Skrynšot: klip Mariah Carey — All I Want for Christmas Is You
O Holy Night
O Holy Night («O śviataja noč») — kłasičnaja kaladnaja pieśnia, jakuju pierapiavali dziasiatki viadomych śpievakoŭ. Muzyku da jaje napisaŭ kampazitar baleta «Žyzel», hetaja pieśnia stała pieršaj, što prahučała pa radyjo, i, pa lehiendzie, jaje vykanali ŭ akopach Pieršaj suśvietnaj, paśla čaho bai spynilisia ŭ honar Kalad.
My prapanujem vam O Holy Night u frahmiencie ź lehiendarnaha śviatočnaha filma «Adzin doma» — heta epizod jakraz pierad tym, jak Kievin rychtujecca abaraniać svoj dom ad rabaŭnikoŭ. Chłopča słuchaje znakamity tvor u pustym chramie ŭ vykanańni dziciačaha choru.
Alaksandr Pamidoraŭ — «Cud na Kalady»
U skarboncy biełaruskaj muzyki jość rep-kaladka. Trek «Cud na Kalady», vypuščany ŭ 1999 hodzie ŭ ramkach prajekta «Śviaty viečar», staŭ sapraŭdnym chitom i adnoj z samych papularnych biełaruskich navahodnich piesień. U 2015 hodzie Pamidoraŭ zapisaŭ razam z hurtom Trubetskoy rok-viersiju hetaha tvora.
Frank Sinatra — New York, New York
U navahodniuju noč na hałoŭnaj płoščy Ńju-Jorka, Tajms-skvier, źbirajucca dziasiatki tysiač ludziej. Na ich vačach z budynka One Times Square skačvajecca hihancki kryštalny šar, a potym siarod miljonaŭ kanfieci i ščaślivych tvaraŭ hučać kłasičnyja amierykanskija pieśni. Adna ź ich — New York, New York ad Frenka Sinatry. U videa vyšej — kadry śviatkavańnia Novaha 2020 hoda, kali jašče nie było ni vajny, ni pandemii.
Mariah Carey — All I Want for Christmas Is You
Kažuć, nibyta supracoŭniki roźničnaha handlu nienavidziać hetuju pieśniu, bo ŭ śviatočny siezon ad jaje nie schavaješsia. Merajia Kiery vykanała viasioły kaladny chit z prostaj miełodyjaj, jakaja lohka zapaminajecca, i sa słovami, jakija kožny zrazumieje: pra kachańnie i toje, jak sumavać pa blizkim čałavieku. Śpiavačka vypuściła ažno čatyry klipy na svoj trek, jaki niejkim cudam dahetul traplaje ŭ topy chit-paradaŭ, i my prapanujem vam apošni ź ich pa časie.
Marharyta Laŭčuk i Andrej Pavuk — «Kalada!»
Vy dakładna viedajecie hety trek, ale ž čuli jaho, vierahodna, u vykanańni «Pieśniaroŭ». Marharyta Laŭčuk i Andrej Pavuk adradžajuć pieśniu z 40-hadovaj historyjaj i vykonvajuć jaje pa-sučasnamu badziora, zachoŭvajučy, adnak, toj kaladny vajb, za jaki my lubim hety tvor.
Volny chor — «Dobry viečar tabie, panie-haspadaru»
Chor pradstaŭlaje stary biełaruski śpieŭ «Dobry viečar tabie, panie-haspadaru!». Słovy i miełodyja, zapisanyja 30 hadoŭ tamu ŭ kleckaj viosačcy Morač, azdoblenyja hučańniem simfaničnaha arkiestra, što pieratvaraje pieśniu ŭ sapraŭdnuju jeŭrapiejskuju kaladku.
Ella Fitzgerald — Santa Claus Is Coming To Town
Trochi džaza dla fanataŭ staroj škoły! Pieśniu pra Santa-Kłausa, što prychodzić u horad, śpiavała nieźličonaja kolkaść artystaŭ, a my prapanujem vam jaje ŭ viersii ad džazavaj karalevy Eły Ficdžerald. Heta viasioły, badziory kaladny trek ź niastrymnaj enierhijaj vialikaj śpiavački.
Bliźniaty-važaniaty — «Navahodni vals»
Na dziciačym jutub-kanale Vozhyki Bel usiaho try multfilmy, i vyhladaje, što, na žal, ciapier praca vytvorcaŭ hetaj sieryi spyniłasia. Adzin z mulfilmaŭ — hetaja cudoŭnaja i vielmi piaščotnaja śviatočnaja pieśnia.
Krambambula — «Partyzany kaladnaha lesu»
«Partyzany kaladnaha lesu» — rokavaja kampazicyja, jakaja moža ŭpryhožyć viasiołuju viečarynu.
Frank Sinatra — Have Yourself a Merry Little Christmas
Bahaty i ciopły hołas Frenka Sinatry achutvaje i stvaraje śviatočnuju atmaśfieru, navat kali vy staicie ŭ zatory zołkim śniežańskim viečaram. Što b ni zdaryłasia navokał, spadar Sinatra žadaje vam ščaślivaha Rastva.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»«Biełarusy adčuli, što jany mohuć». Psichołah pra admaŭleńnie ad śviataŭ i toje, adkul brać siły na hod
10 kaladnych filmaŭ, jakija varta pahladzieć u śviaty
Viedajecie, navošta skrynia pad duchoŭkaj? Voś try sakrety duchovak, jakija dapamohuć rychtavać navahodniaje zastolle
