Alaksandr Miarežka
Pavodle vysokapastaŭlenaha parłamientaryja, jość vialikija sumnievy ŭ praŭkrainskaści palityčnych pazicyj Cichanoŭskaj i jaje krytyčnaści adnosna Rasii.
«Pazicyja Cichanoŭskaj u dačynieńni da Rasii i Pucina nie źjaŭlajecca dastatkova vyraznaj. Jana niby baicca nazyvać rečy svaimi imionami. Naprykład, dakładna skazać, što Rasija źjaŭlajecca dziaržavaj-terarystam, ahresaram i voraham biełaruskaha naroda. Akramia taho, u jaje asiarodździ jość krychu sumnieŭnyja ludzi. Jana taksama rabiła zajavy, źviazanyja z Ukrainaj, jakija vyklikali nierazumieńnie va Ukrainie», — skazaŭ Miarežka.
Deputat dadaŭ, što takim lehitymnym biełaruskim orhanam, ź jakim Kijeŭ moh by vieści dyjałoh, moh by stać połk imia Kalinoŭskaha ŭ składzie USU. Pa słovach Miarežki, połk svaimi dziejańniami na froncie dakazaŭ, što maje praŭkrainskuju pazicyju i aŭtarytet siarod biełaruskaj apazicyi.
Na žal, kankretnych prykładaŭ ni zajaŭ Cichanoŭskaj, ci «sumnieŭnych» ludziej u jaje atačeńni Alaksandr Miarežka nie pryvioŭ. Ale zakid u nievyraznaści pazicyi Cichanoŭskaj adnosna staŭleńnia da vajny va Ukrainie vyklikaje ŭ tych, chto za jaje dziejnaściu sačyŭ, miakka kažučy, ździŭleńnie.
Bo, naprykład, užo 24 lutaha, adrazu ž paśla napadu Rasii na Ukrainu Cichanoŭskaja vystupiła ź dźviuma zajavami z hetaj nahody, u jakich absalutna vyrazna akreśliła svoj bok u hetaj vajnie:
«Siońnia zranku Rasija napała na Ukrainu, parušajučy fundamientalnyja pryncypy mižnarodnaha prava. U hetym vierałomnym akcie ahresii była zadziejničanaja biełaruskaja terytoryja i Uzbrojenyja siły Biełarusi.
Łukašenka i jaho režym całkam padzialajuć z prezidentam Rasii adkaznaść za hetuju vajnu.
Nielehitymny kiraŭnik Biełarusi ŭvioŭ zamiežnyja vojski i zrabiŭ našuju krainu niepasrednym udzielnikam kanfliktu. Heta dziaržaŭnaja zdrada i zdrada intaresam našaha naroda i biełaruskaj dziaržavy».
«Heta bolš nie ŭnutrany palityčny kryzis. Heta vajna, ŭ jakoj Biełaruś apynułasia ŭdzielnicaj, chacia my ŭsie byli suprać. Ciapier baranić treba nie tolki palitźniavolennych ci novyja vybary. Baranić treba samoje isnavańnie našaj krainy, jaje niezaležnaść i suvierenitet. Svaboda i adkaznaść zaŭsiody iduć pobač. I nadyšoŭ čas kožnamu uziać adkaznaść za svaju krainu. Stvarać nacyjanalny antyvajenny ruch i rychtavacca adstojvać svoj suvierenitet.
Rodnyja biełarusy, ja b chacieła mieć mahčymaść pahladzieć u vočy kožnaha z vas i skazać, što my razam i što my budziem dzialicca z vami ŭsimi navinami i trymać u kursie padziej.
Darahija ukraincy, ad imia našaj krainy ja vykazvaju vam salidarnaść i padtrymku, a ad imia biełarusaŭ chaču skazać: nam soramna za toje, jakuju rolu terytoryja našaj krainy hraje ŭ hetaj vajnie. I my hatovy rabić usio, što spatrebicca, kab spynić ahressaraŭ i hetuju katastrofu.
Žyvie Biełaruś. I Słava Ukrajini».
Što prymušaje ŭkrainskich dziaržaŭnych mužoŭ ihnaravać hetyja i inšyja padobnyja zajavy, jakich za apošnija amal 8 miesiacaŭ nabrałasia dziasiatki, možna tolki zdahadvacca.
