Skryn ź siužeta pra źniščeńnie «dyviersantaŭ»
23 listapada rasijskaje FSB abviaściła, što zastreliła ŭ Varoniežy troch čałaviek, jakich padazravali ŭ padrychtoŭcy dyviersii na vajskovych i enierhietyčnych abjektach rehijona. Jak akazałasia, dvoje z troch zabitych hulali ŭ strajkboł, a taksama ŭ rolevyja hulni pa videahulni S.T.A.L.K.E.R., raspracoŭkaj jakoj zajmajecca ŭkrainskaja kampanija GSC Game World.
Adzin z zabitych — miascovy žychar Uładzimir Katoŭski, a druhoha viedali pa psieŭdanimie Stałkier Fashien. Katoŭski, pavodle śviedčańniaŭ ludziej, jakija jaho viedali — «zvyčajny technar, rabaciaha», jaki byŭ prychilnikam Alaksieja Navalnaha, a «Fashien byŭ anarchistam, buntarom i padtrymlivaŭ Ukrainu».
U FSB śćviardžali, što dyviersiju nibyta rychtavali «siabry zakanśpiravanaj jačejki prychilnikaŭ ukrainskaj nacyjanalistyčnaj ideałohii». Padazravanych — «kiroŭcu i dvuch jaho saŭdzielnikaŭ» — zabili pry sprobie zatrymańnia na ŭskrainie Varonieža. Padazravanyja nibyta akazali ŭzbrojenaje supraciŭleńnie i byli zabityja ahniom u adkaz.
Pry hetym u prahramie «Vieści» na telekanale «Rasija-1» u siužecie pra apieracyju FSB u Varoniežy pakazali ściah z emblemaj u vyhladzie hałavy zialonaha vaŭka ŭ profil i nadpisam «Vola» — emblemu hrupoŭki «Svaboda» z hulni S.T.A.L.K.E.R. U siužecie «Rasii-1» ściah nazvali «ściaham ultrapravaj nacyjanalistyčnaj partyi «Vola».
