Pra toje, što rasijskija vojski blizkija da akružeńnia Arciomaŭska (Bachmuta), napiaredadni zajaŭlaŭ lidar samaabvieščanaj «DNR» Dzianis Pušylin. «Situacyja zastajecca składanaj, ale adnaznačna našy padraździaleńni, u pryvatnaści padraździaleńnie «Vahnier», jany ruchajucca napierad, — cytavała jaho «RIA Naviny». — Situacyja apieratyŭnaha akružeńnia dosyć blizkaja».
Zdymki z hieałakacyjaj pakazvajuć, što rasijskija vojski, vierahodna, zachapili niekalki viosak, raźmieščanych na adlehłaści ad 5 da 30 km u roznyja baki ad Bachmuta. Adnak pakul ničoha nie pradkazvaje nieminučaha akružeńnia Bachmuta ruskimi, ličać ekśpierty ISW.
Rasijskija krynicy aktyŭna raspaŭsiudžvajuć iłžyvyja zajavy ab pośpiechach vakoł Bachmuta u ramkach infarmacyjnaj apieracyi z kastryčnika, i niadaŭnija nieabhruntavanyja terytaryjalnyja pretenzii mohuć być častkaj hetaj praciahłaj infarmacyjnaj apieracyi, skazana ŭ ahladzie.
I navat kali rasijskim vojskam sapraŭdy ŭdałosia ŭziać pad kantrol nasielenyja punkty na poŭdzień ad Bachmuta, hetyja pośpiechi nie pahražajuć krytyčna važnym maršrutam — na Sieviersk i Kanstancinaŭku, jakija słužać asnoŭnymi ŭkrainskimi naziemnymi šlachami znosin. A pazicyi, pra zaniaćcie jakich zajaŭlaje rasijski bok, viaduć naŭprost da padrychtavanych ukrainskich abarončych zbudavańniaŭ u Bachmucie i jaho zachodnich i paŭnočnych viosak-spadarožnikaŭ.
Rasijskija vojski ŭ ich ciapierašnim dehradavanym stanie, chutčej za ŭsio, nie zmohuć chutka vykanać zadaču pa atačeńni Bachmuta, reziumuje ISW.
