Borys Džonsan. Fota: AP
Pa padlikach Bi-bi-si, da dźviuch hadzin dnia suboty ab padtrymcy Sunaka, supiernika Tras u finale niadaŭnich vybaraŭ lidara Kansiervatyŭnaj partyi i premjera, zajavili ŭžo 112 deputataŭ Pałaty abščyn ad partyi tory.
Kab paskoryć abrańnie novaha lidara paśla raptoŭnaha sychodu Tras, partyja na hety raz uviała vielmi vysoki prachadny barjer: bałatavacca zmohuć tolki tyja, chto zaručycca padtrymkaj minimum sta čalcoŭ frakcyi tory ŭ Pałacie abščyn.
Usiaho ŭ Kansiervatyŭnaj partyi zaraz 357 mandataŭ u nižniaj pałacie parłamienta, i, adpaviedna, vyłučycca zmohuć nie bolš za try kandydaty.
U subotu ranicaj eks-premjer Borys Džonsan prylacieŭ u Łondan z Daminikanskaj Respubliki, dzie adpačyvaŭ ź siamjoj. Jak paviedamlajuć vidavočcy, Džonsan prybyŭ choć i ŭ asiarodździ pałožanaj jamu, byłomu premjeru, achovy, ale ekanom-kłasam. Zajaŭ adrazu paśla prylotu jon rabić nie staŭ.
Borys Džonsan, Pieni Mordant i Ryšy Sunak. Kałaž: BBC
Pieni Mordant, pavodle źviestak Bi-bi-si, pakul padtrymaŭ 21 deputat. Budučy aŭtsajdaram, jana tym nie mienš stała pieršaj i pakul adzinaj z pretendentaŭ, chto aficyjna zajaviŭ ab namiery bałatavacca. Jana navat užo vypuściła pieršy pieradvybarčy rolik dla šarahovych siabraŭ partyi, jakim, mahčyma, daviadziecca hałasavać u kancy pracesu vybaraŭ.
Elizabet Tras pajšła ŭ adstaŭku 20 kastryčnika, prabyŭšy na pasadzie premjera Brytanii ŭsiaho 45 dzion.
Paśla hetaha pačali raspaŭsiudžvać čutki ab viartańni ŭ vialikuju palityku Džonsana. Kandydaturu byłoha premjera padtrymaŭ ministr abarony Ben Uoles.
U lipieni 2022 hoda svaju raźvitalnuju pramovu Džonsan skončyŭ słovami hieroja filmaŭ pra Terminatara: «Ja viarnusia, dzietka».
