14 studzienia kryłataja rakieta Ch-22 trapiła ŭ žyły dom. Zahinuli 40 čałaviek, ź ich troje dziaciej. Ranieńni atrymali 75 čałaviek. Vyratavalnyja pracy na ruinach doma ŭsio jašče praciahvajucca, šukajuć 25 čałaviek.
16 studzienia Słužba biaśpieki Ukrainy abviaściła, što ŭstanaviła asoby rasijskich vajskoŭcaŭ, jakija majuć dačynieńnie da rakietnaha ŭdaru. U dačynieńni da ich zaviali kryminalnyja spravy pa artykule 438 KK Ukrainy (parušeńnie zakonaŭ i zvyčajaŭ vajny). Šeść vajskoŭcaŭ, danyja jakich apublikavała SBU, z 52-ha ciažkaha bambardzirovačnaha avijacyjnaha pałka. Jon dysłakujecca ŭ nasielenym punkcie Šajkoŭka ŭ Kałužskaj vobłaści. «Važnyja historyi» znajšli tych, kaho abvinavačvajuć ukrainskija ŭłady, dvoje pahadzilisia adkazać na pytańni.
Pałkoŭnik Aleh Cimošyn, 51 hod
Fota: sacsietki
Cimošyn rodam z horada Aleniahorska Murmanskaj vobłaści. Pa danych SBU, jon kamandzir 52-ha ciažkaha bambardzirovačnaha avijacyjnaha pałka.
Major Alaksiej Ivanienka, 35 hadoŭ
Ivanienka rodam z horada Marozaŭska Rastoŭskaj vobłaści. Pa danych SBU, jon kamandzir avijacyjnaha atrada 52-ha ciažkaha bambardzirovačnaha avijacyjnaha pałka.
Fota: sacsietki
U razmovie z «Važnymi historyjami» Ivanienka skazaŭ, što nie ŭ kursie, što adbyłosia ŭ Dniapry, tamu što nie sočyć za navinami. «Ja zvolniŭsia z vojska try hady tamu, kali mnie prabili hałavu. Vyjšaŭ na piensiju, zajmajusia ciapier asienizatarstvam [asienizacyjaj]», — skazaŭ Ivanienka.
Na pytańnie, što jon dumaje pra toje, što SBU zaviało suprać jaho kryminalnuju spravu za abstreł Dniapra, Ivanienka adkazaŭ: «Vydatna, mnie ciapier zdavacca iści?» Pra Aleha Cimošyna Ivanienka nie viedaje, pra astatnich sa śpisa SBU «čuŭ daŭno». Pra vajnu Rasii ŭ Ukrainie «ničoha» nie dumaje: «Niama čym dumać užo».
Dźmitryj Halankoŭ, 44 hady
Fota: sacsietki
Halankoŭ rodam ź miastečka Pahar u Branskaj vobłaści. Pavodle źviestak SBU, jon načalnik štaba avijacyjnaj eskadrylli avijacyjnaj hrupy Šajkoŭka. Halankoŭ zamiest adkazu na pytańnie ab dačynieńni da abstrełu ŭ Dniapry, zadaŭ karespandentcy «Važnych historyj» sustrečnaje pytańnie: «Krym — Rasijskaja Fiederacyja ci nie? <…> Voś ja, naprykład, dumaju, što Krym — heta Rasija zaŭsiody była i jość».
— Ja chacieła vas spytać, što vy dumajecie pra abstreł Dniapra.
— Pačakajcie z abstrełam Dnieprapiatroŭska. Ja ŭsio razumieju, što vy chočacie ŭ mianie spytać. Ale ja čałaviek Rasijskaj Fiederacyi, Kanstytucyja Rasijskaj Fiederacyi dla mianie vielmi važnaja. Ja chaču ŭ vas, jak u žurnalista, spytać, navošta vy mnie telefanujecie i kažacie mnie pra toje, što Krym… jak by pa-inšamu. Nie. Vy pavinny skazać tady: Krym — heta Rasija. Čamu vy tak kažacie? <…>
Ja skazaŭ, što čatyry subjekty i Krym heta našy. Pryčym tut Ukraina? Ja naohuł Ukrainu nie čapaju. Ukraina — heta inšaja samastojnaja dziaržava. [Paśla niejkaha kamientara, vierahodna, siabra pobač — VH]. Jana ž abstrelvaje našu terytoryju — Rasijskuju Fiederacyju, Danieckuju, Chiersonskuju, Zaparožskuju vobłaści, Krym abstrelvajuć. Čamu vy pra heta mianie nie pytajeciesia? <…> Vy, dziaŭčyna, napeŭna, z Ukrainy. U Rasii žurnalisty nie zadajuć takich pytańniaŭ. Žurnalisty naohuł pytańniaŭ nie zadajuć.
