Kadr ź filma «Ramea i Džuljeta» režysiora Franka Dzefireli
Dźvie zorki kinaviersii Šekśpiravaj trahiedyi «Ramea i Džuljeta», jakaja była ekranizavanaja ŭ 1968 hodzie režysioram Franka Dzefireli, padali ŭ sud na Paramount Pictures na sumu bolš za 500 miljonaŭ dalaraŭ, śćviardžajučy, što jany padvierhlisia seksualnaj ekspłuatacyi padčas zdymak aholenaj sceny ŭ filmie, kali jany byli jašče padletkami. Pra heta piša The Wall Street Journal.
Alivija Chasi syhrała Džuljetu, kali joj było ŭsiaho 15 hadoŭ, a Leanardu Uajtynhu, jaki syhraŭ Ramea, było 16. Ciapier im abaim za 70 hadoŭ, i jany śćviardžajuć, što kinakampanija Paramount zajmajecca machlarstvam, seksualnym hvałtam i damahańniami. Adpaviednaja skarha była ŭžo imi padadziena ŭ Viarchoŭny sud akruhi Łos-Andželes štata Kalifornija.
Pavodle skarhi, Franka Dzefireli, jaki pamior u 2019 hodzie, kazaŭ akcioram, što jany padčas sceny filma ŭ spalni buduć apranutyja ŭ adzieńnie cialesnaha koleru. Ale ŭžo ŭ dzień zdymak Dzefireli paviedamiŭ, što zaraz jany buduć nanosić kaśmietyku dla cieła, a kamiera budzie raźmieščana takim čynam, kab nie było vidać ich aholenych ciełaŭ. Adnak niepaŭnaletnija akciory byli ŭviedzienyja ŭ zman, ich źniali aholenymi bieź ich viedama, što parušała fiederalnyja i miascovyja zakony.
Adkazčyki pa danym pazovie pavodzili siabie niesumlenna i tajemna zdymali aholenych abo častkova aholenych niepaŭnaletnich dziaciej bieź ich viedama i zhody. Viedańnie i paŭtornaje vykarystańnie seksualnych vyjaŭ i scen ź niepaŭnaletnimi dziećmi niedapuščalnaje ŭ našym hramadstvie i pavinna być vykaraniena, havorycca ŭ pazovie.
Režysior skazaŭ Alivii Chasi i Leanardu Uajtynhu, što film pravalicca biez hetaj sceny, a heta naškodzić ich karjery. Aboje akciory paśla zajavili, što ŭ ich nie było inšaha vybaru, akramia jak źniać scenu aholenymi z hrymam.
Paramount Pictures pakul što nijak nie kamientavaŭ presie hetaj spravy. Fond Franka Dzefireli — arhanizacyja, pryśviečanaja spadčynie režysiora — taksama nijak nie prakamientavaŭ situacyju.
Jak by kinastudyja ni imknułasia skazić sens zdareńnia, heta, pa sutnaści, parnahrafija, padkreślivajecca ŭ skarzie.
Fota: Jean-Jacques, AP
Alivii Chasi i Leanardu Uajtynhu raniej było zabaroniena padavać jakija-niebudź pazovy ŭ suviazi ź incydentam, bo termin daŭnaści zdareńnia skončyŭsia. Ale ŭ 2019 hodzie ŭ Kalifornii byŭ pryniaty zakon, jaki na trochhadovy pieryjad admianiaje termin daŭnaści za seksualny hvałt u dziacinstvie. Heta trochhadovaje akno skončyłasia ŭ kancy 2022 hoda, i niezadoŭha da ŭstanoŭlenaha termina było padadziena mnostva pazovaŭ suprać Rymska-katalickaj carkvy i inšych arhanizacyj.
Sami akciory, pavodle skarhi, adčuvali dušeŭnyja pakuty i emacyjny stres z momantu vychadu filma. Film ža ŭ svoj čas akazaŭsia paśpiachovym i byŭ naminavany na čatyry premii Oskar. U toj samaj paścielnaj scenie ŭ kinakarcinie ŭ kadr papali hołyja hrudzi Alivii Chasi i hołyja jahadzicy Leanarda Uajtynha.
