Padčas zvanka va ŭpraŭleńnie žurnalist «Fłahštoka» nazvaŭsia baćkam dziciaci, jaki vučycca ŭ adnoj z homielskich škoł. Hałoŭny śpiecyjalist adździeła vychavaŭčaj i sacyjalnaj raboty Śviatłana Łučkova paćvierdziła, što zabarony sapraŭdy isnujuć. Ich padrabiaznaści baćkam pavinny raskazać padčas najbližejšaha baćkoŭskaha schodu.
Pry hetym kankretnaha śpisu rekamiendacyj čynoŭnica ahučyć nie zmahła:
«Ja mahu vam skazać, što heta, viadoma ž, hieroi multfilmaŭ, jakija raspaŭsiudžanyja na ahulnanacyjanalnym telebačańni. Heta hieroi biełaruskich i ruskich narodnych kazak. Ale nie impartnyja hieroi, jakija nie adpaviadajuć biełaruskim kaštoŭnaściam. Čałaviek-pavuk — heta nie biełaruski hieroj».
Na ŭdakładniajučaje pytańnie ab tym, jakoje dačynieńnie da biełaruskich kaštoŭnaściaŭ majuć rasijskija hieroi, čynoŭnica paviedpmiła, što ŭ hetym vypadku havorka idzie pra hierojaŭ savieckich multfilmaŭ.
Čynoŭnica z upraŭleńnia adukacyi taksama paćvierdziła, što śviatkavańnie Chełoŭina ŭ biełaruskich škołach z hetaha času budzie zabaroniena:
«Chełoŭiny ŭ dziaržaŭnych ustanovach nie pravodziacca. U suviazi z tym, što ŭsio ž taki pravodzilisia Chełoŭiny, ale nie jak hramadskaje, hrandyjoznaje mierapryjemstva, pravodzić hetyja «śviaty» nie dazvolena».
Adkaznaść za praviadzieńnie zabaronienych śviataŭ i vybar «pravilnych» dziciačych kaściumaŭ, pa słovach čynoŭnicy, budzie ŭskładziena na kiraŭnikoŭ ustanoŭ adukacyi.
U liście, razasłanym Žłobinskim adździełam adukacyi, paznačana, što zabarona pravodzicca na padstavie daručeńnia Savieta Ministraŭ, zroblenaha 30 listapada 2022 hoda. A tamu da takich mier, jak vyhladaje, padšturchnuŭ danos sumna viadomaj hrodzienskaj aktyvistki Volhi Bondaravaj i inšych padobnych dziejačaŭ. Raniej prachodziła infarmacyja, što jana pačała vajnu z Chahi Vahi.
