Fota: pxhere.com
Leki ad pachmiella
Z punktu hledžańnia taksikałohii, treba likvidavać nastupstvy ŭździejańnia ałkaholu.
My stracili hlukozu, heta značyć, nam patrebna ježa vysokaenierhietyčnaja i niatłustaja — bulbačka, kaša, ale nie tort — tam šmat tłuščaŭ.
My stracili kalij, kalcyj, chłor i h. d.
Tady nam spatrebicca minierałka, ale ź jaje treba vypuścić haz. Padychodzić taksama rasoł, ale ludzi błytajuć rasoł i marynad. U marynadzie — vocat. Vocatam my zamarudzim pachmielle. A rasoł, u asnoŭnym, sol i vada.
U prodažy jość hatovyja paraški, jakija razvodziacca i ŭtrymlivajuć usio nieabchodnaje ŭ patrebnych fizijałahičnych praporcyjach. Jany nie skarociać pachmielle, ale pamienšać simptomy.
Ci treba apachmialacca?
«Nie. Heta pamyłka, jakaja ŭziataja z pachmiella ałkaholika, jakoje, pa sutnaści, źjaŭlajecca abstynientnym sindromam. Kažuć: hladzicie, Vasilič robić tak rehularna, i ŭsio narmalna, jon siabie dobra adčuvaje. Kab pachmialacca, nam spačatku treba dajści da taho stanu, u jakim znachodzicca Vasilič. Bo jamu drenna ad nizkaha ŭtrymańnia etanołu, a ŭ nas, naadvarot, prablemy ad taho, što vielmi vysokaje ŭtrymańnie etanołu. Nam treba, kab jano ŭpała, i tady my pryjdziem u normu», — tłumačyć doktar.
Kava. Kafieinaŭtrymlivajučyja napoi na nastupny dzień paśla ałkaholnaha atručvańnia pić nielha. Pa-pieršaje, jany mačahonnyja i pracujuć na abiazvodžvańnie arhanizma. Pa-druhoje, kafiein pieraškadžaje dastaŭcy kisłarodu ŭ serca. Čaj, kołu i inšyja kafieinavyja napoi pić u takoj situacyi nielha.
Łaźnia. Isnuje pavierje, što łaźnia vyvodzić taksiny. Doktar kaža, što łaźnia najpierš dapamahaje chutka pacieć. A heta znoŭ strata vadkaści, elektralitaŭ, to-bok abiazvodžvańnie, plus ciepłavaja nahruzka, vysokaja nahruzka na serca i jak vynik — hipiertaničnyja kryzy, prystupy išemii i h. d.
«Łaźnia i ałkahol nie spałučajucca pamiž saboj. Vy spačatku schadzicie ŭ łaźniu, a potym picie, kali ŭžo vyrašyli heta rabić», — havoryć doktar.
Preparaty
Možna pryniać niesteroidnyja supraćzapalenčyja srodki typu aśpirynu, ibuprafienu i h. d. Jany vałodajuć nievialikaj ułaścivaściu praduchilać sklejvańnie trambacytaŭ i za košt hetaha razredžvajuć kroŭ (heta niapravilny termin, ale jak pobytavy padydzie, kab zrazumieć miechanizm). Niesteroidnyja supraćzapalenčyja srodki na fonie pachmiella buduć sapraŭdy dapamahać.
A voś paracetamoł pry pachmielli nie rekamiendujecca. Nie pahłyblajučysia ŭ miechanizm, paracetamoł tarmozić dziejnaść fiermientaŭ.
Vydatny varyjant — kropielnicy ź fizrastvoram abo piacipracentnym rastvoram hlukozy, ale doma heta niedastupna.
Aktyvavany vuhal prymać nie varta. Enterasarbienty ŭžo bieskarysnyja, bo etanoł — u kryvi. My nie «dastaniem» jaho pry dapamozie aktyvavanaha vuhalu ci niejkich inšych sarbientaŭ.
Tamu tołku ź ich tolki jak pakaralnaja funkcyja, bo vuhal budzie vyklikać zapory, i čałaviek vielmi paškaduje i što «złoŭžyvaŭ», i što prymaŭ vuhal.
Pachmielle jak vychavaŭčaja miera
Pakul nie prydumany leki ad pachmiella. Doktar kaža, što jany i nie treba.
«Pachmielle pavinna być u jakaści pakarańnia. Čałaviek pavinien uśviedamlać nastupstvy, inakš u nas nie zastaniecca nijakich strymlivajučych faktaraŭ. Kali pachmielle źnikaje, heta śviedčańnie taho, što čałaviek ruchajecca davoli aktyŭna ŭ bok ałkaholnaj zaležnaści. Pakul jano jość, arhanizm usprymaje ałkahol jak maje być, čałaviek robić vysnovy, vyznačaje svaju dozu, razumieje, za jakim abjomam pačnucca nastupstvy. Ułasna dla hetaha pachmielle nam i dadziena».
Ci daloka vam da ałkahalizmu? Praviercie siabie
Suchafrukty: Kab umacavać imunitet, padtrymać serca i azdaravić kišečnik
Kardyjołah raskazaŭ, jakija simptomy pieradinfarktnaha stanu i jak dziejničać pry infarkcie
