Traciak u kadry ŭ łukašenkaŭskim mierčy
Taćciana Traciak naradziłasia ŭ 1992 hodzie. U jaje redkaje imia pa baćku — Fieliksaŭna. U sacsietkach Fieliksa Traciaka napisana, što jon pracuje ci, prynamsi, pracavaŭ raniej u ahienctvie nieruchomaści «Tvaja Stalica».
Taćciana pastupała ŭ BDU na śpiecyjalnaść «Palitałohija», ale potym pieradumała i pieraviałasia na «Pravaznaŭstva». Skončyła jurfak. Tam ža pačynała pieršyja sproby ŭ žurnalistycy.
«Aktyŭnych studentaŭ VNU ŭsialak zaachvočvaje ŭ tym liku i materyjalna. Adnak chaciełasia b vieryć, što hramadskaje žyćcio zacikavić ciabie pieradusim svajoj sutnaściu, a nie materyjalnym składnikam», — fiłasofstvavała studentka ŭ adnoj sa svaich publikacyj.
Taćciana Traciak časoŭ univiera. Tut i dalej — fota z sacyjalnych sietak Taćciany Traciak
Paźniej jana stała kiraŭnikom studenckaj kuratarskaj słužby na jurfaku — instytuta mientarstva starejšych nad małodšymi. Heta naturalna dla luboha kalektyvu, ale ŭ Biełarusi takija arhanizacyi padmianiajuć realnuju studenckuju aktyŭnaść butaforskaj. Varta adznačyć, što jurfak zaŭsiody byŭ krynicaj kadraŭ u tym liku dla śpiecsłužbaŭ i siłavych struktur.
Aproč pasady kiraŭnika kuratarskaj słužby Traciak ničym nie vyłučałasia.
Traciak krajniaja sprava
U 2016-m, paśla zakančeńnia VNU, dziaŭčyna akazałasia na rabocie ŭ Respublikanskim centry alimpijskaj padrychtoŭki pa lohkaj atletycy. Juryskonsultam.
Tady ž vyjšła zamuž za lohkaatleta, jaki byŭ dobra znajomy z eks-kiraŭnikom Biełaruskaj fiederacyi lohkaj atletyki Vadzimam Dzieviatoŭskim (praŭda, ź jaje słoŭ u sacsietkach, pieršy šlub doŭha nie pratrymaŭsia). I nieŭzabavie pačałosia cikavaje.
U 2018-m učarašniaja studentka zajmieła dyrektarskuju piačatku ŭ HA «Biełaruskaja fiederacyja lohkaj atletyki», staŭšy vykanaŭčym dyrektaram. A taksama stała staršynioj apiakunskaj rady tam ža.
«Vadzimam Dzieviatoŭskim była prapanavanaja kandydatura viadučaha juryskonsulta HA «BFŁA» Traciak Taćciany Fieliksaŭny, na jakuju buduć uskładzieny abaviazki pa arhanizacyi pasiadžeńniaŭ apiakunskaj rady i viadzieńni spravavodstva. Piarečańniaŭ nie było. Usie členy rady prahałasavali «za», — takuju stenahramu «vybaraŭ» Traciak pamiataje internet.
Vadzim Dzieviatoŭski, jaki byŭ kiraŭnikom fiederacyi, ścipła advioŭ sabie pasadu namieśnika Traciak u apiakunskaj radzie.
Navošta Dzieviatoŭskamu spatrebiłasia stavić jurystku biez praktyki na pasadu kiraŭnika finansami, a samomu adychodzić u cień — pytańnie biez adkazu.
Uvohule, u Biełarusi rašeńniem Łukašenki isnuje sistema: pry vypłacie padatkaŭ pradpryjemstvy mohuć lehalna niejkuju častku padatkaŭ nakiroŭvać nie ŭ biudžet, a naŭprost u spartyŭnuju fiederacyju. Zroblena heta nibyta dla padtrymki sportu.
I chacia efiektyŭnaść rašeńnia z pazicyi spartovych vynikaŭ sumnieŭnaja, u finansavym sensie niekatoryja fiederacyi napoŭnienyja hrašyma sponsaraŭ. Raźmiarkoŭvajuć ich pa-roznamu.
