Fota z sajta «Bi-bi-si»

Fota z sajta «Bi-bi-si»

Ruskaja słužba «Bi-bi-si» viadzie pajmienny śpis strat rasijskich vajskoŭcaŭ va Ukrainie sumiesna z vydańniem «Miedyjazona» i kamandaj vałancioraŭ. Na 14 kastryčnika ŭdałosia paćvierdzić infarmacyju pra 7502 zahinułych sałdat i aficeraŭ.

Žurnalisty abapirajucca tolki na paćvierdžanyja paviedamleńni pra hibiel, tamu sabranyja danyja nie adlustroŭvajuć realny ŭzrovień strat.

Ale, hruntujučysia na tysiačach kankretnych historyj zahinułych, možna zrazumieć i praanalizavać, što mienavita adbyvajecca z rasijskaj armijaj padčas uvarvańnia ŭ susiedniuju krainu.

Ujaŭleńnie ab tym, jakaja kolkaść zahinułych nie zhadvajecca ŭ aficyjnych paviedamleńniach, daje infarmacyja z mohiłak. Kožny tydzień novyja pachavańni rasijskich vajskoŭcaŭ, pra jakija nie paviedamlali miascovyja ŭłady, vyjaŭlajucca ŭ roznych nasielenych punktach Rasii 

Na padstavie hetych nazirańniaŭ možna vykazać zdahadku, što śpis paćvierdžanych strat, jaki viadzie «Bi-bi-si», moža ŭtrymlivać prynamsi na 40-60% mienš imionaŭ zahinułych, čym realna pachavana ŭ Rasii.

Takim čynam, pa najbolš kansiervatyŭnaj acency, straty rasijskaj armii i Rashvardyi va Ukrainie mohuć składać kala 15000 čałaviek.

Pa acency ekśpierta Centra vajenna-marskoha analizu Majkła Kofmana, na kožnaha zahinułaha rasijkaha vajennaha padčas vajny va Ukrainie prypadaje kala 3,5 paranienych. Na asnovie hetych danych, možna mierkavać, što niezvarotnyja straty Rasii (heta značyć, kolkaść tych, chto vybyŭ sa stroju pa pryčynie ranieńnia, śmierci abo prapaŭ bieź viestak) mohuć składać prynamsi 53000 čałaviek.

Na hetym tydni rasijskija ŭłady ŭpieršyniu paćvierdzili hibiel mabilizavanych na terytoryi Ukrainy. Pieršyja — tady jašče nieaficyjnyja — paviedamleńni ab bajavych stratach siarod pryzvanych u ramkach častkovaj mabilizacyi źjavilisia na pačatku tydnia. A ŭ čaćvier urad Čalabinskaj vobłaści paćvierdziŭ hibiel piaciarych mabilizavanych, adpraŭlenych na vajnu va Ukrainie. Usiaho na 14 kastryčnika na padstavie adkrytych krynic viadoma pra hibiel 11 mabilizavanych na terytoryi Ukrainy.

Novyja alei na mohiłkach

Pa kolkaści paćvierdžanych strat pa-raniejšamu lidziruje Dahiestan (319 čałaviek), na druhoje miesca vyjšaŭ Krasnadarski kraj (303 čałavieki), za im idzie Buracija (297 čałaviek). Dla paraŭnańnia: viadoma tolki pra 29 zahinułych z Maskvy, choć žychary rasijskaj stalicy składajuć amal 9% nasielnictva Rasii.

U mnohich rehijonach Rasii, dzie nie pracujuć sacyjalnyja lifty, słužba ŭ armii pa kantrakcie źjaŭlajecca ledź ci nie adzinaj mahčymaściu atrymać stabilny zarobak.

Rasijskija čynoŭniki ŭsio radziej i radziej publična paviedamlajuć pra hibiel vajskoŭcaŭ va Ukrainie, tamu važnymi krynicami infarmacyi stanoviacca pomniki: naściennyja tablički ŭ škołach, nadmahilli na mohiłkach, miemaryjały ŭ parkach i voinskich čaściach.

