Muž Anhieliny (imia źmieniena) adbyvaŭ termin u adnoj z rasijskich kałonij za zabojstva. Uvosień jon pierastaŭ vychodzić na suviaź, i nieŭzabavie Anhielina daviedałasia ad svajački inšaha asudžanaha, što muž zavierbavany ŭ PVK «Vahnier». U toje, što jon pajechaŭ dobraachvotna, jana nie vieryć, pa jaje słovach, Ukraina dla jaho nie była «fašysckaj» krainaj, jon časta jeździŭ tudy da svajakoŭ.
U kancy śniežnia Anhielinie patelefanavali pradstaŭniki PVK «Vahnier» z paviedamleńniem, što jaje muž zahinuŭ. Siamji vydali zakrytuju cynkavuju trunu, miedali ad PVK, hramatu za hieraičnuju śmierć u baraćbie za svabodu samaabvieščanaj «ŁNR» i paśviedčańnie ab śmierci, padpisanaje ŭ Bachmucie.
Na pytańnie Anhieliny, ci sapraŭdy heta jaje muž, jaje zapeŭnili, što pamyłki być nie moža. «Jany nam skazali, što niama patreby adkryvać trunu, tamu što, pierš čym adpraŭlać [na vajnu], jany biaruć niejkija DNK, i, kali trupy znachodziać, jany paraŭnoŭvajuć. Jany nam skazali: my dajom vam stoadsotkavuju harantyju, što heta jon», — raspaviadaje Anhielina.
Praź niekalki tydniaŭ paśla pachavańnia Anhielinie napisaŭ nieviadomy mužčyna, jaki paviedamiŭ joj, što jaje muž ciapier u Debalcavie. Jašče praź niekalki dzion joj patelefanavali z ukrainskaha numara, mužčyna, jaki pradstaviŭsia supracoŭnikam SBU, skazaŭ, što jaje muž žyvy, aryštavany i znachodzicca va Ukrainie. Jon byŭ zatrymany ŭ kancy kastryčnika. Jon apisaŭ Anhielinie toje ž ranieńnie, ad jakoha, jak śćviardžaŭ pradstaŭnik PVK, jaje muž zahinuŭ — ale skazaŭ, što žyćcio jamu ŭ vyniku vyratavali.
Takija vypadki apisvajuć i inšyja svajaki źniavolenych u čatach i sacsietkach. Niekatoryja, atrymaŭšy trunu, bajacca adkryvać jaje, a pradstaŭniki PVK «Vahnier» rekamiendujuć hetaha nie rabić. U adnym z vypadkaŭ, vyjaŭlenych «Daždžom», truna była pustoj.
U rasijskaj słužbie vykanańnia pakarańniaŭ Anhielinie nijakaj infarmacyi nie dali, bo «heta kanfidencyjna». U vajskovaj kamiendatury Ukrainy joj adkazali, što muž byŭ uziaty ŭ pałon, ale bolš ničoha nie skazali. U adździaleńni SBU Charkaŭskaj vobłaści žurnalistam nie zmahli paćvierdzić abo abvierhnuć infarmacyju. Sa słoŭ surazmoŭcy, heta budzie mahčyma tolki paśla suda.
«Ja vielmi pieražyvaju, što kali ja kudyści pajdu i skažu, što mnie z hetaha numara telefanujuć, i jon sapraŭdy žyvy, jany jaho znojduć, pierš čym jon sam abjavicca. A raptam z čałaviekam niešta zdarycca? Bo jaho niama [pa dakumientach] u pryncypie», — kaža Anhielina.
