Złučanyja Štaty z momantu anieksii paŭvostrava Rasijaj zajaŭlajuć, što Krym — terytoryja Ukrainy. Adnak z pačatku vajny ZŠA admaŭlalisia davać Kijevu srodki, jakija dazvolili b nanosić ŭdary pa celach na paŭvostravie. Vajskoŭcy i čynoŭniki prezidenckaj administracyi ŭ pryvatnych razmovach, piša NYT, stavili pad sumnieŭ metazhodnaść udaraŭ Ukrainy pa Krymie, bo ličyli, što va USU jość bolš prydatnyja mety ŭ inšych častkach frontu.
Ciapier ža, pa danych vydańnia, staŭleńnie źmianiłasia. U administracyi Bajdena schilajucca da mierkavańnia, što, kali ŭkrainskija vojski zmohuć prymusić Rasiju adčuć ryzyku straty kantrolu nad Krymam, heta ŭmacuje pazicyi Kijeva na lubych budučych pieramovach. Siarod amierykanskich čynoŭnikaŭ i ekśpiertaŭ taksama sasłabli aściarohi, źviazanyja z pahrozaj naniasieńnia Rasijaj ŭdaru ŭ adkaz taktyčnaj jadziernaj zbrojaj, pry hetym, na ich dumku, ryzyka takoha scenara ŭsio jašče zachoŭvajecca.
Jak padkreślivajecca ŭ artykule, havorka pa-raniejšamu nie idzie pra pieradaču Ukrainie rakiet, dalokaść palotu jakich dazvalaje nanosić udary pa celach u Krymie. Adnak abmiarkoŭvajecca mahčymaść vykarystańnia inšaj zbroi, u tym liku RSZA HIMARS i broniemašyn Bradley, dla ataki klučavych dla paŭvostrava šlachoŭ zabieśpiačeńnia, naprykład, Krymskaha mosta.