Za minuły miesiac «Bi-bi-si» ŭdałosia daviedacca pra novyja pachavańni vajskoŭcaŭ na mohiłkach Kalininhradskaj i Omskaj abłaściej, u Padmaskoŭi, a taksama ŭ Krasnajarskim i Prymorskim krajach. Usiaho z pačatku vajny ŭdałosia vyvučyć pachavańni na bolš čym 60 mohiłkach u nasielenych punktach ad Kalininhrada da Uładzivastoka.

Praktyčna na kožnym ź ich vyjaŭlajucca nie tolki pachavańni tych, pra čyju hibiel paviedamlałasia publična, ale i prykładna stolki ž (a časam i bolš) nadmahillaŭ sałdat i aficeraŭ, pra śmierć jakich nie paviedamlali ni ŭłady, ni miascovyja žurnalisty, ni svajaki ŭ sacsietkach.

Za minuły miesiac na vajennaj alei mohiłak u Miadźviedzieŭcy (Kalininhradskaja vobłaść) źjaviŭsia ceły šerah novych mahił. Z 29 pachavańniaŭ sałdat i aficeraŭ, jakija zahinuli paśla 24 lutaha 2022 hoda, imiony 11 čałaviek — to bok 38% — nie nazyvalisia publična. Na mohiłkach va Usuryjsku taksama źjavilisia dadatkovyja šerahi z mahiłami vajskoŭcaŭ. Pra 11 z 16 pachavanych sałdat i aficeraŭ — a heta 68% — nie zhadvali ni ŭ aficyjnych zvodkach, ni ŭ publikacyjach u sacsietkach.

Adbornyja častki

Tolki pa paćvierdžanych danych, bolš za 2200 zahinułych — heta elitnyja śpiecyjalisty: sałdaty i aficery atradaŭ śpiecnaza, marskija piechacincy i vajennyja lotčyki. Na ich padrychtoŭku syšli hady trenirovak i miljony dalaraŭ.

U adnoj tolki apieracyi pa niaŭdałaj abaronie Limana, jak stała viadoma «Bi-bi-si», zahinuła cełaje adździaleńnie śpiecnazu HRU z Taljaci.

Hety i inšyja elitnyja atrady rasijskaj armii i Nachvardyi niasuć adčuvalnyja straty padčas vajny na terytoryi Ukrainy, pakolki ich sistematyčna vykarystoŭvajuć dla vyrašeńnia nieŭłaścivych im zadač. Naprykład, raźviedčykaŭ pryciahvajuć dla nadhladu i pravierki vulic u zachoplenych nasielenych punktach, a atrady Rashvardyi — dla ahulnavajskovych bajoŭ i abarončych dziejańniaŭ.

Kamandziry

Z 7502 ustanoŭlenych rasijskich vajskoŭcaŭ, jakija zahinuli va Ukrainie, 1278 čałaviek, heta značyć 17%, — aficery. Siarod zahinułych — čatyry hienierały i 39 pałkoŭnikaŭ.

Miarkujučy pa danych za vosiem miesiacaŭ, najbolšaja dola strat pryjšłasia na małodšych aficeraŭ. Jany hinuć u niekalki razoŭ čaściej, čym ich padnačalenyja.

Jašče da pačatku ŭvarvańnia va Ukrainu rasijskaja armija adčuvała niedachop vopytnych kantraktnikaŭ i niedaŭkamplektavanaść mnohich vajennych častak. Pa acency śpiecyjalistaŭ, Rasija ŭstupiła ŭ vajnu, majučy va uzbrojenych siłach lišak vajennaj techniki i vostry niedachop navučanaha asabistaha składu.

U vyniku ŭ chodzie vajny kamandziry vymušanyja kamandavać u bai sałdatami, jak siaržanty, asabista vieści ich u ataku abo trymać ź imi abaronu zamiest taho, kab kiravać bajavymi dziejańniami praz padnačalenych. Pry hetym mnohija małodšyja aficery jašče maładyja (zvańnie lejtenanta čaściej za ŭsio atrymlivajuć u 21-22 hady) i niavopytnyja, ale ŭžo vymušanyja vyrašać, jak mienavita damahčysia metaŭ, pastaŭlenych kamandavańniem.

Pa rodach vojskaŭ

Da dziaviataha miesiaca vajny najbolšaja kolkaść strat — 21% — prypadaje na piachotu.

