Fota: AR
Matč pamiž Saudaŭskaj Aravijaj i Arhiencinaj adkryvaŭ prahramu 22 listapada. Siarod udzielnikaŭ hulni adnaznačnym favarytam nazyvali Arhiencinu, bo i sama hetaja kamanda — biezumoŭny pretendent na Kubak ČS, a nie tolki na try ački ŭ zmahańni z arabami. Da taho ž, biasprojhryšnaja sieryja arhiencincaŭ pierad siońniašniaj hulnioj składała ažno 36 matčaŭ, i čamu b nie praciahnuć jaje?
Zdajecca, usio išło pa płanie. Lik adkryli arhiencincy: na 10-j chvilinie Lijanel Miesi paśpiachova realizavaŭ pienalci jak pakarańnie za foł u štrafnoj na Leandra Paredesa. Hety hoł staŭ siomym dla Lijanela na čempijanatach śvietu, što dazvoliła jamu paraŭnacca pa hetym pakazčyku z adviečnym supiernikam Kryšcijanu Ranałdu. Taksama Miesi — pieršy hulec, jaki zabiŭ za Arhiencinu na čatyroch roznych čempijanatach śvietu (akramia ciapierašniaha, u bahažy forvarda jość hały Sierbii i Čarnahoryi, Irana, Nihieryi, Bośnii i Hiercahaviny), a z Saudaŭskaj Aravijaj jaho źviazvaje jašče i toje, što Lijanel — pasoł turyzmu hetaj krainy.
Ale vierniemsia na pole ŭ Katary. Statystyka demanstruje, što pieravahu padčas hulni zbolšaha mieli arhiencincy: naprykład, jany bolš vałodali miačom (69% suprać 31% u saudaŭcaŭ). Araby, u svaju čarhu, vyłučylisia kolkaściu fałoŭ — 21 suprać 9 u paŭdniovaamierykancaŭ.
Za 35 chvilin pieršaha tajma ažno try hały arhiencincaŭ byli admienienyja praz afsajd, tamu da druhoj pałovy hulni jany padyšli nie ŭ lepšym psichałahičnym stanie. Paśla pierapynku parad afsajdaŭ ź ich boku pradoŭžyŭsia, a voś saudaŭcy narešcie zdoleli realizavać svaje šansy. Na 48-j chvilinie Salech Al-Šechry adnaviŭ raŭnavahu, a na 53-j Salem Al-Dosary vyvieŭ svaju kamandu napierad. Zamieny ŭ arhiencincaŭ i vosiem chvilin dadadzienaha da druhoha tajma času nie dapamahli: vynik hulni — 2:1 na karyść Saudaŭskaj Aravii i smačnaja aplavucha Arhiencinie i Miesi, dla jakoha ciapierašni čempijanat śvietu napeŭna budzie apošnim. Adznačym, što za ŭsiu hulniu saudaŭcy nanieśli tolki dva ŭdary ŭ stvor arhiencincaŭ — i hetaha chapiła dla pieršaj siensacyi turniru.
Cikava, što siarod tych, chto naziraŭ za hetaj siensacyjaj, była biełaruskaj tenisistka Viktoryja Azaranka. U tvitary jana apublikavała fota sa stadyjona i adznačyła, što pabačyć hulniu Miesi za Arhiencinu było jaje žyćciovaj maraj.
Čytajcie taksama:
Top-11 samych haračych futbalistaŭ čempijanatu śvietu (+ łaŭka zapasnych i trenier)
Na čempijanacie śvietu pa futbole anhličanie razhramili irancaŭ 6:2. Ale matč zapomnicca nie likam
Staŭ viadomy los zabaronienaha da prodažu piva na ČS pa futbole
