Katavalnia ŭ padvale palicejskaha ŭčastka, dzie rasijskija vajskoŭcy ŭtrymlivali pałonnych u Iziumie. 22 vieraśnia 2022 hoda. Fota: Evgeniy Maloletka / AP / Scanpix / LETA
Žurnalisty pabyvali ŭ Iziumie paśla jaho vyzvaleńnia. Jany ŭstanavili miescaznachodžańnie 10 rasijskich katavalniaŭ i naviedali piać ź ich. Siarod ich byli hłybokaja jama ŭ žyłym kompleksie z nadrapanymi datami na cahlanaj ścianie, zołkaja padvalnaja turma, jakaja pachła mačoj i pratuchłaj ježaj, a taksama budynak miedycynskaj kliniki, adździaleńnie palicyi i dziciačy sad.
Žurnalisty AP pahavaryli z 15 ludźmi, jakija pieražyli katavańni, i dźviuma siemjami, čyje svajaki tak i nie viarnulisia z rasijskaha pałonu. Z hetych hutarak vyśvietliłasia, što jak minimum vosiem čałaviek pamierli ŭ rasijskim pałonie. Siamiora ź ich nie mieli dačynieńnia da Uzbrojenych siłaŭ Ukrainy.
Akramia hetaha, žurnalisty pabyvali na miescy masavaha pachavańnia ŭ lesie, adnaho z troch vyjaŭlenych paśla adstupleńnia rasijskaha vojska. Tam byli pachavanyja ludzi sa źviazanymi rukami. Nie mienš za 30 ciełaŭ z tych, što byli niadaŭna ekshumavanyja, mieli vidavočnyja ślady katavańniaŭ, piša AP sa spasyłkaj na Charkaŭskuju prakuraturu. Žurnalisty taksama ŭbačyli sotni śpiecham paźbivanych draŭlanych kryžoŭ, u bolšaści svajoj biezymiennych. Na adnym ź ich było napisana, što tut pachavanyja 17 ukrainskich sałdat.
Lekar, jaki lačyŭ paranienych padčas rasijskaj akupacyi, raskazaŭ AP, što da jaho rehularna prychodzili ludzi ź vidavočnymi śladami katavańniaŭ, uklučajučy ahniastrelnyja ranieńni kiściaŭ i stopaŭ, pierałomy i apioki, ale nichto nie chacieŭ tłumačyć pachodžańnie hetych traŭmaŭ. «Navat kali ludzi i prychodzili ŭ balnicu — maŭčańnie było normaj», — raspavioŭ lekar Juryj Kuźniacoŭ.
AP parazmaŭlała z 26-hadovym Andrejem Kocaram, vajskoŭcam USU, jakoha žurnalisty ŭbačyli ŭ Iziumskim manastyry ŭ honar Piasčanskaj ikony Božaj Maci. Jon raspavioŭ, što nie paśpieŭ i miesiaca prasłužyć u vojsku, jak pačałosia ŭvarvańnie. U sakaviku jaho schapili pieršy raz. Tady rasijskija vajskoŭcy źviazali jaho i kinuli ŭ tranšeju, dzie jon pravioŭ niekalki dzion. Zatym jaho pačali źbivać: bili rukami, nahami i małatkom pa kaleniach. Pakolki jon nie moh dać nijakaj infarmacyi, jaho adpuścili, papiarednie zabraŭšy pašpart i vajskovy bilet. «Ty nikomu nie patrebien. My možam u luby momant ciabie zastrelić i zakapać na paŭmietra pad ziamlu», — skazaŭ adzin z rasijskich vajskoŭcaŭ.
Andrej Kocar, vajskoviec USU, jakoha rasijskija žaŭniery katavali ŭ Iziumie. 21 vieraśnia 2022 hoda. Fota: Evgeniy Maloletka / AP / Scanpix / LETA
Paśla vyzvaleńnia Kocar vyrašyŭ schavacca ŭ manastyry. Praź niekalki dzion jon pasprabavaŭ syści ŭ inšaje schovišča, ale pa darozie jaho zatrymaŭ rasijski patrul. U pałonie jaho trymali tydzień. «Jany vykarystoŭvali, ja dakładna nie viedaju, niešta nakštałt žaleznych, moža šklanych stryžniaŭ, spalvali skuru patroški», — raspavioŭ ukrainski vajskoviec.
