Fota: Michael Sohn / AP
Padčas dzion, kali bušavali publičnyja debaty z nahody vidavočnaj admovy Niamieččyny pieradać Ukrainie svaje tanki Leopard 2, spadar Šolc sutyknuŭsia z rostam krytyki na svoj adras, u tym liku z boku kiroŭnych dziejačaŭ jaho ŭłasnaha ŭrada. Ekśpierty Twitter prydumali novy dziejasłoŭ — Scholzing — dla abaznačeńnia vahańniaŭ i nierašučaści.
Adnak u realnaści heta Šolc dziejničaŭ śmieła i kułuarna dabiŭsia stvareńnia kaalicyi sajuźnikaŭ, jakaja pastavić bolš za 100 sučasnych tankaŭ dla supraćdziejańnia rasijskamu nastupu, piša The Wall Street Journal.
Na Suśvietnym ekanamičnym forumie ŭ Davosie kancler Niamieččyny skazaŭ, što dazvolić pieradać Kijevu Leopard 2 tolki ŭ tym vypadku, kali Vašynhton zrobić toje ž samaje z «Abrams M1», — vyhladała, jak byccam vyrašalny krok musiać zrabić Štaty. Adnak, pa słovach pamočnikaŭ i zachodnich aficyjnych asob, jakija ŭdzielničali ŭ pieramovach, za kulisami akurat kancler Niamieččyny adyhraŭ klučavuju rolu ŭ źniaćci dobraachvotna ŭstanoŭlenaha transatłantyčnaha tabu na adpraŭku tankaŭ zachodniaj vytvorčaści va Ukrainu i pierakanaŭ prezidenta ZŠA, jaki nie padzialaŭ takoj rašučaści, dałučycca da namahańniaŭ.
Na hetym tydni rašeńni zachodnich sajuźnikaŭ pryviali da sumiesnaha abiacańnia pastavić Ukrainie kala 100 sučasnych tankaŭ — bolš, čym čakaŭ luby vajenny analityk.
Pa słovach čynoŭnikaŭ, blizkich da kanclera, spadar Šolc dziejničaŭ pavolna, bo pamiataje pra apytańni hramadskaj dumki, jakija pakazali, što niamieckaja hramadskaść raskałołasia ŭ dačynieńni da taho, ci varta Bierlinu davać tanki Ukrainie. Jon admoviŭsia paddacca zapałochvańniu z boku sajuźnikaŭ i ekśpiertaŭ tvitara i parušyć asnoŭny pryncyp — što ZŠA i ich jeŭrapiejskija sajuźniki pavinny dziejničać razam i akazvać vajskovuju padtrymku Kijevu pastupova.
«Hiermanija robić bolš za ŭsio», — skazaŭ Šolc u intervju paśla taho, jak stała viadoma pra damovu. Pavodle jaho słoŭ, Niamieččyna ciapier druhi pa vieličyni vajenny apiakun Ukrainy paśla ZŠA i akazvaje istotnuju humanitarnuju dapamohu, prytuliŭšy bolš za miljon ukrainskich biežancaŭ.
«Prysutnaść u ŚMI — heta nie vymiaralnik mižnarodnaj palityki… Niama sensu niešta rabić tolki tamu, što mnohija hučna pra heta kryčać», — skazaŭ Šolc.
Niežadańnie niamieckaha kanclera publična tłumačyć svaju palityku i jaho vidavočnaja ŭpartaść pad ciskam u peŭnaj stupieni padarvali jaho imidž u pieršy hod znachodžańnia na pasadzie: kancler vyhladaje nierašučym da taho momantu, pakul jaho nie pryciskajuć da ściany.
Tak, naprykład, niekalki miesiacaŭ jon adkidaŭ zakliki zakryć niemiecka-rasijski prajekt hazapravoda «Paŭnočny patok — 2» i pieramianiŭ dumku, tolki kali Rasija pryznała niezaležnaść «DNR» i «ŁNR» za dva dni da svajho ŭvarvańnia.
Taksama letaś jon admoviŭsia ŭdzielničać u debatach svaich partnioraŭ pa kaalicyi pra toje, ci varta pakidać try atamnyja elektrastancyi ŭ pracoŭnym stanie da ich zapłanavanaha zakryćcia, i ŭmiašaŭsia tolki pierad tym, jak praciah pracy elektrastancyj moh stać užo technična niemahčymym.
Pa słovach pamočnikaŭ, adna z pryčyn aściarožnaści kanclera — jaho zaniepakojenaść tym, što Hiermanija i NATA mohuć akazacca ŭciahnutymi ŭ vajnu va Ukrainie, — darečy, hetuju zakłapočanaść padzialaje bolšaść niemcaŭ. Pavodle apublikavanaha ŭ čaćvier reprezientatyŭnaha apytańnia Forsa, bolš za 80% ličać, što važniej skončyć vajnu šlacham pieramovaŭ, čym vyjhrać, i tolki 18% z hetym nie zhodnyja.
Taksama Šolc pa-raniejšamu zaniepakojeny jadziernaj eskałacyjaj i tym, što Pucin moža adreahavać na ździełku pa tankach jašče bolšymi źvierstvami suprać mirnych ukraincaŭ.
Narešcie, jość padstavy i aścierahacca sabatažu niamieckaj infrastruktury z boku Rasii — takija aściarohi padsiłkoŭvajucca atakaj na kamunikacyjnuju sietku niamieckaj čyhunki ŭ minułym hodzie, jakuju, na dumku niekatorych aficyjnych asob, arhanizavała Rasija, ale Maskva heta admaŭlaje.
Pa słovach niamieckaha kanclera, kab źmienšyć ryzyki, treba prytrymlivacca pryncypu pastupovaha, uzhodnienaha lidarstva. «Heta adziny pryncyp, jaki moža harantavać biaśpieku Jeŭropy i Hiermanii ŭ takich niebiaśpiečnych umovach», — kaža Šolc. «Było pravilna nie dać siabie padšturchnuć».
https://d2lur0sisdcrej.cloudfront.net/308550