Taćciana Zareckaja ŭ prahramie «Žyćcio-malina». Skrynšot ź videa
Adaskievič dzielicca svaimi razvahami ŭ telehram-kanale Belarus Finance.
«Taćciana Zareckaja była pradstaŭnicaj Cichanoŭskaj pa ekanomicy i finansach, tamu prakamientuju niekatoryja aśpiekty hetaj hučnaj historyi [jaje sychodu z Kabinieta pradstaŭnikoŭ].
Čytajcie taksama: Paśpiachovaja startapierka ci baranesa Miunchhaŭzien? Jak Taćciana Zareckaja trapiła ŭ Abjadnany kabiniet i čamu jana jaho pakinuła
Ja detalova sfakusujusia na aśpiektach, źviazanych ź finansami i inviestycyjami ŭ startapy.
Viadoma, što Zareckaja zasnavała niekalki ctartapaŭ, i heta klučavaja častka jaje bijahrafii.
Tamu ja ŭjaviŭ siabie ŭ roli inviestara, jaki robić praceduru «naležnaj abačlivaści» («Due Diligence») najbolš viadomaha ź ich — Laava Tech.
Sens hetaj pracedury ŭ vyjaŭleńni «čyrvonych ściažkoŭ» (padazronych rečaŭ/niesupadzieńniaŭ i hetak dalej).
Najaŭnaść takich ściažkoŭ zusim nie aznačaje, što startap machlarski, ale kali ich zašmat — heta nahoda pravieści detalovaje daśledavańnie abo ahułam admovicca ad inviestycyi.
1) Raskrytyja inviestycyi ŭ startap — tolki hrantavyja i ad aksielerataraŭ.
Heta značyć, mienšy uzrovień due diligence, čym robiać vienčurnyja fondy.
Samo saboju heta nie prablema, ale vyklikaje pytańni toje, što zasnavalnica śćviardžaje, što inšyja inviestary jość, ale ich raskryć nie moža abo nie choča.
Heta davoli dziŭna, bo, jak praviła, nichto nie chavaje takich svaich inviestycyj ci inviestaraŭ — asabliva vienčurnyja fondy.
2) Ličby vyručki, jakija nazyvaje zasnavalnica ($280 tys/mies), nie suadnosiacca sa spravazdačnaściu (mienš za 100 tys jeŭra/hod).
Jana kaža, što asnoŭny abarot — u «pradstaŭnictvach» estonskaj kampanii ŭ inšych krainach.
Heta značyć, što spravazdačnaść pavinna kansalidavacca, i vyručka dy prybytak ad ich pavinny być bačnyja ŭ spravazdačnaści estonskaj matčynaj kampanii.
A adzinaja viadomaja (polskaja) inšaja jurasoba, pa jakoj dastupnaja spravazdačnaść, atrymała hrant na kala 176 tys. PLN, paśla čaho była likvidavanaja.
Śćviardžeńnie, što ŭ inšych jurysdykcyjach finansavyja pakazčyki «raskryvać niezakonna» — vyklikaje ździŭleńnie, bo zasnavalnik, jak praviła, maje poŭnaje prava heta rabić.
3) Pieranos publikacyi spravazdačnaści na bolš poźni termin. Nie abaviazkova niešta drennaje, ale časta mienavita zatrymka finansavaj spravazdačnaści źjaŭlajecca prykmietaj drennaha finansavaha stanovišča abo manipulacyj spravazdačnaściu.
4) Adsutnaść kankretyki pa prahresie i vynikach raspracoŭki pradukta/rašeńnia.
Lepš za ŭsio heta bačna ŭ spravazdačnaści paśla atrymańnia hranta ES.
Možna paraŭnać ź inšymi prajektami, jakija atrymali hranty: tut i kankretyka «na što patračanyja hrošy, što zroblena, jakija inviestycyi atrymanyja», i pratatypy praduktu, i hałoŭnaje dla padobnych prajektaŭ — artykuły ŭ navukovych časopisach, jakija paćviardžajuć, što technałohija pierśpiektyŭnaja. Ničoha hetaha ŭ startapa Zareckaj u spravazdačnaści niama.
5) Badaj, samaja istotnaja častka Due Diligence — razmovy z kankurentami, inviestarami, pastaŭščykami, klijentami, navukoŭcami. Słovam, z tymi, chto znajomy z technałohijaj ci ź dziejnaściu biznesu i moža kvalifikavana vykazacca.
Luby vienčurny fond budzie takich ludziej šukać i razmaŭlać ź imi.
Samy prosty sposab dla startapiera raźviejać sumnievy — dać kantakty niekalkich ludziej z kampietencyjami i reputacyjaj.
Ale publična pazityŭnaj rekamiendacyi startapa Zareckaj pakul nichto ź śpiecyjalistaŭ u śfiery/fondaŭ/klijentaŭ nie daŭ. A dla sapraŭdy paśpiachovaha startapa ŭziać takuju rekamiendacyju, jak praviła, zusim nie składana.
Takim čynam, čyrvonych ściažkoŭ, jak kažuć, bolš, čym na kamunistyčnym mitynhu. Ci heta dokaz, što startap — machlarstva? Nie.
Šmatlikija startapy prachodzili tonkuju liniju pamiž «pierabolšvańniem» i «padmanam» i potym stanavilisia paśpiachovymi. Ale kali zasnavalnica stanovicca kandydatkaj na palityčny post — patrabavańni da jaje našmat bolš strohija.
Bo kali prapaduć hrošy niekalkich inviestaraŭ — ničoha strašnaha. A voś palityčnaja siła, jakaja nie zrabiła adekvatnaha due diligence (asabliva kali pazicyja patrabuje nie tolki zdolnaści fandrejzinhu, ale i viedańnia ekanomiki i finansaŭ), ryzykuje zhubić davier vybarščykaŭ.
I tym bolš ryzykuje, kali robić vyhlad, što adzinaja pryčyna sychodu palityka — «ckavańnie», a nie, naprykład, strata davieru i sumnievy nakont bijahrafii i kampietencyj.
