Pałonnyja, uziatyja ŭkrainskaj armijaj padčas kontrnastupu. Skrynšot ź videa

Pałonnyja, uziatyja ŭkrainskaj armijaj padčas kontrnastupu. Skrynšot ź videa

Składana abaraniać pravabiarežny płacdarm, kali ŭsie masty da jaho padarvanyja. Ale jašče składaniej adstupić z hetaha płacdarma biez strat. 

Pozna ŭviečary ŭ čaćvier 20 kastryčnika ŭkrainskaja artyleryja naniesła ŭdar, miarkujučy pa ŭsim, pa pantonnaj pierapravie, raściahnutaj uzdoŭž bietonnaha Antonaŭskaha mosta — nieprydatnaha dla prajezdu techniki paśla ŭdaraŭ «Chajmarsaŭ».

Rasijskaja prapahanda zajaviła, što ŭ vyniku ŭdaru pa pierapravie zahinuli mirnyja hramadzianie.

«Upeŭnieny, što kijeŭski režym viedaŭ, što pieraprava vykarystoŭvajecca vyklučna hramadzianskimi asobami… paciarpieli niepaŭnaletnija, i siarod paciarpiełych — žurnalisty», — dadaŭ kiraŭnik akupacyjnaha ŭrada rehijona.

Ale heta nie vyhladaje praŭdzivaj infarmacyjaj. Pieraprava nie moža vykarystoŭvacca «vyklučna hramadzianskimi asobami», bo jana adna, i, značyć, jaje nie mohuć nie vykarystoŭvać vajskoŭcy. Im prosta niama inšaj darohi dla pierasoŭvańnia.

Rasijskija tanki na pantonnaj pierapravie pad Chiersonam. Fota: rossaprimavera.ru

Rasijskija tanki na pantonnaj pierapravie pad Chiersonam. Fota: rossaprimavera.ru

Akramia taho, udar byŭ naniesieny ŭ pieryjad dziejańnia kamiendanckaj hadziny, kali znachodžańnie mirnych hramadzian na vulicach zabaronienaje rasijskaj administracyjaj.

Źviarnuła ŭvahu, ź jakoj nastojlivaściu rasijskaja ŭłada pravodzić evakuacyju žycharoŭ z pravabiarežža Chiersonskaj vobłaści. Takoha nie nazirałasia ŭ Iziumie, Kupiansku i Limanie.

Heta moža tłumačycca tym, što ŭ vypadku Chiersona mirnyja hramadzianie patrebnyja jak ščyt dla taho, kab mahli evakuiravacca rasijskija vojski.

U adroźnieńnie ad Iziuma i Limana, u Chiersonie adzinaja daroha — heta pantonnaja pieraprava i baržy. Usie stacyjanarnyja masty razburanyja ŭkrainskaj artyleryjaj, a ŭsie pierapravy prastrelvajucca. 

Učarašni abstreł pakazaŭ, što rasijskaja supraćpavietranaja abarona zastajecca niazdolnaja źbivać «Chajmarsy» navat u punktach, dzie abstreł čakajecca. 

Miarkujučy pa spadarožnikavych zdymkach, pačynajučy ad 8 kastryčnika baržy pad Kachoŭkaj pieravozili rasijskija vojski vyklučna ŭ adzin bok — z pravaha na levy, i viartalisia pustyja. Heta aznačaje, što adstupleńnie rasijskich vojskaŭ z-pad Chiersona, jaki robicca nieabaronienym, pačałasia zadoŭha da zajavy hienierała Suravikina, jaki anansavaŭ «niaprostyja rašeńni»: «Dalejšyja dziejańni ŭ dačynieńni da Chiersona buduć zaležać ad isnujučaj vajenna-taktyčnaj situacyi, jana niaprostaja, nie vyklučajecca pryniaćcie niaprostych rašeńniaŭ».

Adnačasova kiraŭnik kałabaracyjnaj administracyi Chiersona anansavaŭ evakuacyju Bierysłava i Śniehiroŭki i ich rajonaŭ.