U lipieni Kocara zatrymali treci raz. Jaho ŭtrymlivali ŭ haražach pobač ź miascovaj klinikaj i znoŭ katavali, u tym liku z vykarystańniem toku. U pałonie jon pravioŭ niekalki tydniaŭ, paśla čaho jaho znoŭ adpuścili.
U katavalnaj kamiery, dzie ździekavalisia z Andreja Kocara, taksama pabyvaŭ 38-hadovy Mikałaj Masiakin. Jon pastupiŭ na słužbu ŭ armiju ŭžo paśla pačatku rasijskaha ŭvarvańnia.
Pieršy raz Masiakina zatrymali viasnoj. Jaho kinuli ŭ jamu sa stajałaj vadoj, nadzieli kajdanki i padviesili za ich. «Jany bili mianie pałkami. Jany bili mianie rukami, jany bili nahami, tušyli ab mianie cyharety, padpalvali zapałkami. Adnojčy jany skazali: «Tancuj», ale ja nie staŭ — tady jany prastrelili mnie nahu», — raspavioŭ były pałonny. Praź niekalki dzion jaho vysadzili la lakarni, zapatrabavaŭšy, kab jon kazaŭ lekaram, što trapiŭ u avaryju.
Nieŭzabavie Masiakina znoŭ zatrymali i dastavili ŭ budynak škoły № 2, dzie jaho źbivali razam ź inšymi źniavolenymi. Pa źviestkach AP, minimum dvoje mirnych žycharoŭ zahinuli ŭ hetaj škole. Paźniej Masiakina adpuścili, ale praź niekalki dzion schapili znoŭ. Hetym razam jaho źmiaścili ŭ haraž niedaloka ad kliniki. Razam ź im trymali bolš za 12 čałaviek.
Masiakin raspavioŭ, što pobač z klinikaj było čatyry haražy: u dvuch utrymlivali mužčyn, u adnym — žančyn, a ŭ samym vialikim — z aknom — žyli rasijskija vajskoŭcy. Masiakin i Kacar raspaviali žurnalistam, što pa načach čuli kryki z haraža, dzie znachodzilisia žančyny. AP piša, spasyłajučysia na ŭkrainskuju vyviedku, što žančyny rehularna padviarhalisia seksualnamu hvałtu.
Pa słovach Masiakina, u klinicy było abstalavana nie mienš za dźvie katoŭni: adna dla katavańniaŭ tokam, inšaja dla katavańniaŭ vadoj. Jon prajšoŭ praz abiedźvie. Tam ža jon bačyŭ, jak rasijskija sałdaty vynosili cieły zabitych.
Ludmiła Šabielnik, maci zabitaha ŭ Iziumie Ivana Šabielnika. 25 vieraśnia 2022 hoda. 25 vieraśnia 2022 hoda. Fota: Evgeniy Maloletka / AP / Scanpix / LETA
Ab pieražytych katavańniach žurnalistam na ŭmovach ananimnaści raskazali jašče try čałavieki. Adkryta pahavaryć z AP pahadziłasia siamja zahinułaha Ivana Šabielnika — jahonaje cieła razam z dvuma inšymi było znojdziena ŭ siaredzinie žniŭnia ŭ lesie.
Apošni raz Šabielnika bačyli 23 sakavika, kali jon ź siabram pajšoŭ u les pa šyški dla raspalvańnia samavara. Paźniej adzin z byłych pałonnych raspavioŭ siamji Šabielnika, što Ivana spačatku katavali ŭ padvale susiedniaha doma, a paźniej pieravieźli ŭ škołu № 2.
Zabitaha Ivana Šabielnika apaznali pa kurtcy. Jahony tvar byŭ źniaviečany da niepaznavalnaści, rebry złamanyja, a ruki prastrelenyja. Siastra adviała žurnalistaŭ da jaho mahiły. «Jany katavali mirnych žycharoŭ prosta pa žadańni. Dla hetaha jość tolki adno słova — hienacyd», — skazała jana.