Fota: vecteezy.com
Piersanalizavanaja pryščepka ad miełanomy kampanii Moderna dapamahła praduchilić recydyŭ raku skury na pramiežkavaj fazie vyprabavańniaŭ. Kambinacyja vakcyny z supraćrakavym imunaterapieŭtyčnym preparatam Keytruda ad kampanii Merck źniziła ryzyku recydyvu amal što ŭdvaja, piša Wall Street Journal.
U daśledavańni ŭdzielničali 150 dobraachvotnikaŭ, jakim da hetaha vydalili miełanomu chirurhičnym šlacham. Častka ź ich atrymała da dzieviaci doz vakcyny razam ź imunaterapieŭtyčnym preparatam, častka — tolki preparat. U tych, chto prajšoŭ praz vakcynacyju, ryzyka recydyvu ci śmierci była na 44% mienšaja, čym u druhoj katehoryi.
Hetyja vyniki majuć statystyčnuju značnaść, ale ž nie byli pravieranyja niezaležnymi vučonymi. Jany dajuć nadzieju na źjaŭleńnie novaha kłasa vakcyn — takich, što dazvolać nie tolki praduchilać chvaroby, jak zvyčajnyja pryščepki, ale i lačyć ich.
Pryščepka suprać miełanomy zasnavanaja na technałohii mRNK (ci iRNK) — toj ža samaj, što dała padmurak i dla stvareńnia supraćkavidnaj vakcyny ad Moderna. Zvyčajnyja vakcyny praduhledžvajuć uviadzieńnie ŭ arhanizm asłablenaha ci inaktyvavanaha ŭzbudžalnika infiekcyi. Pryščepki ž na bazie mRNK virusa vučać kletki vypracoŭvać białok, jaki zapuskaje imunnuju reakcyju ŭ vypadku zaražeńnia. Imunnaja sistema paznaje hety białok i pačynaje vypracoŭvać antycieły, jakija mohuć zmahacca ź virusam u vypadku, kali pryščepleny čałaviek im zarazicca.
Eliaŭ Bar, kiraŭnik adździeła mižnarodnaha kliničnaha raźvićcia i hałoŭny miedycynski dyrektar Merck, raspavioŭ u intervju, što heta pieršy raz, kali navukoŭcy bačać sapraŭdy mocnuju reakcyju na supraćrakavuju vakcynu: «Pieršy raz my možam pakazać, što likvidacyja tarmazoŭ imunnaj reakcyi, jakuju zabiaśpiečvaje Keytruda, plus niezvyčajna dobraja vakcyna dajuć nasamreč vydatny imunny adkaz».
Čytajcie taksama:
Ci možna vypivać, kali vy pryščapilisia ad kavidu?
Biełaruskuju vakcynu ad kavidu pačnuć vypuskać u studzieni, ale patreba ŭ joj užo minuła
Kiraŭnik Akademii navuk: Biełaruś budzie vypuskać vakcyny, «adaptavanyja dla našych ludziej»
