Fota: Evgeniy Maloletka, AP
Amierykanskija i ŭkrainskija aficyjnyja asoby paviedamili ahienctvu CNN, što za 11 miesiacaŭ vajny va Ukrainie artyleryjski ahoń z rasijskaha boku rezka skaraciŭsia ŭ paraŭnańni z pačatkam kanfliktu. U niekatorych miescach vykarystańnie rasijskaj artyleryi źniziłasia až na cełych 75 pracentaŭ.
U ZŠA i Ukrainie pakul nie majuć kankretnaha albo adnaznačnaha tłumačeńnia padobnaj źjavy. Rasija moža prosta narmiravać artyleryjskija snarady praź niedachop zapasaŭ, albo heta moža być častkaj bolš šyrokaj pieraacenki vajennaj taktyki z-za paśpiachovych kontrnastupaŭ ukrainskaj armii.
Pavodle acenak ZŠA, kolkaść vypuščanych Rasijaj artyleryjskich snaradaŭ źniziłasia ŭ siarednim z 20 000 strełaŭ u dzień da prykładna 5000 strełaŭ u dzień. Pa acenkach Ukrainy, hety pakazčyk źniziŭsia z 60 000 da 20 000 u dzień. Ale abiedźvie acenki pakazvajuć na anałahičnuju tendencyju źnižeńnia intensiŭnaści rasijskich artyleryjskich abstrełaŭ.
«U lubym vypadku, heta dziŭnaje źnižeńnie artyleryjskich abstrełaŭ źjaŭlajecca jašče adnym śviedčańniem usio bolšaha pasłableńnia pazicyi Rasii na poli boju amal praz hod paśla jaje vajennaha ŭvarvańnia va Ukrainu», — paviedamili CNN pradstaŭniki ZŠA i Ukrainy.
Padobnaja źjava taksama źviazanaja z uzmacnieńniem vajskovaj padtrymki Ukrainy z boku jaje zachodnich sajuźnikaŭ. ZŠA, Francyja, Hiermanija, Vialikabrytanija i Polšča niadaŭna abviaścili, što jany ŭpieršyniu daduć ukrainskim siłam bajavyja braniavyja mašyny, a Hiermanija taksama pahadziłasia pieradać Ukrainie jašče adzin zienitny rakietny kompleks Patriot, jaki dapamoža joj abaranić svaju pavietranuju prastoru.
Da niadaŭniaha času pytańni mahčymaha deficytu rasijskaha bajavoha arsienału tyčylisia tolki vysokadakładnych kryłatych i balistyčnych rakiet. Ale pa źviestkach aficyjnych asob ZŠA, rezka źmienšanaja chutkastrelnaść rasijskaj artyleryi moža taksama śviedčyć pra toje, što zaciažnyja i žorstkija bai akazali značny niehatyŭny ŭpłyŭ na zapasy zvyčajnych uzbrajeńniaŭ Rasii.
Aficyjnyja asoby ZŠA ŭ jakaści prykładu rasijskaha arsienalnaha hoładu taksama pryvodziać pieradaču Iranam dronaŭ-kamikadze, a taksama tajemnyja pastaŭki z Paŭnočnaj Karei artyleryjskich bojeprypasaŭ i rakiet, padčas jakich Paŭnočnaja Kareja sprabavała stvaryć uražańnie, byccam snarady iduć nie ŭ Rasiju, a ŭ krainy Blizkaha Uschodu ci Paŭnočnaj Afryki. Pra toje, što Rasija, na dumku vyviedki ZŠA, znachodzicca ŭ pracesie zakupki miljonaŭ rakiet i artyleryjskich snaradaŭ u Paŭnočnaj Karei, jašče raniej paviedamlali CNN i inšyja suśvietnyja ŚMI.
«Choć Rasija pa-raniejšamu maje bolš artyleryjskich bojeprypasaŭ, čym Ukraina, rannija acenki ZŠA značna pieraacanili ich kolkaść i jakaść, a taksama nie praličyli, nakolki dobra ŭkraincy spraviacca z udarami pa rasijskich łahistyčnych abjektach»,
— zajaviŭ nienazvany amierykanski vajskovy pradstaŭnik.
