Fota: Aleks Elinhchaŭzien / Financial review
Toryn Bramfiet nazvanaja aŭstralijkaj 2023 hoda za svaju pracu nad pazityŭnym staŭleńniem da cieła, zasnavanuju na jaje stužcy 2016 hoda «Abdymki» (Embrace). Z taho času jaje raboty pahladzieli miljony ludziej na Netflix. U vieraśni jana taksama vypuściła dakumientalny film Embrace Kids dla dziaciej ad 9 da 14 hadoŭ — u im jana vučyć dziaciej šanavać svajo cieła.
Prymajučy ŭznaharodu na cyrymonii ŭ Kanbiery, Bramfit źviarnuła ŭvahu na toje, što vielmi važna vyrašać prablemy z vobrazam cieła ŭ moładzi.
«My sutyknulisia z nadzvyčajnaj situacyjaj u piedyjatryi, z rezkim rostam kolkaści samahubstvaŭ, depresii, razładaŭ charčovych pavodzinaŭ, źviazanych ź niezadavolenaściu svaim ciełam», — skazała Toryn.
Staršynia Nacyjanalnaj rady Dnia Aŭstralii Daniel Raše skazała, što praca Bramfit vyklikała značnyja źmieny na asabistym uzroŭni ŭ šmatlikich aŭstralijcaŭ i ludziej va ŭsim śviecie.
«Toryn natchniła miljony žančyn va ŭsim śviecie adčuvać siabie kamfortna va ŭłasnym abliččy», — skazała Raše.
Toryn Bramfiet z premjer-ministram Aŭstralii Entani Albaneze padčas uručeńnia ŭznaharody «Aŭstralijec hoda». Fota: Georgia Roberts / ABC news
45-hadovaja maci čatyroch dziaciej, Toryn Bramfiet choča dać i svaim dzieciam «daśpiechi», kab abaranić ich ad niaspynnaj rekłamy dyjetyčnaj i kaśmietyčnaj industryi i sacyjalnych sietak, piša ABC news.
«My možam nie dapuścić taho, kab dzicia vyrasła z dysfunkcyjanalnymi adnosinami sa svaim ciełam, bo my nie naradzilisia ź nianaviściu da svajho cieła», — kaža Toryn.
Pa jaje słovach, vina nie tolki na sacyjalnych sietkach, ale častkova i na vybary samich ludziej, bo jany rašajuć, na jakija akaŭnty im padpisacca.
Toryn zaklikała moładź sačyć za akaŭntami, jakija natchniajuć ich być lepšymi ludźmi, zamiest taho, kab zasiarodžvacca na źniešnim vyhladzie.
Bramfiet taksama adznačyła, što baćki pavinny davać dzieciam prykład stanoŭčaha staŭleńnia da ŭłasnaha cieła, navat kali časam jany adčuvajuć siabie niaščasnymi z-za taho, jak vyhladajuć.
Fota: archiŭ Toryn Bramfit / ABC news
Prajšło 10 hadoŭ z taho času, jak nietypovaja fatahrafija spadaryni Bramfit «da i paśla» pryciahnuła suśvietnuju ŭvahu.
Na fota «da» jana staić na scenie ŭ bikini na spabornictvach pa bodzibiłdynhu. Jana ŭśmichajecca, ale, pa słovach Toryn, mienavita ŭ toj momant jana zrazumieła, što hadziny štodzionnych fizičnych praktykavańniaŭ i abmiežavańnie ŭ ježy nie zrabili jaje ščaślivaj.
«Majo «paśla» takoje, jak ja ciapier: celulit, raściažki, zmorščyny, usio takoje», — kaža Toryn.
«Što samo pa sabie varjactva? Žančyna vučycca abdymać svajo cieła, i heta stanovicca nievierahodnaj navinoj u bolšaści krain śvietu».
Mužčyny taksama nie zastrachavanyja ad parušeńniaŭ u adnosinach sa svaim ciełam. U razmovach z Toryn mužčyny i chłopčyki raspaviadali joj pra svaje tryvohi, źviazanyja z abłysieńniem abo niedastatkova vialikimi muskułami.
«Heta časta padaŭlajecca. Jany nie dzielacca svaimi dumkami, ale jość šmat rečaŭ, jakija ich taksama zasmučajuć i strymlivajuć», — kaža Toryn.
«Ja dumaju, što my ŭsie pavinny ŭdzielničać u hetaj razmovie, kali situacyja datyčyć vyhladu cieła. Heta nie tolki dla žančyn, heta dla ŭsich».
Paśla pośpiechu stužak, pryśviečanych žančynam i dzieciam, režysior i aktyvistka płanuje źniać film, pryśviečany i mužčynam. Adnak pakul, jak aŭstralijka hoda, jana zasiarodzić svaju ŭvahu na pracy ź dziećmi — u hetym kirunku Toryn užo abjadnoŭvałasia z ekśpiertami, kab stvaryć admysłovuju knihu dla baćkoŭ i biaspłatny daśledčy centr.
