Padazravanyja: Siarhiej Dubinski, Ihar Hirkin, Aleh Pułataŭ, Leanid Charčanka
Paśla sudovaha pracesu, jaki doŭžyŭsia dva z pałovaj hady, sud u Haazie pryjšoŭ da vysnovy, što pryčynaj katastrofy stali prarasijskija siły, jakija dziejničali pad kamandavańniem Maskvy. Sud pastanaviŭ, što padkantrolnyja Maskvie sieparatysty vystralili z rakietnaj ustanoŭki «Buk» u samalot Boeing 777, kali toj pralataŭ nad Danieckaj vobłaściu 17 lipienia 2014 hoda.
Usie pasažyry i 15 členaŭ ekipaža rejsa MN17 zahinuli. Sud prachodziŭ u Niderłandach, bo z 283 pasažyraŭ 196 byli hramadzianami Niderłandaŭ.
Uładzimir Zialenski zajaviŭ, što prysudy važnyja, pakolki rasijskija vajskoŭcy, u tym liku najmity, praciahvajuć ździajśniać vajennyja złačynstvy. «Treba, kab na łavie padsudnych apynulisia i zakazčyki, tamu što pačućcio biespakaranaści viadzie da novych złačynstvaŭ, — skazaŭ jon. — Pakarańnie za ŭsie rasijskija źvierstvy — jak tady, tak i ciapier — budzie niepaźbiežnym».
Troje asudžanych (dvoje byłych supracoŭnikaŭ rasijskich śpiecsłužbaŭ i adzin ukrainiec) zastajucca na voli. Miarkujecca, što jany znachodziacca ŭ Rasii, i niama pierśpiektyŭ ich ekstradycyi, pakul Pucin zastajecca va ŭładzie.
51-hadovaha Ihara Hirkina, byłoha aficera HRU, jaki zajmaŭ pasadu «ministra abarony» ŭ tak zvanaj «DNR», 60-hadovaha Siarhieja Dubinskaha, jašče adnaho adstaŭnoha aficera HRU, jaki byŭ jaho namieśnikam, i 50-hadovaha Leanida Charčanku zavočna asudzili na pažyćciovaje źniavoleńnie i abaviazali vypłacić «jak minimum» 16 miljonaŭ jeŭra ŭ jakaści kampiensacyi siemjam achviar.
Ministarka justycyi Niderłandaŭ pry hetym zajaviła, što prysud byŭ tolki pačatkovym krokam, a nie apošnim. «Tym časam my ŭsio jašče rasśledujem datyčnaść inšych asob, jakija mohuć nieści adkaznaść; i sudovyja pracesy suprać rasijskaj dziaržavy ŭsio jašče praciahvajucca», — skazała jana.
Što viadoma pra dziejučych asob?
Hirkin
51-hadovy Ihar Hirkin viadomy jak «Strałkoŭ». Adrazu paśla trahiedyi MH17 jon napisaŭ u sacyjalnych sietkach: «My tolki što źbili AN-26». Nieŭzabavie paśla hetaha paviedamleńnie było vydalena.
Hirkin udzielničaŭ u abiedźviuch čačenskich vojnach. Taksama jaho źviazvajuć z masavym zabojstvam 3000 baśnijskich musulman u 1990-ja hady. Paśla zachopu kantrolu nad Słavianskam u krasaviku 2014 hoda jon kiravaŭ katavańniami i zabojstvami troch ukrainskich aktyvistaŭ, dvoje ź jakich byli studentami. Pavodle jaho, ukraincy — heta ruskija, a poŭdzień i ŭschod Ukrainy naležać Maskvie.
Ukraina daje za jaho hałavu 100 tysiač dalaraŭ. Pavodle raźviedki, jon nie vajuje na froncie va ŭschodniaj Ukrainie, a rychtuje i nabiraje dobraachvotnikaŭ na terytoryi Rasii.
Hirkin raniej havaryŭ pra «maralnuju adkaznaść za hibiel [MH17]», praciahvajučy pry hetym admaŭlać, što jaho padnačalenyja źbili samalot.
