U traŭni minułaha hoda ŭ Alisy byŭ dyjahnastavany T-kletkavy vostry limfabłastny lejkoz.
U zvyčajnych umovach T-kletki — abaroncy arhanizma, ale ŭ Alisy ich dziejnaść vyjšła z-pad kantrolu i stała ŭjaŭlać niebiaśpieku.
U Alisy nazirałasia ahresiŭnaja raznavidnaść raku. Nie dapamahli ni chimijaterapija, ni pierasadka kaściavoha mozhu.
«U rešcie rešt ja b pamierła», — kaža Alisa.
Jaje maci, Kijona, raspaviadaje, što letaś jana z žacham čakała Rastva, dumajučy, što jany sustrakajuć jaho razam u apošni raz, i prosta rydała u dzień naradžeńnia dački ŭ studzieni.
Toje, što adbyłosia potym, jašče niekalki hadoŭ tamu było niemahčyma ŭjavić.
Kamanda Hrejt-Ormand-Stryt vykarystała technałohiju hiennaha redahavańnia, jakaja źjaviłasia ŭsiaho šeść hadoŭ tamu.
Redahavańnie asnoŭ
Azocistyja asnovy — heta arhaničnyja złučeńni, jakija ŭvachodziać u skład nukleinavych kisłot. Čatyry typy asnoŭ — adenin (A), cytazin (C), huanin (G) i tymin (T) — heta cahlinki našaha hienietyčnaha koda.
Padobna da litar ałfavita, miljardy asnoŭ u našaj DNK składajuć instrukcyju dla čałaviečaha arhanizma.
Redahavańnie asnoŭ dazvalaje navukoŭcam vybrać kankretnuju častku hienietyčnaha koda i zatym źmianić malekularnuju strukturu tolki adnaj asnovy, pieraŭtvarajučy jaje ŭ inšuju i źmianiajučy hienietyčnyja instrukcyi.
Kamanda lekaraŭ i navukoŭcaŭ vykarystała hety instrumient dla stvareńnia novaha typu T-kletak, zdolnych vysočvać i zabivać rakavyja T-kletki ŭ arhaniźmie Alisy.
Dla hetaj mety pasłužyli zdarovyja donarskija T-kletki.
Pieršaja madyfikacyja adklučyła miechanizm nacelvańnia T-kletak Alisy, kab jany atakavali jaje arhanizm.
Druhaja praŭka vydaliła antyhien lejkacytaŭ CD7, jaki jość va ŭsich T-kletkach.
Treciaja redakcyja dazvoliła praduchilić hibiel kletak ad chimijaterapii, zrabiŭšy ich «niabačnymi» dla lekaŭ.
Na apošnim etapie hienietyčnaj madyfikacyi T-kletak było dadziena ŭkazańnie palavać za ŭsimi kletkami, u jakich prysutničaŭ białok CD7, kab źniščyć usie T-kletki ŭ jaje arhaniźmie, u tym liku i rakavyja.
Imunnuju sistemu Alisy, uklučajučy T-kletki, mierkavałasia adnavić z dapamohaj druhoj pierasadki kaściavoha mozhu.
Alisa zastałasia ŭraźlivaj dla infiekcyj, pakolki ŭ pracesie hetaha lačeńnia byli atakavanyja jak rakavyja T-kletki ŭ jaje ciele, tak i tyja, jakija abaraniali jaje ad chvarob. Praź miesiac u Alisy nastupiła remisija, i joj zrabili druhuju pierasadku kaściavoha mozhu, kab adnavić jaje imunnuju sistemu. Alisa praviała 16 tydniaŭ u balnicy i była ŭ hety čas maksimalna aharodžanaja ad mahčymych infiekcyj.
Paśla abśledavańnia praz try miesiacy lekary ŭstryvožylisia, bo ŭ dziaŭčynki znoŭ vyjavili prykmiety raku. Ale dva nastupnyja abśledavańni pakazali poŭnuju adsutnaść rakavych kletak.
Alisa vyrašyła achviaravać svaje vałasy, kali daviedałasia, što paśla chimijaterapii ŭsio roŭna ich stracić
Vielizarny patencyjał
«Alisa — pieršaja pacyjentka, jakuju lačyli z dapamohaj hetaj technałohii», — kaža prafiesar Vazim Kasim z Kalifarnijskaha ŭniviersiteta i balnicy Hrejt-Ormand-Stryt.
Pavodle jaho słoŭ, takija hienietyčnyja manipulacyi — heta halina navuki, jakaja vielmi chutka raźvivajecca i maje vielizarny patencyjał dla lačeńnia cełaha šeraha zachvorvańniaŭ.
Adnak užytaja dla lačeńnia Alisy technałohija — tolki małaja dola taho, čaho možna dasiahnuć užyvańniem redahavańnia asnoŭ.
Doktar Devid Lu ź Instytuta imia Broŭda, adzin z vynachodnikaŭ mietadu, ličyć dziŭnym i niezvyčajnym toje, što novy mietad pačaŭ prymianiacca dla lačeńnia ludziej usiaho praz šeść hadoŭ paśla jaho raspracoŭki.
U terapii, raspracavanaj dla Alisy, kožnaje redahavańnie asnoŭ ŭklučała ŭ siabie razbureńnie ŭčastka hienietyčnaha koda, kab jon bolš nie pracavaŭ.
Ale technałohiju možna ŭžyvać i bolš tonka i vybiralna — naprykład, zamiest taho, kab vyklučać defiektnuju instrukcyju, možna jaje karektavać.
Sierpapadobna-kletkavaja aniemija, naprykład, vyklikajecca źmianieńniem usiaho adnaj asnovy, jakuju možna vypravić.
Navukoŭcy ŭžo vypraboŭvajuć redahavańnie asnoŭ pry sierpapadobna-kletačnaj aniemii, a taksama pry spadčynnym pavyšanym uzroŭni chalesterynu i pry beta-tałasiemii (zachvorvańni kryvi).
