Ź pieršaha dnia vajny rasijskaja słužba Bi-bi-si sumiesna z vydańniem «Miedyjazona» i kamandaj vałancioraŭ viadzie pajmienny śpis strat rasijskich vajskoŭcaŭ va Ukrainie. Na 6 studzienia ŭdałosia paćvierdzić infarmacyju ab 11 009 zahinułych sałdatach i aficerach.
Adnak žurnalisty miarkujuć, što śpis moža ŭtrymlivać, prynamsi, na 40—60 pracentaŭ mienš imionaŭ zahinułych, čym realna pachavana ŭ Rasii. Da takoj vysnovy pryjšli, vyvučajučy abstanoŭku na mohiłkach u bolš čym 60 rasijskich nasielenych punktach.
Takim čynam, pa najbolš kansiervatyŭnaj acency, straty rasijskaj armii i Rashvardyi va Ukrainie mohuć składać bolš za 22 tysiačy čałaviek.
Ahulnyja biezzvarotnyja straty Rasii (heta značyć kolkaść tych, chto vybyŭ pa pryčynie ranieńnia, śmierci abo prapaŭ bieź viestak) mohuć składać, prynamsi, 99 tysiač čałaviek.
Hetaja ličba atrymana na asnovie nazirańniaŭ Centra vajskova-marskoha analizu ZŠA, zhodna ź jakimi na kožnaha zahinułaha rasijskaha vajskoŭca padčas vajny va Ukrainie prypadaje ŭ siarednim kala troch z pałovaj paranienych. U hetuju ličbu nie ŭvachodziać tyja, chto vajavaŭ na baku Rasii ŭ składzie «narodnych milicyj» Daniecka i Łuhanska.
Z adkrytych krynic viadoma ab śmierci 539 mabilizavanych rasijan. U hety lik nie ŭvachodziać vajskoŭcy, jakija zahinuli pry abstrele Makiejeŭki 1 studzienia.
Da 3 studzienia 2023 hoda Minabarony Rasii pryznała hibiel 89 rasijan u Makiejeŭcy (zhadka pra toje, što jany byli mabilizavanymi, była ŭ pieršym paviedamleńni, ale potym źnikła). I ŭkrainskija žurnalisty, i rasijskija pravajennyja błohiery kažuć, što kolkaść zabitych moža iści na sotni. Tak jak proźviščy zahinułych pakul nie viadomyja, hetyja źviestki nie ŭličvajucca ŭ padlikach.
Adnak na asnovie adkrytych danych udałosia ŭstanavić imiony 500 mabilizavanych, jakija zahinuli ŭ zonie bajavych dziejańniaŭ na terytoryi Ukrainy, pačynajučy z kastryčnika. Jašče 39 pamierli na terytoryi Rasii — čaściej za ŭsio, jak śćviardžajecca, praz prablemy z sercam, z pryčyny niaščasnych vypadkaŭ abo praz złoŭžyvańnie ałkaholem.
Kolkaść rasijan, jakija pamirajuć na punktach zboru dla mabilizavanych, praciahvaje raści. Za apošnija dva tydni viadoma ab troch vypadkach śmierci ŭ centrach padrychtoŭki mabilizavanych na terytoryi Rasii.
Realnyja straty siarod mabilizavanych mohuć być značna vyšejšyja, bo ŭ mnohich paviedamleńniach pra sałdat, jakija zahinuli va Ukrainie, pačynajučy z kastryčnika, nie pakazvajecca ich status. Z-za hetaha časam niemahčyma zrazumieć, słužyŭ mužčyna kantraktnikam, pajšoŭ na front dobraachvotnikam ci byŭ mabilizavany.
Pavodle raskazaŭ samich mabilizavanych, ich padraździaleńni praciahvajuć nieści istotnyja straty pa šerahu pryčyn, siarod jakich intensiŭnyja i dakładnyja artyleryjskija abstreły z boku Ukrainy, drennaja kaardynacyja dziejańniaŭ roznych atradaŭ rasijskich vajskoŭcaŭ, prablemy z suviaźziu i kartami, a taksama niedastatkovaja padrychtoŭka.
