzaluku ja nie budu. Jamu ŭsio adno «načchać», — adreahavała mastačka Śviatłana Žyhimont.
«Padobna, pačałosia ŭsio spačatku, znoŭ biełarusizatary z pazityŭnaj dyskryminacyjaj pavyłazili», — pišuć jaje adnadumcy ŭ kamientarach.
«Čamu tak adkryta ŭbivajecca raskoł prosta z ekranaŭ dziaržSMI?»
Marzaluka abvinavacili ŭ rusafobii, paśpieli achryścić i «panam», i «bečebešnikam».
Blizki da siłavikoŭ telehram-kanał napisaŭ, što deputat zaklikaje da dyskryminacyi ruskaj movy (praŭda, paśla post vydaliŭ).
«Biełaruski deputat Marzaluk na dziaržaŭnym biełaruskim kanale zajaviŭ ab nieabchodnaści dyskryminacyi pa moŭnym pryncypie. Biełaruskaja mova, pavodle Marzaluka, pavinna stać daminujučaj, a tytulnaja nacyja ŭ Respublicy Biełaruś — biełarusy. Čym heta adroźnivajecca ad raspalvańnia nacyjanalnaj i moŭnaj varožaści?» — niezadavolena napisała prarasijskaja dziajačka ź Viciebska Elvira Mirsalimava.
