Mikałaju Statkieviču, jaki adbyvaje 14-hadovy termin u kałonii, dyjahnastavali pnieŭmaniju paśla troch pieraniesienych kavidaŭ. Palitviazień znachodzicca ŭ miedsančastcy, pry hetym da jaho nie puskajuć advakata.
Maryna Adamovič raspaviała, što nie viedaje, ci pieradajuć Statkieviču nieabchodnyja leki.
«Nielha zabycca na toje, jak jašče ŭ kastryčniku «zhubiŭsia» Mikałajeŭ list z dazvołam na miedbanderol, nie dajšoŭ da jaho nivodny z napisanych mnoj za nastupny miesiac listoŭ, u jakich ja pra toj dazvoł nastojliva pytałasia. Heta ŭsio, kaniešnie, barabaška vinavaty. Ci listy sami «zhubilisia»? Tolki bolš, čym na miesiac, čałaviek byŭ pakinuty bieź nieabchodnych lekaŭ. Paśla kavidu. U mianie i siońnia niama nijakaj upeŭnienaści, što Mikałaj atrymaŭ tuju, narešcie dasłanuju mnoj, banderol — listoŭ ža niama», — napisała Maryna Adamovič u fejsbuku.
«Tak što ŭ mianie nie paranoja, a abhruntavany papiarednimi dziejańniami śpiecyjalna navučanych ludziej strach… Patelefanavała ŭ kałoniju. Chacieła zapytacca pra stan Mikałaja, z doktaram pahavaryć, mo, leki jakija patrebnyja. Aha, kaniešnie! Pra vyniki, miarkuju, kazać nie treba. Zdaroŭje źniavolenaha — dziaržaŭnaja tajamnica, i z doktaram pahavaryć taksama niemahčyma», — paviedamiła jana.
Pry hetym jana zaznačyła, što možna pisać aficyjnyja zapyty ŭ kałoniju pa elektronnaj pošcie: [email protected]. «Heta ja tonka namiakaju, što možna zapytacca i pra stan zdaroŭja źniavolenaha Mikoły Statkieviča, i pra toje, čamu da jaho nie dachodziać vašy listy», — dadała jana.
Mikałaja Statkieviča 14 śniežnia minułaha hoda asudzili pavodle «spravy Cichanoŭskaha», pryznali vinavatym pavodle č.1 art. 293 («Arhanizacyja masavych biesparadkaŭ») i pryznačyli 14 hadoŭ kałonii asablivaha režymu.
U siaredzinie červienia Statkieviča etapavali ŭ Hłybockuju papraŭčuju kałoniju № 13 — adnu z samych surovych u Biełarusi. Tam jon znachodzicca va ŭmovach asablivaha režymu: u hetym vypadku viaźniaŭ trymajuć u kamierach, jany majuć prava na dva spatkańni ŭ hod — adno doŭhaterminovaje i adno karotkaterminovaje. Taksama takim źniavolenym možna atrymlivać adnu pasyłku i dźvie banderoli ŭ hod.
Čytajcie taksama:
Mikałaj Statkievič u kałonii zachvareŭ pnieŭmanijaj paśla troch kavidaŭ
