Emilij Łabiejka. Fota: jutub-kanał Siarhieja Biaspałava
Emilij Łabiejka rodam z Babrujska i ciapier jamu 22 hady. U chłopca dvoje dziaciej. U 2020 hodzie Emil pastupiŭ u BDUIR na zavočnaje, ale paśla žnivieńskich padziej vyrašyŭ kinuć.
U 2020-m jon aktyŭna ŭdzielničaŭ u ruchu za svabodnyja vybary ŭ rodnym horadzie. Praz heta jany pasvarylisia z baćkam-łukašystam, jaki skazaŭ, što «daviŭ pratestunoŭ jašče ŭ 96-m i pierad rodnym synam nie spynicca». Paśla adjezdu Emilija ŭ Polšču zamiest słova na darohu jon vysłaŭ jamu abraźlivaje paviedamleńnie.
Abraźlivaje paviedamleńnie ad baćki Emilija.
Maci chacieła, kab chłopiec atrymaŭ dypłom i žyŭ «jak usie». Praz toje, što Emilij chacieŭ žyć inačaj, u ich adbyŭsia kanflikt, i jany amal nie kantaktujuć. Pierad pajezdkaj u Polšču jana skazała chłopcu, što «adrakajecca takoha syna».
Paśla žnivieńskich padziej chłopiec taksama pačaŭ vyznavać anarchisckija pohlady. Na jahonaj šyi krasujecca čorna-čyrvonaja litara A ŭ kole — adzin ź simvałaŭ anarchisckaha ruchu.
Tatuiroŭka na šyi Emilija. Fota: jutub-kanał Siarhieja Biaspałava
Da vajny Emil žyŭ u Polščy i pracavaŭ u «Makdonaldsie». Kali pačałasia vajna, chłopiec adrazu vyrašyŭ dla siabie, što jon musić pajechać va Ukrainu, kab dapamahčy ŭkraincam vystajać.
U chłopca da 2022 hoda nie było nijakaha dośviedu i jon navat nie prydatny dla biełaruskaha vojska, bo zusim nie čuje na adno vucha. Ale heta nie stała prablemaj.
Niahledziačy na składanyja adnosiny, pieršy i adziny, kamu chłopiec raskazaŭ pra toje, što jedzie va Ukrainu, byŭ akurat baćka. Jon pazvaniŭ jamu ź ciahnika i raskazaŭ, što jedzie vajavać. Maci daviedałasia pra toje, što jon vajuje, užo ad KDBšnikaŭ, jakija pryjšli da jaje dadomu.
Emilij na adnym z «bajavych»
Emilij ščymliva raspaviadaje i pra Ivana «Bresta» Marčuka: «Brest byŭ zaŭždy pieršy. Jon vałodaŭ mocnym myśleńniem i ŭmieŭ skaardynavać nas navat u samych składanych situacyjach.
Brest staŭ čałaviekam, jakomu ja sapraŭdy byŭ hatovy davieryć svajo žyćcio i iści ź im kudy zaŭhodna. Ja skazaŭ sabie tady prostyja słovy: ja hatovy pamierci za Bresta. I choć jon zahinuŭ, ale nie zdradziŭ svaim idejam i išoŭ da apošniaha».
Emilij atrymaŭ try kantuzii. Pieršuju — padčas boja pad Łazavym, za płacdarm na levym bierazie Inhulca, jaki adkryvaŭ darohu da Chiersona. Tady kala chłopca razarvaŭsia artyleryjski snarad, a paśla mina. Heta była kantuzija hałaŭnoha mozhu.
Druhuju kantuziju Emil atrymaŭ u Zaparožskaj vobłaści i heta była kantuzija ŭsiaho arhanizma. Z-za taho, što chłopiec niedastatkova ŭvahi ŭdzialiŭ lačeńniu pieršaj kantuzii, u jaho raźviŭsia posttraŭmatyčny razład, jaki mocna ŭpłyvaŭ na žyćcio. Paśla druhoj kantuzii jon usurjoz zadumaŭsia pra toje, što ž takoje kantuzija i jakija ŭ jaje mohuć być nastupstvy ŭ bajavych umovach.
Paśla druhoj kantuzii chłopiec vykonvaŭ rekamiendacyi miedykaŭ, a taksama kinuŭ kuryć i admoviŭsia ad ałkaholu. «U mianie ŭstaŭ vybar: abo ja zajmajusia chiernioj, abo ja maju šaniec viarnucca da pabracimaŭ, i ja abraŭ druhoje», — kaža chłopiec.
Treciuju kantuziju Emilij atrymaŭ pad Bachmutam. Ciapier chłopiec prachodzić reabilitacyju i lečycca.
Emilij padčas reabilitacyi
«Paśla treciaj kantuzii ja pa-inšamu baču svajo žyćcio. — kaža jon, — Pieranosić jaje našmat praściej. Mnie navat stała lahčej žyć i prymać rašeńni ŭ paŭsiadzionnym žyćci. I navat starajusia padbadziorvać ludziej vakoł.
I mienavita ŭ Bachmucie ja kančatkova upeŭniŭsia, što ja zrabiŭ pravilny vybar. Tam zastavalisia mirnyja žychary i takoje vidovišča — jedzieš pa horadzie, usio razburanaje, a tam babula idzie z pakietam. I ty razumieješ, što ludzi spadziajucca na ciabie i nielha zdacca».
Ja hatovy pryniać śmierć dziela svaich idejaŭ. Ja budu vyniščać akupantaŭ, pakul zdolny heta rabić, da apošniaha ŭzdychu. Za Biełaruś, za Ukrainu, za baćkoŭ, za dziaciej, za bratoŭ i siaścior, za ŭsich zahinułych, za praŭdu.
Ja nie mahu spynicca, bo vieru, što rablu ŭsio pravilna. Ja žyvu i hatovy pamierci ŭ imia ludziej, jakich mahu abaranić.
Ale ja liču, što biełarusaŭ moža vyzvalić tolki ŭvieś narod, a nie Połk Kalinoŭskaha ci niejkaje kankretnaje biełaruskaje padraździaleńnie. Biełarusy musiać uśviadomić siabie nacyjaj i adčuć, kolki kaštuje svaboda. I, prynamsi, uzhadać svaju movu».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
