Bachmut. Fota: AP Photo/LIBKOS
Napiaredadni nienazvany amierykanski čynoŭnik ź Biełaha doma zajaviŭ žurnalistam, što Ukrainie treba zasiarodzicca na padrychtoŭcy da viasnovaha kontrnastupleńnia, a nie na abaronie Bachmuta luboj canoj.
Ekśpierty ISW, u svaju čarhu, pryznajuć, što abarona Bachmuta ciahnie za saboj značnyja vydatki, u pryvatnaści, mahčyma, pieraškadžaje Ukrainie vieści kontrnastupalnyja apieracyi ŭ inšych rajonach. Adnak jany padkreślivajuć, što Ukrainie daviałosia b taksama zapłacić značnuju canu, kali b jana dazvoliła rasijskim vojskam lohka ŭziać Bachmut.
Sam pa sabie Bachmut nie maje ni apieratyŭnaha, ni stratehičnaha značeńnia dla vajskoŭcaŭ, ale kali b rasijskija vojski ŭziali jaho adnosna chutka i z małymi vydatkami, jany mahli b raźličvać na pašyreńnie nastupalnych apieracyj. U vyniku Ukrainie daviałosia b śpiešna budavać abarončyja pazicyi na mienš spryjalnaj miascovaści, piša ISW.
Nielha taksama skidać z rachunkaŭ «palityčnuju» metazhodnaść dziejańniaŭ ukrainskich uładaŭ, jakija ŭziali na siabie abaviazacielstva pa abaronie Bachmuta. Rasijskija siły akupavali ŭžo bolš za 100 tysiač kv. km ukrainskaj terytoryi, uklučajučy niekalki haradoŭ, i ździajśniajuć złačynstvy ŭ dačynieńni da ŭkrainskaha mirnaha nasielnictva na akupavanych terytoryjach. Palityčnyja i vajskovyja lidary całkam razumna ŭličvajuć hetyja faktary padčas pryniaćcia rašeńniaŭ.
Amierykancam nie davodziłasia rabić taki vybar z 1865 hoda, i možna dapuścić, što hetyja mierkavańni byli b dla ich vielmi značnymi, kali b z takimi ž pahrozami sutyknulisia amierykanskija harady, padkreślivajuć ekśpierty.
Pastupovaje źniasileńnie
Ukrainskija siły ŭžo vykarystoŭvali anałahičnuju madel pastupovaha źniasileńnia praciŭnika, prymušajučy rasijskich vajskoŭcaŭ niekalki miesiacaŭ nieści vialikija straty ŭ asabovym składzie i technicy dziela niaznačnych taktyčnych pośpiechaŭ.
U pačatku leta 2022 hoda rasijskija vojski miesiacami sprabavali prarvać efiektyŭnuju ŭkrainskuju abaronu ŭ Sievieradaniecku i Lisičansku, zachapiŭšy Lisičansk tolki paśla kantralavanaha sychodu ŭkraincaŭ z hetaha rajona. Adnak nieŭzabavie vyjaviłasia, što zachop Lisičanska nie prynios rasijskim vajskoŭcam apieratyŭnych pośpiechaŭ, rasijskaje nastupleńnie ŭ hetym rajonie faktyčna zachłynułasia. Ukrainskaja abarona Bachmuta, vierahodna, budzie spryjać anałahičnamu vyniku — rasijskija siły pierakidajuć u hety rajon vajskoŭcaŭ i techniku z maja 2022 hoda, ale pakul nie damahlisia jakich-niebudź značnych pośpiechaŭ u apieratyŭnych adnosinach.
Ciapier, pavodle acenak ISW, ukrainskija siły faktyčna ŭtrymlivajuć rasijskija vojski i techniku ŭ rajonie Bachmuta, nakiroŭvajučy tudy ž usiu ŭvahu rasijskaha kamandavańnia. Takim čynam jany nie dajuć Rasii praciahvać nastupleńnie ŭ inšych rajonach.
Asnoŭnaja pryčyna, pa jakoj Ukraina nie moža skarystacca hetaj situacyjaj, — zanadta pavolnyja pastaŭki zbroi ad sajuźnikaŭ, ličać u ISW.