Piśmieńnica płanavała naviedać Pinsk, dzie ŭ mižvajenny pieryjad žyli i pracavali jaje dziady, a taksama pabačyć miaściny, źviazanyja ź viadomym polskim reparcioram Ryšardam Kapuścinskim, jaki naradziŭsia ŭ Pinsku. U Minsku Volny płanavała sustrecca ź biełaruskimi pravaabaroncami i intelektuałami.
U Pinsk Maja Volny jechała aŭtobusam z Varšavy. U Breście ŭ jaje pačalisia prablemy.
«Biełaruskaja pamiežnica doŭha razhladała moj pašpart, raspytvała pra metu pajezdki. Potym skazała, kab ja pačakała ŭ nievialikaj kabincy. Pamiežniki zabrali moj pašpart i doŭha pra niešta razmaŭlali, a mnie skazali čakać i nie ruchacca. Potym, paśla 23:00, pryjšoŭ inšy pamiežnik i začytaŭ mnie pastanovu pra toje, što ŭ vyniku rašeńnia ŭładaŭ RF mnie zabaronieny ŭjezd na 20 hadoŭ», — raskazała «Radyjo Svaboda» Maja Volny.
Pryčynu biełaruski pamiežnik nie paviedamiŭ, spasłaŭšysia na toje, što ŭ biełaruskaj kampjutarnaj sistemie jana «nie bačnaja». Paśla žančynu paprasili zabrać rečy z aŭtobusa i pasadzili ŭ lehkavy aŭtamabil z tryma mužčynami.
«Mnie skazali, što tolki tak ja mahu viarnucca ŭ Polšču. Ja sieła ŭ mašynu i tolki tady mnie viarnuli pašpart. Mužčyny, biełarusy, dapamahli mnie pierajści miažu na polski bok», — skazała Volny.
Polcy zabaranili naviedvać Biełaruś da 30 listapada 2042 hoda. Raniej pra takija vialikija terminy zabarony na ŭjezd publična nie paviedamlałasia. Prava naviedvać Biełaruś abmiažoŭvałasia maksimalna na 10 hod.
U minułym hodzie polskaja piśmieńnica šmat padarožničała pa Rasii, źbirajučy materyjał dla novaj knihi. Jana ličyć, što zabarona z boku RF moža być źviazanaja ź jaje krytyčnymi vykazvańniami ŭ sacyjalnych sietkach i admovaj dać intervju telekanału Russia Today za niekalki tydniaŭ da Novaha hoda.
«U toj samy čas u Rasii pierakłali i apublikavali inšaje intervju sa mnoj, dzie ja razvažała pra stan rasijskaha hramadstva. Paśla hetaha na mianie pasypałasia masa hnieŭnych kamientaroŭ, a tuju razmovu ŭ vyniku vydalili z sajta», — raskazała piśmieńnica «Radyjo Svaboda».
Maja Volny — piśmieńnica, reparciorka, doktarka humanitarnych navuk. Pačynała pracavać u redakcyi kultury polskaha tydniovika Polityka. Pracavała dyrektarkaj muzieja ŭ Bielhii i ahladalnicaj najvažniejšaha fłamandskaha infarmacyjnaha sajta VRT. Aŭtarka siami mastackich ramanaŭ i dźviuch knih non-fikšn.
