Jak śćviardžajuć krynicy vydańnia The Economic Times, Pakistan ŭ hetym miesiacy płanuje adpravić 159 kantejnieraŭ z bojeprypasami va Ukrainu praz marski port u Polščy.
«Pakistanskaja sudnachodnaja i brokierskaja firma Project Shipping płanuje adpraŭlać bojeprypasy z porta Karačy ŭ port Hdańska ŭ Polščy ŭ druhoj pałovie studzienia», — paviedamlaje vydańnie.
Taksama paviedamlajecca, što sudna pad nazvaj BBC Vesuvius budzie pieravozić 155-mm snarady, zarady M4A2, kapsuły M82 i vybuchoŭniki PDM.
Za heta Pakistan, pa infarmacyi vydańnia, moža atrymać ukrainskuju dapamohu ŭ madernizacyi svaich viertalotaŭ Mi-17. Ukrainskaja firma, jakaja zajmajecca vytvorčaściu avijacyjnych ruchavikoŭ, a taksama pramysłovych marskich hazavych turbin, dapamahaje ŭ madernizacyi pakistanskich viertalotaŭ.
Akramia taho, pastaŭščyk zbroi DMI Associates, jaki bazujecca ŭ Isłamabadzie, supracoŭničaje z abaronnymi firmami va Uschodniaj Jeŭropie dla pieradačy vajskovych zamoŭ dla ŭkrainskich vajskoŭcaŭ.
Ukrainu i Pakistan źviazvajuć ciesnyja vajennyja i pramysłovyja suviazi. Isłamabad zakupiŭ bolš za 320 ukrainskich tankaŭ T-80UD, a ŭ pieryjad z 1991 pa 2020 hod Ukraina zaklučyła z Pakistanam kantrakty na pastaŭku zbroi na sumu amal 1,6 miljarda dalaraŭ. Paviedamlajecca, što Isłamabad u tym liku zaklučyŭ damovu z Kijevam na ramont svajho parku tankaŭ T-80UD koštam bolš za 85 miljonaŭ dalaraŭ.
Letaś Pakistan i Ukraina damovilisia aptymizavać vajskovyja suviazi, asabliva ŭ halinie abaronnaj vytvorčaści, padrychtoŭki kadraŭ, kontrterarystyčnaj dziejnaści i vyviedki. Tady Pakistan taksama adyhraŭ vyrašalnuju rolu ŭ pieradačy zbroi ad imia Vialikabrytanii Ukrainie.
Čytajcie jašče:
«Vahnier» nibyta zachapiŭ Saladar. Va USU abviarhajuć, u Kramli prosiać čakać aficyjnych źviestak
ISW: Zachop Saladara nie aznačaje akružeńnia Bachmuta
CNN: Rasija skaraciła intensiŭnaść artabstrełaŭ, miescami na 75%