A voś dola zahinułych desantnikaŭ pastupova źnižajecca. Na 14 kastryčnika 16% usich ustalavanych zahinułych — z PDV, choć da pačatku žniŭnia byŭ kožny piaty. Miarkujučy pa adkrytych krynicach, mnohija padraździaleńni PDV panieśli istotnyja straty zabitymi i paranienymi, i tamu ŭžo nie mohuć udzielničać u pieradavych apieracyjach u raniejšym abjomie.

Ciapier, pavodle śviedčańnia krynic «Bi-bi-si» na pieradavoj, asnoŭnaja šturmavaja nahruzka kładziecca na padraździaleńni PVK i atrady tych, kaho rasijskija dziaržaŭnyja ŚMI nazyvajuć dobraachvotnikami (pavodle źviestak šerahu pravaabaroncaŭ, prynamsi ŭ Čačni, niekatorych prymušajuć zapisvacca ŭ atrady «dobraachvotnikaŭ», pahražajučy surjoznymi prablemami dla blizkich u vypadku admovy).

Pierad adpraŭkaj na front atrady «dobraachvotnikaŭ» časta prachodziać tolki 3-10 dzion padrychtoŭki. Mabyć, jašče i tamu takija «dobraachvotniki» praciahvajuć zastavacca samaj chutkarosłaj katehoryjaj strat.

Da 14 kastryčnika paćvierdžanaja infarmacyja pra hibiel va Ukrainie prynamsi 16 źniavolenych, jakija vajavali ŭ składzie rasijskich vajenizavanych padraździaleńniaŭ.

Pieršym pra viarboŭku rasijskich źniavolenych dla adpraŭki na front raspavioŭ prajekt Gulagu.net na pačatku lipienia. Zatym pra heta napisali žurnalisty niekalkich vydańniaŭ. Pa padlikach «Miedyjazony», da kanca žniŭnia na vajnu adpravili jak minimum 480 źniavolenych.

Jakoj moža być ahulnaja kolkaść zahinułych?

Z ulikam infarmacyi, jakaja pastupaje z rasijskich mohiłak i miemaryjałaŭ, śpis paćvierdžanych strat, jaki viadzie «Bi-bi-si», moža ŭtrymlivać prynamsi ŭ dva razy mienš imionaŭ zahinułych va Ukrainie vajskoŭcaŭ, čym realna pachavana ŭ Rasii.

Vynikovaja ličba taksama istotna ŭzrastaje, kali ŭ śpis strat uklučyć tych, chto vajavaŭ na baku Rasii ŭ składzie «narodnych milicyj» Daniecka i Łuhanska.

Na 7 kastryčnika ŭłady samaabvieščanaj «DNR» pryznali hibiel 3285 vajskoŭcaŭ, u samaabvieščanaj «ŁNR» pra straty nie paviedamlajuć, ale z adkrytych krynic vynikaje, što lik idzie prynamsi na sotni čałaviek.

Akramia hetaha ŭ hrupach prychilnikaŭ «DNR» i «ŁNR» u sacsietkach «Bi-bi-si» vyjaviła bolš za 4000 paviedamleńniaŭ i pastoŭ ludziej, jakija šukajuć svaich svajakoŭ mužčynskaha połu, jakija apynulisia ŭ šerahach «narodnych milicyj» i daŭno nie vychodzili na suviaź. Niekatoryja z tych, kaho šukali ŭ pieršyja miesiacy vajny, užo viarnulisia dadomu «hruzam 200».

Pavodle acenki brytanskaj raźviedki, da vieraśnia Rasija straciła va Ukrainie 25 tysiač vajskoŭcaŭ. Hienštab Ukrainy aceńvaje straty Maskvy ŭ 60 tysiač čałaviek.

Ministerstva abarony Rasii apošni raz vykazvałasia pra straty 21 vieraśnia, paviedamiŭšy pra hibiel 5937 čałaviek. U pajmiennym śpisie strat «Bi-bi-si» na toj momant było bolš za 6200 proźviščaŭ.

Клас
16
Панылы сорам
4
Ха-ха
0
Ого
0
Сумна
8
Абуральна
5