Vyjava: vecteezy
Prajšło šeść hadoŭ z taho času, jak Mask staŭ suzasnavalnikam startapa Neuralink, jaki zajmajecca interfiejsami kiravańnia mozham (skaročana BCI — ad brain-control interfaces). Prajšło try hady z taho času, jak kampanija ŭpieršyniu prademanstravała svajho padobnaha da šviejnaj mašynki «robata-impłantatara»; dva hady z taho času, jak kampanija ŭkaraniła svaju technałohiju ŭ hałovy śviniej; i krychu bolš za 19 miesiacaŭ, jak jany zrabili toje ž samaje z prymatami. Na apošniaj imprezie ŭ farmacie «pakažy i raspaviadzi» ŭ samym kancy listapada Mask zajaviŭ: «My dumajem, što, mahčyma, ciaham šaści miesiacaŭ my pavinny stać zdolnymi ŭstalavać Neuralink u čałavieka».
Darečy, kampanija Maska była abvinavačanaja ŭ niezakonnym žorstkim abychodžańni z małpami. Abaroncy pravoŭ žyviołaŭ śćviardžali, što małpy adčuvali «nadzvyčajnyja pakuty ŭ vyniku nieadekvatnaha dohladu za žyviołami» padčas vyprabavańniaŭ impłantaŭ čypaŭ, a taksama što z 23 małpaŭ, jakija naležali Neuralink, tolki 7 vyžyli paśla vyprabavańniaŭ.
Raniej u lutym Neuralink paćvierdziła, što małpy zahinuli padčas vyprabavańniaŭ pratatypa impłantaŭ BCI u Kalifarnijskim univiersitecie. U kampanii śćviardžali, što tolki vaśmi prymatam zrabili eŭtanaziju, što, samo saboj, nie zrabiła spravu mienš rezanasnaj. Ale kampanija adchiliła abvinavačvańni Kamiteta daktaroŭ pa adkaznaj miedycynie ŭ žorstkim abychodžańni z žyviołami. A Mask uskosna adkazaŭ na hetyja abvinavačvańni.
«Pierad tym jak navat padumać pra ŭstalavańnie pryłady ŭ žyvioł, my robim usio mahčymaje, kali pravodzim strohija nastolnyja testavańni. My nie škadujem, što ŭstaloŭvajem hetyja pryłady ŭ žyvioł, — skazaŭ jon. — My vielmi aściarožnyja i zaŭsiody chočam, kab pryłada, niezaležna ad taho, kamu my robim impłantacyju — aviečcy, śvińni abo małpie, — była paćviardžalnaj, a nie daśledčaj».
Sioleta kampanija Maska pieražyvała niaprostyja časy. U lipieni kampanija Synchron apiaredziła Neuralink paśla taho, jak lekary špitala Maŭnt-Sinaj u Ńju-Jorku paśpiachova ŭstalavali svaju pryładu ŭ čałavieka. (Pacyjenty, jakija stracili zdolnaść samastojna ruchacca i kamunikavać, pavinny atrymać mahčymaść prahladać veb-staronki i adpraŭlać tekstavyja paviedamleńni z dapamohaj pryłady, što pieravodzić ich dumki ŭ kamandy kampjutara.) A ŭ tym ža miesiacy stała viadoma pra ciažarnaść kiraŭnicy Neuralink ad Maska.
Neuralink usio jašče pracuje nad tym, kab atrymać adabreńnie amierykanskich rehulataraŭ dla svajho impłanta. Engaget piša, što Neuralink pavinna abapiracca na 1024 «advody» dyjamietram 5 mikron, «zašytyja» ŭ šeraje rečyva pacyjenta, kab utvarać suviazi z navakolnymi niejronami i takim čynam pieravodzić anałahavyja elektryčnyja impulsy mozha ŭ ličbavy kampjutarny kod. Prynamsi tearetyčna. Da hetaha času ŭsio, čaho dasiahnuŭ Neuralink, — heta prymusić małpu hulać u pinh-ponh na kampjutary biez džojścika.
«U peŭnym sensie my ŭsie ŭžo kibarhi, — kazaŭ Mask, — u tym, što vaš telefon i kampjutar jość praciaham vas samich». Adnak hetyja pryłady istotna abmiažoŭvajuć našu zdolnaść mieć znosiny, śćviardžaŭ jon. «Kali vy ŭzajemadziejničajecie z telefonam, heta abmiežavana chutkaściu, ź jakoj vy možacie ruchać vialikimi palcami, abo chutkaściu, ź jakoj vy možacie pramaŭlać u svoj telefon». Jon adznačaje, što hetym mietadam možna pieradavać tolki dziasiatki bit danych u siekundu, u toj čas jak «kampjutar moža pieradavać infarmacyju na chutkaści hihabitaŭ ci terabitaŭ u siekundu».
«Heta fundamientalnaje abmiežavańnie, jakoje, ja dumaju, nam treba vyrašyć, kab pamienšyć doŭhaterminovuju ryzyku štučnaha intelektu», — kaža biznesoviec.
vo heta biźnies-partnior