Fota: AR
Jak minimum 41 zahinuły — heta mabilizavanyja za apošni miesiac. Častka hetych strat niebajavyja: ludzi pamirali ŭ navučalnych centrach, na palihonach i ŭ vajskovych čaściach.
Adnak jość i tyja, chto zahinuŭ na terytoryi Ukrainy. Ich hibiel śviedčyć ab tym, što mabilizavanych adpraŭlajuć na front praktyčna biez padrychtoŭki.
Naprykład, traich žycharoŭ Čelabinskaj vobłaści pryzvali z 26 pa 29 vieraśnia, 3 kastryčnika jany apynulisia pad Łuhanskam, a 9 kastryčnika rodnym pačali prychodzić paviedamleńni pra ich hibiel.
Žychara burackaha siała Bahdaryn Andreja Pičujeva pryzvali 22 vieraśnia, a ŭžo 4 kastryčnika jon zahinuŭ «pry vykanańni vajskovaha abaviazku».
Straty siarod atradaŭ dobraachvotnikaŭ pakazali samy značny rost z pačatku vajny.
Kolkaść paćvierdžanych strataŭ siarod dobraachvotnikaŭ moža stać supastaŭnaj sa stratami ŭ PDV i motastrałkovych vojskach (dobraachvotniki — bolš za 800 čałaviek, PDV i motastrałkovyja — bolš za 1200).
Z ulikam zatrymki, ź jakoj daśledavalniki atrymlivajuć infarmacyju, možna skazać, što asnoŭnyja straty ŭ apošnija paŭtara-dva miesiacy vajny nieśli dobraachvotniki. Da ich žurnalisty adnosiać bajcoŭ atradaŭ BARS, «Achmat», a taksama vajskoŭcaŭ imiannych rehijanalnych bataljonaŭ. Akramia taho, jany ličać dobraachvotnikami tych, chto zaklučyŭ karotkaterminovy kantrakt ź Minabarony paśla pačatku vajny.
Čas ad zaklučeńnia kantrakta da hibieli, paviedamlajuć žurnalisty, składaje nie bolš za dva miesiacy.
Za paŭhoda vajny va Ukrainie zahinuła bolš vajskoŭcaŭ, čym za ŭsiu druhuju čačenskuju vajnu.
21 vieraśnia, paśla abviaščeńnia Pucinym «častkovaj mabilizacyi», Siarhiej Šajhu zajaviŭ, što straty rasijskaha vojska składajuć 5 937 čałaviek zabitymi. Heta chłuśnia: navat pa padlikach pavodle adkrytych krynic zahinułych da taho momantu było bolš — a značyć, nasamreč hetyja ličby składajuć dziasiatki tysiač.
