Krama JYSK u Kamiennaj horcy, pa adčuvańniach, zajmała bolš za treć handlovaha centra ProDom, jaki sabraŭ pad adnym dacham bolš za 50 vytvorcaŭ mebli i tavaraŭ dla doma i ŭžo dakładna źjaŭlaŭsia jakarnym arandataram.
Praz paŭhoda na jaho miesca nichto tak i nie pryjšoŭ — pustuju prastoru zakryvajuć raletnyja kraty, mižvoli vyklikajuć asacyjacyi z «žaleznaj zasłonaj».
Unutry i zvonku niama ni prykmiet žyćcia, ni abjaŭ z nahody arendy, a pradaŭcy ŭ susiednich kramkach paciskajuć plačyma — «chto ž takuju arendu siońnia paciahnie».
A voś u inšym rajonie bojkaje miesca pustavała adnosna niadoŭha — ciapier tam pracuje vialikaja krama AMI (brend naležyć ajčynnaj meblevaj fabrycy «Łahuna»).
Adroźnieńni bačnyja niaŭzbrojenym vokam: kali JYSK braŭ kolkaściu i raznastajnaściu asartymientu, nakštałt IKEA — siarod palic i stełažoŭ u dni źnižak i rasprodažaŭ časta ledź možna było pracisnucca — to ŭ AMI, padobna, vyrašyli pakazać pryhožaje.
U kramie vielmi prastorna — pamiž palic, kanap, łožkaŭ i kresłaŭ možna svabodna chadzić, i pry hetym niejak niahusta. Kresłaŭ kampjutarnych — try štuki, stałoŭ — mienš dziasiatka, kanapaŭ, łožkaŭ i šaf bolš, ale miesca ŭ vializnaj zale jany zajmajuć niašmat. Kresły ź psieŭdaaksamitnaj abiŭkaj i hučnymi nazvami «Charli», «Ryčy», «Leon» stajać roŭnymi kalarovymi radami, niby chutka pačniecca niejki schod.
Sintetyčnyja pakryvały i paciešnyja paduški, jakija pieratvarajucca ŭ pledy, usiakija drobiazi dla kuchni i vannaj, šerahi štučnych kvietak i kaladnych hnomaŭ, tannyja blašanyja chlebnicy, padłohavyja viešałki — na bolšaści etykietak hetych tavaraŭ značycca Kitaj abo Tajvań.
U budzień dniom pakupnikoŭ amal niama. Zatoje handlovaja płošča sapraŭdy nie pustuje.
***
Z kramami H&M, jakich u Minsku było ŭsiaho dźvie, spravy iduć bolš sumna.
Na płoščach adnoj ź ich, u HC Galleria, u śniežni pracavaŭ kirmaš padarunkaŭ i suvieniraŭ ručnoj pracy «Harošak-markiet». Ale paśla Novaha hoda tut pusta.
Tolki ŭ častcy zały na druhim paviersie na momant vizitu praciahvałasia dabračynnaja kaladnaja akcyja — zbor padarunkaŭ dla dziaciej-sirot, žycharoŭ psichanieŭrałahičnych internataŭ i reabilitacyjnych centraŭ.
Pry hetym na sajcie handlovaha centra abjaŭ z nahody arendy niama, a były dvuchpaviarchovy mahazin H&M paznačany na płanie prosta pustymi prastakutnikami.
Taja ž historyja — u HZC Palazzo, dzie krama viadomaha šviedskaha brenda prapracavała try hady. Siońnia tut pusty ŭčastak, zakryty štorami i raletami, i nijakich namiokaŭ, chto pryjdzie, kali pryjdzie, zamiest jaho.
Adzinaja ŭ Biełarusi aficyjnaja krama Timderland pracavała ŭ HC «Karona Zamak» cełych piać hadoŭ, ź listapada 2017-ha da śniežnia 2022-ha. Pa słovach biełaruskich amataraŭ brenda, vybar madelaŭ adzieńnia i abutku tut zaŭsiody byŭ davoli niadrenny, a ceny choć i niemaleńkija, ale «prymalnyja».
U kancy minułaha hoda ŭładalniki abviaścili ab rasprodažy reštkaŭ sa źnižkami da 90% i ab zakryćci jak handlovaha punkta, tak i internet-kramy. «Šerym» impartam, pa słovach ułaśnikaŭ kramy, zajmacca było prosta niemetazhodna, z-za źmieny i padaŭžeńnia maršrutaŭ pastavak ceny vyraśli b jašče bolš — a kolkaść płaciežazdolnych pakupnikoŭ u Biełarusi pa zrazumiełych pryčynach źmienšyłasia.
Praź miesiac šylda jašče zastałasia — ale sam mahazin vystaŭleny na prodaž razam z usim abstalavańniem. Niekalki maładych ludziej padychodziać, razhladajuć pustuju čornuju vitrynu i fatahrafujucca na fonie — mabyć, na pamiać pra toje, što «niama taho, što rańš było».
U pačatku minułaj vosieni začynilisia i kramy adzieńnia Tommy Hilfiger i Calvin Klein, jakija taksama pracavali ŭ HC «Zamak». Litaralna za paru tydniaŭ tut raspradali tavar i źniali šyldy. Ciapier hetyja paviljony pracujuć, ale pad inšymi nazvami, Point i Top Place, i ź inšym asartymientam, choć na sajcie handlovaha centra abodva brenda ŭsio jašče paznačanyja.
— Calvin Klein ŭ Biełarusi? Zabudźciesia, — śmiajecca znajomaja modnica. — Jany jak letaś syšli, tak i nie abiacali viarnucca. Chiba što ŭ dobrych sekandach niešta sustreniecca.
