Vyvučyŭšy ŭvieś masiŭ infarmacyi, redakcyja «Fłahštoka» pryjšła da vysnovy, što materyjały sa smartfona nie źjaŭlajucca falsifikacyjaj i vieryfikujucca źviestkami z sacyjalnych sietak ŭładalnika smartfona i jaho blizkich.
Hety materyjał hruntujecca na fotazdymkach, jakija zachoŭvalisia na pryładzie, a taksama asabistaj pierapiscy vajskoŭca z žonkaj u sietcy Viber i jaho kalehami ŭ čatach sietak Telegram i WhatsApp.
Pavieł Jurjanaŭ u darozie ŭ Biełaruś u lutym 2022 hoda
Infarmacyja sa smartfona dazvoliła vyznačyć, što jon naležaŭ namieśniku kamandzira roty pa vychavaŭčaj rabocie 37-j asobnaj hvardziejskaj motastrałkovaj bryhady, jakaja dysłakujecca ŭ horadzie Kiachta ŭ Buracii, majoru Paŭłu Jurjanavu.
Z fota pašparta, znojdzienaha ŭ telefonie, paznačana, što jon naradziŭsia ŭ vioscy Charanchoj (Respublika Buracija) u 1980 hodzie. Źmiest pierapiski zampalita dazvalaje acanić maralny duch rasijskaha vajskoŭca pierad pačatkam uvarvańnia va Ukrainu.
Zychodziačy ź pierapiski, možna mierkavać, što padrychtoŭka da napadu pačałasia jašče ŭ 2021 hodzie. Pra toje, što vychadnych bolš nie budzie, major raskazaŭ svajoj žoncy jašče 23 śniežnia 2021 hoda. Z vajskovaj čaści Jurjanava nie adpuścili navat na Novy hod.
Uśviedamleńnie taho, što adbyvajecca, było surjoznym stresam, jaki prymušaŭ prymać zaspakajalnyja preparaty. Pra toje, što muž moža apynucca na vajnie, vidać, viedała i jahonaja žonka.
Materyjalna-techničnaje zabieśpiačeńnie vajskoŭcaŭ, jakich rychtavali da vajny, było arhanizavana vielmi słaba. Pra heta možna mierkavać pa tym, što Jurjanavu pierad adpraŭkaj kurtku i kitajskuju radyjostancyju nabyvała žonka.
Niahledziačy na ŭnutranuju tryvohu, zampalit praciahvaŭ kiravać prapahandysckaj pracaj siarod vajskoŭcaŭ. «Uzbrojenyja Siły RF na pieradavych rubiažach baraćby ź mižnarodnym teraryzmam. Ekstremizm i teraryzm jak pahroza nacyjanalnaj biaśpiecy Rasii», «Patryjatyzm — statutny i maralny abaviazak vajskoŭca» — temy lekcyj, jakija jon arhanizoŭvaŭ pa darozie ŭ Biełaruś.
Ešałony z rasijskimi vajskoŭcami prybyli ŭ Biełaruś u kancy studzienia. Pa fatahrafijach z telefona možna mierkavać, što miescam pramiežkavaj dysłakacyi byŭ Rečycki rajon. Pra toje, što heta buduć nie prosta vučeńni, major, vidać, raspavioŭ svajoj žoncy 4 lutaha. Z taho dnia jon nie chavaŭ, što moža bolš nikoli nie viarnucca dadomu.
Užo ŭ Biełarusi vyśvietliłasia, što častka vajskoŭcaŭ nie atrymała naležnaha hrašovaha zabieśpiačeńnia. «Fłahštok» naličyŭ u pamiaci telefona 17 adpaviednych rapartaŭ. Akazałasia, što hetyja vajskoŭcy byli zaličanyja ŭ skład čaści pierad samaj adpraŭkaj. Asabovyja spravy jašče nie paśpieli pryniać, tamu zrabić naličeńnie hrošaj im paabiacali tolki ŭ sakaviku.
Pierapiska zampalita źmiaščaje dokazy vykarystańnia terytoryi Biełarusi dla ahresii suprać Ukrainy. U telehram-čacie «Na barykady» 6 lutaha byli apublikavanyja šyfry pieramoŭnaj tablicy, jakija źmiaščajuć nazvy pasieliščaŭ Homielskaj vobłaści: palihon Barščoŭka, palihon Baranavičy, n. p. Rečyca, n. p. Biazujeva (vierahodna, Biazujeŭ, vioska niedaloka ad Rečycy, dzie raźmiaščaŭsia palavy vajskovy łahier u studzieni—lutym 2022 hoda).
Palavy łahier US RF kala vioski Biazujeŭ Rečyckaha rajona na spadarožnikavych zdymkach 2 lutaha 2022 hoda (krynica: BAP Intel)
U hetym ža samym čacie źmiaščajecca dokaz vykarystańnia Paleskaha dziaržaŭnaha radyjacyjna-ekałahičnaha zapaviednika dla ahresii suprać Ukrainy. Miescam vyhruzki ŭzbrajeńnia i vajskovaj techniki paznačanaja «kinutaja vioska». Jaje kaardynaty adpaviadajuć uročyšču Dziarnovičy (adsielenaja ŭ 1986 hodzie z-za radyjacyi vioska Naraŭlanskaha rajona Homielskaj vobłaści).
Hrupoŭka, sfarmavanaja na zachad ad raki Prypiać, brała ŭdzieł u vajennych dziejańniach u Žytomirskaj vobłaści, ažyćciaŭlała zachop Čarnobylskaj AES, a taksama šturmavała paŭnočna-zachodnija pryharady Kijeva. Bolš dakładnych śviedčańniaŭ pra dalejšy šlach zampalita smartfon nie ŭtrymlivaŭ.
Takim čynam, pa pierapiscy možna adnavić šlach majora Jurjanava: kab dabracca ad vajskovaj čaści, raźmieščanaj u burackaj Kiachcie, da biełaruska-ŭkrainskaj miažy ŭ Naraŭlanskim rajonie, jon pieraadoleŭ bolš za šeść tysiač kiłamietraŭ.
23 lutaha, za dzień da napadu, major Jurjanaŭ sfatahrafavaŭ paradak kałony vajskovaj techniki, u jakoj naličvałasia 62 transpartnyja srodki: pieravažna KamAZy, Urały i ZIŁy (raźlikovaja daŭžynia kałony 3 150 mietraŭ).
16 sakavika zampalit sfatahrafavaŭ novy śpis techniki. Hetym razam u im było tolki 15 transpartnych srodkaŭ, adzin ź jakich byŭ vykraśleny. Numary transpartnych srodkaŭ i proźviščy vajskoŭcaŭ supadajuć z častkaj proźviščaŭ, jakija byli paznačanyja ŭ kałonie za dzień da napadu.
Sacyjalnyja sietki Jurjanava na siońniašni dzień nie aktyŭnyja: apošni zafiksavany vizit u sietku «Vkontaktie» adbyŭsia 17 lutaha 2022 hoda, za tydzień da pačatku vajny. Apošnija zapisy, zroblenyja haspadarom telefona, datavanyja 17 sakavika. U siecivie niekrałohaŭ ab hibieli Jurjanava jahonyja svajaki i kalehi nie publikavali, u burackich ŚMI takija publikacyi taksama nie byli znojdzienyja.
U adnoj z sacyjalnych sietak «Fłahštok» zadaŭ pytańnie pra los Jurjanava jahonamu znajomamu. Toj paviedamiŭ, što Jurjanaŭ zahinuŭ va Ukrainie ŭ sakaviku 2022 hoda. U Jurjanava zastalisia dźvie niepaŭnaletnija dački.
