Siońniašniaja biełaruskaja stalica viečarami bolš nahadvaje horad, jaki pakinuli amal usie žychary. Vulicy ŭ centry viečarami vyhladajuć, jak u fantastyčnych filmach: iluminacyja pracuje va ŭsiu moc, a ludziej mała. Heta zusim nie dziŭna, kali viedać situacyju ŭ krainie i ŭ samim Minsku.
Ale jość adno miesca ŭ horadzie, dzie žyćcio viruje, — heta aŭtavakzał «Centralny». Architektary ŭ svoj čas pastaralisia, kab płatformy byli «schavanyja» ŭ prastory pamiž budynkami handlovaha centra i samoha aŭtavakzała. Ciapier tam tudy-siudy chodziać natoŭpy ludziej z čamadanami i sumkami. Uvieś čas prybyvajuć i adjazdžajuć aŭtobusy, kantralory kala ich praviarajuć kvitki, plaskajučy, adčyniajucca i začyniajucca bahažnyja adździaleńni, a pa hučnaj suviazi niaspynna abjaŭlajuć usio novyja i novyja prybyćci i adpraŭleńni…
Nikoli raniej minski aŭtavakzał nie bačyŭ ničoha padobnaha. Mižnarodnyja aŭtobusy adpraŭlajucca praktyčna va ŭsie jeŭrapiejskija krainy. I nie tolki ŭ ich stalicy. U adnoj tolki Hiermanii heta niekalki haradoŭ — i Bierlin, i Frankfurt, i Karłsrue, i Bilefield, i Štuthart, i Hamburh, i Oldenburh. Što ŭžo tady kazać pra susiedniuju Polšču? Tolki ŭ Varšavu adpraŭlajecca štodzień nie mienš jak 10 rejsaŭ. Z Centralnaha vakzała možna dajechać aŭtobusam taksama ŭ Ščecin, Urocłaŭ, Łodź, Poznań, Krakaŭ, Hdańsk… I heta jašče nie poŭny pieralik. U Niderłandy taksama možna zaraz adpravicca: i ŭ stalicu krainy Amsterdam, i na poŭdzień — u Raterdam.
Pryčyna takoha rezkaha ažyŭleńnia zrazumiełaja: pavietrany bajkot Biełarusi paśla prymusovaj pasadki samalota z Pratasievičam i Sapiehaj i adsutnaść čyhunačnych znosin z krainami Jeŭrasajuza. Ci možna kazać, što aŭtamabilny ruch raźvivaŭsia hetak ža imkliva, jak i pavietrany bajkot? Hledziačy na siońniašniaje kipučaje žyćcio Centralnaha aŭtavakzała, musić, možna.
Ciapier ź Minska možna lotać tolki ŭ rasijskija Maskvu, Sankt-Pieciarburh, Sočy, Kalininhrad, Kazań i Jekaciarynburh dy jašče ŭ Stambuł, Dubaj, hruzinskija Tbilisi, Batumi i Kutaisi, a taksama ŭ stalicy Kazachstana, Uźbiekistana, Armienii, Azierbajdžana i Turkmienistana. Voś taki karocieńki raskład. Kitajskija ijerohlify naŭrad ci mohuć dapamahčy nadać aeraportu choć jakuju-niebudź reśpiektabielnaść.
Čaho, viadoma, nie skažaš pra aŭtavakzał. Tam na tabło tolki paśpiavajuć mianiacca nazvy haradoŭ. Siońnia dastatkova pravieryć, ci niama abmiežavańnia na vyjezd z krainy, mieć vizu ŭ pašparcie i kupić bilet, kab adpravicca ŭ nieabchodny horad u Estoniju, Łatviju, Litvu, Polšču, Hiermaniju, Čechiju, Italiju… Aŭtobusy iduć pa 20 mižnarodnych napramkach. Chto b moh sabie takoje ŭjavić raniej?
I heta pry tym, što ŭnutranyja rejsy pa krainie skaračajucca. Siońnia z Centralnaha aŭtavakzała aŭtobusy iduć pa 114 mižharodnich maršrutach. U niekatoryja rajonnyja centry kolkaść ich pamienšała. Jość nasielenyja punkty, u jakija aŭtobusy ŭvohule admianili albo jany chodziać tudy raz na tydzień. Nierentabielna. Heta hałoŭnaja pryčyna, jakuju možna pačuć u apraŭdańnie. Nieviadoma, z hetaj pryčyny albo ź inšaj mižharodniaja kasa na aŭtavakzale pracuje da 21 hadziny. Paźniej pa kvitok na ŭnutrany rejs možna źviartacca ŭ mižnarodnuju kasu. Tam adrazu kidajecca ŭ vočy, što ŭ akienca patencyjnyja pasažyry razam z hrašyma praciahvajuć i pašpart.
Viadoma, u krainy Jeŭrasajuza možna adpravicca i ź luboha abłasnoha horada. Ale tam, zrazumieła, mienš takich maršrutaŭ. Naprykład, z Mahilova možna bieź pierasadki dajechać da Varšavy, Ščecina, u Vilniu i ŭ Ryhu. A z Homiela — u Varšavu i Kioln. Tamu asnoŭny patok pasažyraŭ prypadaje na Centralny aŭtavakzał stalicy.
Aŭtobusy iduć u krainy Jeŭrasajuza zapoŭnienyja. Achvotnych kudyści adpravicca nie stanovicca mienš. Naadvarot. Tamu źjaŭlajucca ŭsio novyja i novyja maršruty. Treba nie zabyvać, što aproč hetaha ŭ aeraporty Litvy i Polščy kursujuć šmatlikija tranśfiery.
Mnohija ŭładalniki aŭtamabilaŭ addajuć pieravahu padarožžu aŭtobusam praz čerhi na miažy. Aŭtobus dakładna nie pratrymajuć bolš za 11 hadzin. Usio ž jon prytrymlivajecca raskładu. A pracedura pravierki dakumientaŭ i bahažu nikomu nie padabajecca, ale ad hetaha nikudy nie padzieniešsia. Ciarpiać ludzi, ciarpiać i sabaki z katami, jakich usio čaściej možna zaŭvažyć u aŭtobusach sa svaimi haspadarami.
Kab upeŭnicca, ci chočuć biełarusy ŭbačyć śviet i ci majuć mahčymaść naviedać jeŭrapiejskija harady, atrymać tam adukacyju, cikavuju pracu, prosta prahulacca, naviedać vystavy i muziei, prajścisia pa kramach, kupić suvieniry i prosta jakasnyja rečy — treba prosta pryjści na Centralny aŭtavakzał Minska i krychu panazirać za tym, što tam adbyvajecca.