Pułataŭ
56-hadovy Aleh Pułataŭ, albo «Hiurza», — adziny padazravany, jaki nakiravaŭ svaje zajavy ŭ sud i źjaviŭsia na videa, zroblenych jaho advakatami ŭ Rasii, admaŭlaŭ svaju datyčnaść.
Kali Pułataŭ byŭ hramadzianinam Rasii, jon u 1986 hodzie, jak miarkujuć, vučyŭsia ŭ Vajennaj akademii imia Frunze ŭ Kijevie. A potym słužyŭ u Čačni, paviedamlajuć ukrainskija ŚMI.
Prakuratura śćviardžaje, što Pułataŭ udzielničaŭ u transparciroŭcy rakietnaha kompleksu «Buk» va Ukrainu i abmiežavańni dostupu ŭ hety rajon adrazu paśla krušeńnia. «Ja spadziajusia i čakaju spraviadlivaha i jurydyčna abhruntavanaha prysudu, — zajaviŭ Pułataŭ sudździam u červieni. — Kali łaska, apraŭdajcie mianie».
Pułataŭ byŭ pryznany kaardynataram va ŭzbrojenych siłach «DNR», ale sudździ zajavili: «Niama dokazaŭ taho, što jon sam unios niejki ŭkład u raźmiaščeńnie «Buka». Tamu vynikaje, što jaho treba apraŭdać». Jaho adzinaha z čatyroch apraŭdali. Niekatoryja svajaki zaklikali hałandskuju prakuraturu abskardzić jaho apraŭdalny prysud.
Dubinski
60-hadovy Siarhiej Dubinski, abo «Chmury», pravioŭ dziacinstva ŭ Vialikaj Navasiołcy, što na zachadzie ad Daniecka. Niekatoryja ŭkrainskija ŚMI paviedamlajuć, što ŭ jaho jość brat, jaki źjaŭlajecca hramadzianinam Ukrainy i žyvie ŭ Kijevie.
Jon słužyŭ u «HRU DNR». Dubinski nibyta byŭ adnym z namieśnikaŭ Strałkova padčas rakietnaha ŭdaru pa MH17.
Dubinski niasie adkaznaść za transpartavańnie z Rasii rakietnaha kompleksu «Buk», jaki źbiŭ samalot. U telefonnych razmovach, pierachoplenych śpiecsłužbami Ukrainy, možna pačuć, jak jon pytajecca ŭ kalehi, nabyli jany adnu abo dźvie puskavyja ŭstanoŭki, i kaardynuje ich pieramiaščeńnie pa krainie.
Dubinski, jak i inšyja padazravanyja, admaŭlaje svaju datyčnaść da źbićcia MH17 i tolki paŭtaraje abvierhnutyja śćviardžeńni ab tym, što adkaznaść niasie ŭkrainski «Buk».
Charčanka
50-hadovy Leanid Charčanka, albo «Krot», — adziny hramadzianin Ukrainy, abvinavačany ŭ hibieli MH17. Miarkujecca, što Charčanka dapamahaŭ Dubinskamu ź biaśpiečnym tranzitam rakietnaha kompleksu «Buk» i jaho vyvazam paśla krušeńnia samalota.
Jon źviazany sa Strałkovym i «DNR» jak były kamandzir raźviedvalnaha bataljona, paviedamlaje Bellingcat. U jaho atradzie nibyta byli i ŭkraincy, i rasijanie.
U pierachoplenaj razmovie zapisana, jak Charčanka daručyŭ padnačalenym supravadžać jaho na rakietnuju placoŭku, a potym paviedamiŭ Dubinskamu, što «jany na miescy i ŭžo źbili» samalot — nibyta jašče da taho, jak daviedalisia, što byŭ źbity mienavita pasažyrski samalot.
Na kamieru jon zajaŭlaŭ, što nikoli nie bačyŭ «Buk» na terytoryi «DNR». Śledčyja dahetul vyśviatlajuć jaho miescaznachodžańnie, ale apošnim viadomym miescam jaho žycharstva była Kanstancinaŭka Danieckaj vobłaści.