Mahčyma, u fiederacyju Traciak pryvioŭ jaje pieršy muž, jaki zachaplajecca bieham i daŭno znajomy ź Dzieviatoŭskim.
Dzieviatoŭski taksama zrabiŭ Traciak svajoj pamočnicaj, kali byŭ deputatam Pałaty pradstaŭnikoŭ.
Infarmacyja na sajcie Dzieviatoŭskaha nie mianiałasia
Atleta, ziemlaka Kačanavaj, vykinuli z pasady paśla taho, jak jon razam z bratam i jašče dziasiatkami tysiač represavanych prajšoŭ praz Akreścina i impulsiŭna vykazaŭsia pra Alaksandra Łukašenku.
Prykładna na hetym ža momancie spyniłasia i historyja Traciak u Fiederacyi lohkaj atletyki i ŭ Pałacie pradstaŭnikoŭ.
Vosieńniu 2020-ha dziaŭčyna pajšła pracavać u ciemrašalskuju «Minskuju praŭdu».
«Mnie pa dušy pisać ab aktualnym i sacyjalnym: tak atrymlivajecca lepš daviedvacca pra žyćcio svajho rehijona, razumieć prablematyku znutry. Pracuju ŭ redakcyi nie tak daŭno, tamu z prajektam mary nie vyznačyłasia. Dypłamavany juryst časam nahadvaje pra siabie — chočacca napisać materyjał na pravavuju tematyku, ab źmienach u zakanadaŭstvie», — pradstaŭlałasia jana ŭ listapadzie 2020-ha na staronkach łukašenkaŭskaj ahitki.
Ale mary nie spraŭdzilisia — zamiest napisańnia tekstaŭ ab prablemach Taćciana pierajšła da zamoŭlenych «psichałahičnych partretaŭ» lidaraŭ pratestu ŭ «Minskaj praŭdzie», a potym časam źjaŭlałasia na ANT.
U vyniku Traciak apynułasia na kanale HUBAZiKa.
U svaim zakrytym instahramie jana demanstruje «bahaty» styl žyćcia. Kino lubić hladzieć u «Falkonie», viačerać — u «Lebiadzinym», zaharać — u Dubai, pravodzić uikend — u Maskvie, a katajuć jaje ŭ mašynie, čyj interjer padobny da «Tesły», pryčym z bukietam u biełaruskich, a nie łukašysckich kolerach.
Zabaŭna, što siarod tych, chto stavić Traciak łajki — ministr sielskaj haspadarki Ihar Bryło.
HUBAZiK — struktura, jakaja stvarałasia dla baraćby z arhanizavanaj złačynnaściu i karupcyjaj, paśla 2020-ha pieratvaryłasia ŭ faktyčna palityčnuju palicyju, praź jakuju prajšli tysiačy palityčnych praciŭnikaŭ dyktatarskaha režymu Alaksandra Łukašenki i prosta ludziej, jakija mieli nieaściarožnaść vystupić ci vykazacca. Struktura taksama adznačyłasia baraćboj ź biełaruskaj kulturaj i simvałami, a paśla napadu Rasii na Ukrainu — taksama i z antyvajennym rucham.
U svaich jutub-ahladach Traciak raskazvaje pra zatrymanych pa «ekstremisckich» spravach za tydzień.
Vychodziać jany, zrazumieła, pa-rusku. U HUBAZiKu panuje sumieś ideałohij ruskaha šavinizmu i łukašyzmu.
«Nadziei pravaparušalnikaŭ na rańni padjom pa budzilniku, a nie ad stuku ŭ dźviery rastajuć chutčej, čym śniežański śnieh, bo ŭ HUBAZiKa ciapier haračy pieryjad», — voś styl jaje vypuskaŭ.
Viadučaja kakietliva nadzimaje nienaturalnyja vusny. Praź niekalki siekund u kadry źjaŭlajecca čałaviek, jakoha trymajuć na kaleniach i zdymajuć źvierchu ŭniz, paśla jaho ž pakazvajuć z zaviazanym na hałavie biełaruskim ściaham.
