Natalla Sacharčuk. Skrynšot ź videa
Natalla Sacharčuk, jakaja pierajšła ŭ staličnuju milicyju z pasady načalnika pres-słužby bresckaj milicyi, ź listapada 2021-ha tak i nie atrymała pałkoŭnickich pahonaŭ, chacia i pracuje na «pałkoŭnickaj pasadzie».
Čytajcie taksama: «Navat padnačalenyja Čamadanavaj admovilisia». Što viadoma pra Natallu Sacharčuk, jakaja stała pres-sakratarkaj MUS
«Nie dajuć, tamu što nie apraŭdvaje davieru. Joj treba być, jak Čamadanava: kidacca hrudziami na barykady, leźci va ŭsie dzirki, nie bajacca chłusić tak, kab kazali «choć u vočy scy», admyvać imidž MUS u vačach hramadstva, dla čaho jaje, ułasna, i brali», — skazaŭ nam adzin z kaleh Sacharčuk.
«Mahčyma, u jaje byli niejkija kasiaki, vymovy. Vymova zvyčajna viešajecca na hod, paśla čaho jana aŭtamatyčna zdymajecca, kali tolki nie adbyvajecca niejkich unutranych «amnistyj», kasiakoŭ, u honar Dnia milicyi, naprykład.
Samo naviešvańnie vymovy nie zabaraniaje pavyšeńnia ŭ zvańni, ale časta vymova — heta nahoda, kab čaść, da jakoj prypisany čałaviek, «zabyłasia», «zatupiła», ci zrabiła jašče niešta, u vyniku čaho dakumienty na padpisańnie novych pahonaŭ nie byli adpraŭlenyja, — heta standartnyja praktyki», — dadaŭ surazmoŭca.
Niadaŭna ŭ internet byli vypadkova vystaŭlenyja danyja aficeraŭ, jakija viaduć adzin z telehram-kanałaŭ, dzie publikujuć kryminał i videa z represavanymi. Milicyjaniery ličać, što heta taksama adabjecca na karjery Sacharčuk.
Čytajcie taksama: Milicejski telehram-kanał, dzie publikujuć videa z represavanymi, vypadkova vydaŭ svaich adminaŭ
«Adno viedaju dakładna: paśla pra**bu słužbovaha dakumienta i adpaviednaha artykuła ŭ niedziaržaŭnaj presie joj abaviazkova pavinny paviesić vymovu, jak kiraŭnicy tych, chto heta zrabiŭ. A taho, chto zrabiŭ, mohuć zvolnić ci, kali paščaścić, panizić u zvańni», — kažuć nam.
Nahadajem, administratary telehram-kanała «Obratnaja storona» vypadkova zapościli tudy hrafik dziažurstvaŭ.
Vyjaviłasia, što struktura, jakaja adkazvaje za viadzieńnie kanała, jaki poŭnicca materyjałami, što raspalvajuć varožaść pa palityčnaj, nacyjanalnaj i seksualnaj prykmietach, a taksama materyjałami sa źniavahaj honaru, hodnaści i dziełavoj reputacyi hramadzian, — heta Upraŭleńnie infarmacyi i hramadskich suviaziaŭ (UIHS) Ministerstva ŭnutranych spraŭ. Padraździaleńnie, jakoje za heta adkazvaje, maje ruskamoŭnuju abrevijaturu ORIKS. Heta novaje padraździaleńnie, nazva, chutčej za ŭsio, rasšyfroŭvajecca jak adździeł pa rabocie ŭ infarmacyjna-kamunikacyjnaj śfiery ci adździaleńnie pa rabocie ŭ internecie i kamunikacyjnaj śfiery.
