Rasijski vajskovy abjekt u Makiejeŭcy paśla ŭdaru ŭkrainskaj artyleryi ŭnačy z 31 śniežnia na 1 studzienia. Fota: sacyjalnyja sietki
U navahodniuju noč Rasija tradycyjna sprabavała atakavać abjekty infrastruktury va ŭkrainskaj stalicy i abłasnych centrach. Ukrainskaje kamandavańnie zajaviła, što ŭsie 45 dronaŭ nad roznymi abłaściami krainy źbityja.
Vybuchi hučali ŭ tym liku i ŭ Kijevie. Žurnalisty hetym razam nie paviedamlajuć pra surjoznyja nastupstvy. Miarkujučy pa ŭsim, usie drony byli źbityja na padlocie da ŭkrainskaj stalicy.
U toj ža čas z paviedamleńniaŭ rasijskich vajenkaraŭ vynikaje, što rasijskaja armija paniesła surjoznyja straty blizka ad linii frontu.
«Napeŭna, sapsuju čytačam navahodni nastroj, ale pavinien pryznać, što … trahiedyi ź dziasiatkami zahinułych nie vučać hetych debiłaŭ z dypłomami vajskovych vučelniaŭ i akademij. Tut nie napišaš, što mienavita padšturchnuła napisać hetyja radki, ale tyja, chto ŭ temie, viedajuć», — napisaŭ siońnia vajenkar Uładlen Tatarski.
«Cikava, za chałatnaść, tuparyłaść i pafihizm niekatorych hienierałaŭ, jakija pryvodziać da surjoznych nastupstvaŭ i hibieli bajcoŭ nie tolki na pieradavoj, ale i ŭ tyle, chto-niebudź kali-niebudź adkaža pierad zakonam?» — paŭtaraje za im vajenkar Biassonaŭ.
Nijakaj infarmacyi ŭ aficyjnych rasijskich ŚMI, što ž zdaryłasia, niama.
Jany abmiežavalisia paviedamleńniem, što ŭkrainskaja artyleryja naniesła ŭdar pa špitali pryfrantavoha horada Pieršamajska, dzie nibyta zahinuli šeść čałaviek — infarmacyja rasijskich ŚMI ź linii frontu zvyčajna adroźnivajecca krajniaj niedakładnaściu. Infarmacyju pra ŭdar u Pieršamajsku dla RIA «Novosti» prakamientavaŭ kiraŭnik pryvatnaj vajskovaj kampanii «Vahnier» Jaŭhien Pryhožyn.
U toj ža čas u miascovych čatach pišuć, što ŭkrainskaja artyleryja naniesła ŭdar pa vučyliščy ŭ Makiejeŭcy pad Danieckam, dzie raźmiaščalisia rasijskija sałdaty. My sabrali niekalki skrynšotaŭ.
Miascovyja žychary havorać pra sotni achviar — infarmacyja, jakuju niemahčyma paćvierdzić. Takaja kolkaść achviar mahčymaja tolki ŭ vypadku, kali ŭ budynku raźmiaščałasia vielmi šmat vajskoŭcaŭ adnačasova, što było b krajnie ryzykoŭna.
Błohier Anatol Šaryj śćviardžaje, što ŭ Makiejeŭcy zahinuli sotni rasijskich vajskoŭcaŭ.
Telehram-kanał supernova_plus pakazvaje, jak budynak vučylišča vyhladaŭ da ŭdaru i paśla ŭdaru.
Jaŭhien Pryhožyn 1 studzienia čamuści paličyŭ patrebnym apubličyć šakujuča naturalistyčnaje videa svajho vizitu ŭ morh, kudy zvoziać zahinułych rasijskich bajcoŭ.
«Ich kantrakt zakončany. Pajeduć damoŭ — praz tydzień. U Novy hod usie pracujuć», — skazaŭ Pryhožyn, havoračy z žurnalistami, jakich pryvioz z saboj, u pamiaškańni, napoŭnienym čornymi płastykavymi miachami ź ciełami.
Jaŭhien Pryhožyn padčas navahodniaha vizitu ŭ morh. 1 studzienia 2023 hoda. Skrynšot ź videa
«Jaŭhien Viktaravič, a chto tut lažyć?» — pytajecca čałaviek za kadram.
«Tut lažać bajcy PVK «Vahnier», jakija zahinuli na froncie. I jakich z pašanaj zaraz adviazuć, pakładuć u cynk i paviazuć damoŭ. Jakija zahinuli hieraična», — skazaŭ Pryhožyn.
«Vahnier» farmalna ličycca pryvatnaj kampanijaj, ale faktyčna stvorany i dziejničaje pry Hałoŭnym raźviedupraŭleńni Hienštaba rasijskaj armii, a sam Pryhožyn — asabliva nabližany da Uładzimira Pucina pradprymalnik, jaki dziakujučy hetamu staŭ miljarderam. Ën staŭ adyhryvać asablivuju rolu ŭ vajnie va Ukrainie paśla taho, jak rehularnaja rasijskaja armija pakazała svaju nizkuju bajazdolnaść i matyvacyju. Pryhožyn zrabiŭ staŭku na viarboŭku źniavolenych u turmach, a vajavać svaich bajcoŭ matyvuje kaśmičnymi pa rasijskich mierkach zarobkami.
Niadaŭna Pryhožyn abaraniaŭ dvuch svaich bajcoŭ, jakija zapisali zvarot, u jakim brudnym kryminalnym słenham hanili kiraŭnika Hienštaba Rasii hienierała Valeryja Hierasimava za deficyt bojeprypasaŭ na froncie.
Rasijski šavinistyčny vajenkar Biassonaŭ paźniej dadaŭ u siabie ŭ kanale: «Z nahody ŭdaru pa Makiejeŭskim PTV. Miascovyja paviedamlajuć, što ŭdar byŭ naniesieny roŭna ŭ 00:01 pa našym časie. Pa maich źviestkach praciŭnik čarhovy raz užyŭ amierykanskuju RSZA «Chajmars». Miarkujučy pa ŭsim, vysokaje kamandavańnie da hetaha času nie ŭ kursie ab mahčymaściach hetaj zbroi. Spadziajusia, što vinavatyja, jakija prymali rašeńnie pa vykarystańni hetaha abjekta, buduć pakaranyja».
Jašče paźniej rasijskija ŚMI paćvierdzili, što a 23:58 31 śniežnia ŭkrainskaja artyleryja naniesła źniščalny ŭdar pa budynku PTV u Makiejeŭcy, dzie raźmiaščalisia vajskoŭcy, mabilizavanyja z Sarataŭskaj vobłaści.
«Jość zahinułyja i paranienyja, dakładnaja ich kolkaść pakul nieviadomaja», piša Readovka, blizkaja da PVK «Vahnier».
Poŭnaje źniščeńnie abjekta vajenkary tłumačać tym, što ŭ im zachoŭvaŭsia taksama i bojekamplekt.
Čytajcie taksama: «Ty pi*ar». Vahnieraŭcy źviarnulisia da načalnika Hienštaba RF
