Fota: signmyrocket.com
SignMyRocket — heta niekamiercyjnaja arhanizacyja, jakaja źbiraje hrošy dla Uzbrojenych siłaŭ Ukrainy. Servis dazvalaje absalutna lubomu achvotnamu za peŭnuju płatu dystancyjna napisać svajo pasłańnie na roznych vidach snaradaŭ, jakija Ukraina zapuskaje ŭ bok rasijskich zachopnikaŭ.
«Niekatoryja zamožnyja i viadomyja finy hatovyja zapłacić bolš za 200 jeŭra za toje, kab ich pasłańni napisali na 155-milimietrovych artyleryjskich snaradach dla Ukrainy», — piša vydańnie The Times sa spasyłkaj na infarmacyju servisu SignMyRocket.
Marci Kary, były pamočnik hłavy vajskovaj raźviedki Finlandyi, a ciapier prafiesar univiersiteta Juviaskiula, abraŭ takija słovy: «Ščaślivaha Rastva ad siamji Kary!» Jahony tata ŭdzielničaŭ u abaronie ad SSSR u 1940 hodzie i byŭ paranieny ŭ bitvie na Karelskim pierašyjku.
Sofi Oksanien, piśmieńnica i dramaturh, napisała na svajoj staroncy ŭ tvitary: «U hetym hodzie hrošy, jakija ja mahła b patracić na fiejervierki, pajšli na abaronu Ukrainy. I ŭ mianie takoje pačućcio, što moj finski dziadula (vieteran Finskaj vajny) taksama dasłaŭ by svaje vinšavańni, jak i moj estonski dziadula z «Lasnych bratoŭ» razam z rodnymi bratami majoj estonskaj babuli, jakija zahinuli ad ruk NKVD».
Adnak nie ŭsie ŭ Finlandyi stanoŭča staviacca da takoj inicyjatyvy. Helsingin Sanomat, viadučaje vydańnie krainy, napisała, što niekatoryja paviedamleńni pierachodziać miažu pamiž apraŭdanym maralnym abureńniem i hnievam. Kaci Parpiei, vykładčyk historyi Rasii, skazała haziecie, što ŭ Finlandyi adradžajecca stary «duch pomsty».
Paśla vajennaha ŭvarvańnia rasijskaj armii va Ukrainu Finlandyja, jakaja ciaham dziesiacihodździaŭ zachoŭvała niejtralitet, padała zajaŭku na ŭstupleńnie ŭ NATA, abviaściła ab pavieličenńni vydatkaŭ na abaronu na 2 młrd jeŭra i pieradała Ukrainie 11 partyj zbroi (u tym liku i supraćtankavyja rakiety) na sumu kala 190 młn jeŭra. Nasielnictva krainy całkam padtrymała takuju palityku, a 58% nasielnictva vystupajuć za jašče bolšy rost biudžetnych raschodaŭ na abaronu.
Čytajcie jašče:
Rasija praciahvaje rakietny teror. U Dniapry rakieta ŭdaryła ŭ žyły dom — abvaliŭsia ceły padjezd FOTA
Abłomki rakiety ŭpali na terytoryi Małdovy