Usiaho, pa acenkach ekśpiertaŭ, Chierson abaraniali kala 15—20 tysiač rasijskich vajskoŭcaŭ. Navat kali rasijanam udasca paśpiachova advieści asnoŭnuju častku vojskaŭ, zastajecca pytańnie arjerharda — čaściej, jakija buduć prykryvać adychod. Nad imi navisaje pahroza źniščeńnia abo pałonu. U adroźnieńnie ad Iziuma, šlachoŭ dla adstupleńnia ŭ ich minimum, i ŭsie jany mohuć nie tolki papadać pad artyleryjski ahoń, ale i być pierarezanyja ŭkrainskim śpiecnazam.

Precedentu masavaj evakuacyi pavietranym transpartam rasijskaj armija padčas hetaj vajny jašče nie stvarała.

Cieły rasijskich vajskoŭcaŭ lažać uzdoŭž darohi Liman— Kramiannaja, pa jakoj jany adstupali na pačatku kastryčnika. Fota: Evgeniy Maloletka / AP Photo

Cieły rasijskich vajskoŭcaŭ lažać uzdoŭž darohi Liman— Kramiannaja, pa jakoj jany adstupali na pačatku kastryčnika. Fota: Evgeniy Maloletka / AP Photo

U hetym kantekście zajavy Maskvy pra niebiaśpieku padryvu Kachoŭskaj HES hučać złaviesna.

Ukraincam niama stratehičnaj vyhady ŭ padryvie płaciny va ŭmovach kali Chierson traplaje ŭ ich ruki. Što da abstrełaŭ trasy, jakaja viadzie praz HES, to ŭkraincy ažyćciaŭlajuć ich płanamierna ad lipienia, ale vysokaja dakładnaść snaradaŭ «Chajmars» dazvalała kłaści ich roŭna na darohu, a nie na płacinu, navat kali ŭkrainskija vojski stajali dalej da HES, čym ciapier, paśla nastupu z-pad Kryvoha Roha.

Papiaredžańnie prezidenta Zialenskaha, što rasijskija vojski zakłali na Kachoŭskaj HES vybuchoŭku, hučyć bolš praŭdapadobna — bo raźliŭ Dniapra pieraškodziŭ by ryŭku ŭkraincaŭ na levy bierah na chvaście adstupajučych i demaralizavanych rasijskich čaściej.

Trahizm situacyi dla rasijskich vajskoŭcaŭ u tym, što ŭ vypadku pryniaćcia takoha rašeńnia pad chvalu z vadaschovišča moža trapić akurat arjerhard rasijskaj hrupoŭki, jaki, u advarotnym vypadku, papaŭ by na ŭźbiarežžy sa svajoj technikaj u ruki ŭkraincaŭ.

Kožny z hetych scenaroŭ niasie pahrozu dla Uładzimira Pucina, jakomu ŭsio ciažej budzie pierakładać vinu za vajnu, što pieratvarajecca ŭ katastrofu, na hienierałaŭ ci apazicyjnyja koły.

Rasijski frantavy błohier «Trynaccaty», jaki znachodzicca ŭ składzie chiersonskaj hrupoŭki, nie chavaje toj tryvohi i strachu, jaki panuje ŭ jaje šerahach.

«Bližejšyja dni situacyja moža mianiacca, u tym liku ŭ horšy bok. I naviny buduć adpaviednyja», — pisaŭ «Trynaccaty», rasijski nacyjanalist, 18 kastryčnika. 

Ën dadavaŭ: «I ŭsio heta ja zrazumieŭ, jašče kali dva tydni tamu stul vyvozili dziaciej u Rasieju. U sanatoryi i h.d. Tam usie pra ŭsio ŭ kursie byli i da hetaha išło. Linii abarony na miažy z Krymam rychtavali jašče paŭtara miesiaca tamu. 

Da hetaha daviali papiarednija kiraŭniki, jakija dazvolili pierabić usio zabieśpiačeńnie hrupoŭki. Heta vynik biestałkovaha kamandavańnia», — vinavacić jon byłoje kamandavańnie. 

«Tut kali ŭsie faktary sabrać, to načami spać naŭrad ci zachočacca, ja voś ad svaich dumak sa snom užo raźvitaŭsia, tamu što mnie jość za kaho pieražyvać»,— dadaŭ błohier-frantavik.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?