Časova kiraŭnictva Słuckaj i Salihorskaj jeparchijaj uziaŭ na siabie sam kiraŭnik BPC, mitrapalit Minski i Zasłaŭski Vienijamin. A pryčyny, pa jakich Jaŭsievija pieraviali ŭ inšuju jeparchiju, prytym ź jaŭnym panižeńniem, nie nazyvajucca.

Miž tym na Słuččynie ŭ jepiskapa Jaŭsievija jość aktyŭnyja prychilniki, jakija nie zhodnyja ź jaho pieramiaščeńniem, pra mahčymaść jakoha stała viadoma raniej. Jašče ŭ žniŭni ŭ Słucku stali źbirać podpisy, kab jepiskapa Jaŭsievija pakinuli kiraŭnikom jeparchii. U hety praces byli siarod inšaha zaanhažavanyja i miascovyja ŭłady.

Nie maŭčać hetyja ludzi i ciapier. U adkaz na pryniataje rašeńnie źjaviŭsia list, u jakim vykazvajecca votum niedavieru Mitrapalitu Vienijaminu, jaki, zamiest taho, kab «dapamahać nam na šlachu ŭ našych pamknieńniach da Boha, siejać dabro, mir i spakoj u našych dušach, u našych cerkvach i parafijach, tajemna ździejśniŭ carkoŭnaje złačynstva suprać spraviadlivaści, dadzienaj nam Hospadam našym Isusam Chrystom».

Vierniki zaklikajuć da akcyi niepadparadkavańnia, prosiačy dabračyncaŭ i sponsaraŭ biełaruskich jeparchij i chramaŭ spynić finansavuju dapamohu da adnaŭleńnia spraviadlivaści, a prychadžan pierastać udzielničać u liturhijach ź Mitrapalitam Vienijaminam, prychodziačy da chramaŭ, ale molačysia zvonku.

Taksama aŭtary lista źviartajucca da orhanaŭ dziaržaŭnaj ułady i siłavych struktur z prośbaj «davieści da svajho kiraŭnictva nieabchodnaść paŭpłyvać na hetuju situacyju z metaj nastaŭleńnia carkoŭnaha čynoŭnika» (h. zn. mitrapalita Vienijamina).

Urešcie, aŭtary lista viernapaddana źviartajucca i da Łukašenki «jak da čałavieka pravasłaŭnaha» z prośbaj «na svaim vyšejšym uzroŭni danieści da Śviaciejšaha Patryjarcha Kiryła našu prośbu razabracca i vyrašyć hetuju prablemu dla ŭstanaŭleńnia miru ŭ našych sercach i chramach».

Cikava, što 47-hadovy jepiskap Jaŭsievij (Ciuchłoŭ) u stanoviščy svaim zusim niadaŭna, tolki z červienia hetaha hoda. Da hetaha jon 13 hadoŭ byŭ namieśnikam Łaŭryšaŭskaha manastyra na Navahradčynie. Jaho papiarednikam byŭ jepiskap Antonij, pieraviedzieny na hrodzienskuju archijepiskapskuju kafiedru paśla taho, jak ź jaje pa palityčnych mierkavańniach zvolnili archijepiskapa Arciemija. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?