Paśla niekalkich sprobaŭ karespandentki damahčysia ad jaho adkazu z nahody abstrełu Dniapra, Halankoŭ aburyŭsia: «Što, ja prama, b***, na knopku naciskaŭ abo ŭ hetym samalocie siadzieŭ? <…> Krym usio roŭna naš i ŭsio astatniaje naša. Što ty chočaš ad nas?
— Vam asabista nie škada hetych ludziej, jakija zahinuli ŭ Dniapry? 40 užo zahinuli, mnohija da hetaha času pad zavałami.
— Jakija ludzi? Pra što ty naohuł kažaš, ja nie razumieju?
Inšy mužčyna, jaki pobač z Halankovym, pačynaje kryčać, a Halankoŭ padtakvać: «Vy [Ukraina] — rehijon Rasii. Adziny rehijon Rasii. Vy navat roznymi rehijonami nie budziecie». U kancy Halankoŭ dadaŭ: «I ŭsio astatniaje budzie naša. Da pabačeńnia, dziaŭčyna».
Dzinar Naziraŭ, 37 hadoŭ
Fota: sacsietki
Naradziŭsia ŭ 1985 hodzie ŭ horadzie Buhulma (Tatarstan). U 2021 hodzie zajmaŭ pasadu pamočnika šturmana eskadrylli z aficyjnym dachodam 110 tysiač rubloŭ. Pavodle źviestak SBU, jon šturman 52-ha ciažkaha bambardzirovačnaha avijacyjnaha pałka. U intervju telekanału Kiraŭ-TB u 2019 hodzie raspavioŭ, što vyrašyŭ stać vajskoŭcam u pieršym kłasie, skončyŭ Čalabinskaje avijacyjnaje šturmanskaje vučylišča (vierahodna, majecca na ŭvazie Čalabinskaje vyšejšaje vajskovaje avijacyjnaje čyrvanaściažnaje vučylišča šturmanaŭ) i byŭ u zachapleńni ad pieršaha palotu na druhim kursie.
Na pytańnie pra datyčnaść da abstrełu ŭ Dniapry Naziraŭ na fonie inšych mužčynskich hałasoŭ adkazaŭ, što jon «lesavik ź lasnoj haspadarki». «Nie chadzicie ŭ maim lesie i nie pałochajcie vaviorak», — paraiŭ jon. A ŭ vyniku kinuŭ trubku.
Jaŭhien Pacałujeŭ, 41 hod
Fota: sacsietki
Pacałujeŭ naradziŭsia ŭ siale Viazoŭka ŭ Vałhahradskaj vobłaści. Pa danych SBU, jon inžynier pa avijacyjnym uzbrajeńni 52-ha ciažkaha bambardzirovačnaha avijacyjnaha pałka. U siužecie telekanała Kiraŭ-TB pra jubilej pałka skazana, što Pacałujeŭ z žonkaj i dziećmi žyvie ŭ Šajkoŭcy bolš za 20 hadoŭ. Jon skončyŭ Krasnadarski avijacyjny instytut (vierahodna, majecca na ŭvazie Krasnadarskaje vyšejšaje vajskovaje avijacyjnaje vučylišča lotčykaŭ). Z prafiesijaj vajskoŭca jon vyznačyŭsia jašče ŭ škole.
Dzianis Hryhorjeŭ, 40 hadoŭ
Fota: sacsietki
Naradziŭsia ŭ 1982 hodzie ŭ Kastanai (Kazachstan). Pavodle źviestak SBU, jon šturman 52-ha ciažkaha bambardzirovačnaha avijacyjnaha pałka.
Pacałujeŭ i Hryhorjeŭ nie adkazali na pytańni «Važnych historyj».
