Usie matčy ČS nie buduć pakazvać pa telebačańni ŭ Biełarusi. Heta stała viadoma paśla ŭvodu šostaha pakieta sankcyj ES, kudy ŭ pačatku červienia hetaha hoda trapiła i Biełteleradyjokampanija. Taksama ŭ siaredzinie červienia-2022 UEFA vyklučyŭ BHTRK sa śpisa aficyjnych viaščalnikaŭ futbolnaj Lihi Nacyj, dzie vystupała zbornaja Biełarusi.
Jak ža možna pahladzieć suśvietnaje dziejstva z dapamohaj technałohij?
Paŭlehalny varyjant: VPN + sajty telekanałaŭ krain-susiedak
Z błakiroŭkami i zabaronami niešta złamałasia dla Rasii. Na terytoryi hetaj krainy pravy na pakaz matčaŭ ČS nabyŭ kanał «Matč TV». Tamu hladzieć tranślacyi z Katara anłajn budzie mahčyma praz «Matč TB». Jany buduć adkrytyja tolki dla karystalnikaŭ z Rasii abo dla žycharoŭ Biełarusi, jakija karystajucca videaservisami ci majuć spadarožnikavuju padpisku.
Naprykład, kanał «Matč TB» u apieratara NTV+ uvachodzić u pakiet «Ekanom» za 30 biełaruskich rubloŭ za hod. Hety ž kanał jość u videaservisie ITV u padpiscy koštam 50 rubloŭ za paŭhoda ci 15 rubloŭ za miesiac.
Na ruskaj movie taksama buduć pakazvać matčy kazachstanskija kanały Qazaqstan i Qazsport — tut treba ŭklučyć adpaviednyja nałady IP u VPN-servisie dla hetaha rehijona.
Padzielimsia z vami nievialikim łajfchakam, jak padklučyć dobry VPN na miesiac biaspłatna: u niekatorych takich servisaŭ jość viartańnie hrošaj terminam da 45 ci 30 dzion — hetaha chopić navat kab pahladzieć finał! Naprykład, vy možacie pasprabavać taki mietad u ExpressVPN ci SyberghostVPN. Abo skarystacca starym dobrym PsiphonVPN.
Kali vy dobra viedajecie biełaruskuju movu, to składanaściaŭ z prahladam matčaŭ na ŭkrainskaj ŭ vas być nie pavinna. Tut futboł budzie tranśliravać telekanał «Suśpilnie» i płatforma MEGOGO. Hety miedyjaservis budzie tranśliravać usie matčy na kanale «Futboł» i ŭ adpaviednym raździele, a taksama atrymaje dolu ekskluzivaŭ u 18 matčaŭ z-za ščylnaj sietki štatnych prahram na «Suśpilnie».
Vam spatrebicca ŭkrainski IP i nie biełaruskaja kartka dla apłaty. Ukrainskija servisy błakujuć amal usie hrašovyja pieravody ź Biełarusi.
Padpiska «Maksimalnaha» taryfu na tydzień kaštuje ŭsiaho 2 biełaruskija rubli. Praciah na jašče miesiac budzie kaštavać vam 10 rubloŭ.
Kali vam patrebny varyjant z terytoryi Polščy, to tam ČS buduć pakazvać kanały TVP i Polsat Sport. Jany buduć tranśliravać kožny matč u pramym efiry. Ale i tut biez VPN nikudy. Vy možacie spampavać mabilnuju prahramu TVP Sport, uklučyć polski IP i biaspłatna hladzieć futboł ź cikavymi kamientarami i jakasnaj analitykaj.
Pirackija varyjanty prahladu
Jość niekalki nadziejnych anłajn-ahrehataraŭ, jakija kraduć tranślacyi i žyvuć za košt pakazu rekłamnych banieraŭ na sajcie. Tamu hety mietad najmienš jakasny i maje šmat pieraškod na šlachu da asałody. Ale jon biaspłatny.
Heta moža być livetv.sx abo goooool.org. Pavialičyć jakaść prahladu vam dapamohuć ustanoŭlenyja na vaš kampjutar prahramy SopCast ci TorentStream — jany vykarystoŭvajuć technałohiju peer to peer (P2P), tamu vam nie patrebnyja vielizarnyja pałosy prapuskańnia abo sierviery.
Taksama praz IPTV-płejery vy možacie znajści dadatak Televizo ci jaki inšy.
Lehalnyja varyjanty: treba vyjści sa svajho pakoja
Vam spatrebicca zajści ŭ kafe, bar ci ŭ luboje inšaje miesca, dzie budzie televizar ci prajektar. Uładalniki niekatorych ustanoŭ kažuć, što vyrašyli pakazvać ČS praz rasijski «Matč TB» u miežach niekamiercyjnaha vykarystańnia. Hałoŭnaje dla ich nie brać hrošy za ŭvachod i pakaz, tolki na takich umovach možna tranśliravać bujnyja turniry.
Na hrupavym etapie vy možacie prycanicca da miescaŭ z tranślacyjami, a pačynajučy z płej-ofaŭ treba budzie braniravać miescy, bo intares budzie vialikim. Abo jość varyjant dla intraviertaŭ — bukmiekierskija kantory. U 2018 hodzie padčas ČS jany prymali staŭki na turnir i padavali tranślacyi matčaŭ. Vierahodna, hulcy zmohuć i ciapier hladzieć tranślacyi na sajtach i ŭ dadatkach bukmiekieraŭ. Adnak supracoŭniki padtrymki ŭsich lehalnych BK u Biełarusi pakul nie majuć infarmacyi pra takija tranślacyi.
