Julij Anieška («Julik»)
Fota: sacsietki
Učora ŭ siecivie źjavilisia paviedamleńni pra toje, što błohier Julij Anieška («Julik») vyjazdžaje z krainy i staić u čarzie ŭ punkcie propusku «Vierchni Łars» na miažy z Hruzijaj.
A Julik, miž tym, rekłamavaŭ čarhovaje pieraabrańnie Pucina ŭ 2018 hodzie u prajekcie «Lenty.ru» «Chto tvoj kandydat?».
Vokładka rolika. Paźniej Julij vydaliŭ jaje sa svajho kanała
Nakont «śpiecapieracyi» 29-hadovy Julik publična nie vykazvaŭsia. Ale ŭ adnym sa strymaŭ ź inšym błohieram jon skazaŭ, što «ŭ krainie, u jakoj rakiet bolej, čym žycharoŭ inšaj krainy, hieahrafiju viedać nie treba, bo rakiet chopić na ŭsich».
Michaił Łazucin («Leŭ suprać»)
Fota: sacsietki
27-hadovy Michaił Łazucin (nie błytać z łukašenkaŭskim prapahandystam Andrejem Łazutkinym) — vychadziec z asiarodku rasijskich ultrapravych.
Jaho pieršaj idejaj byŭ «ruch» «Leŭ suprać piedafiłaŭ», u jakim jon kapijavaŭ akcyi rasijskaha nieanacysta-niabožčyka Maksima «Ciesaka» Marcinkieviča ź jaho «Akupaj-piedafilaj». U svaich videa Leŭ zmušaŭ piedafiłaŭ prynižacca. Adnamu čałavieku tykaŭ sabačymi hienitalijami ŭ tvar. U adnaho ź piedafiłaŭ, jaki akazaŭsia nie piedafiłam, adabraŭ hrošy i telefon, za što na jaho ledź nie zaviali kryminalnuju spravu.
Paśla hetaha Łazucin stvaryŭ «Fiederalny ruch «Leŭ Suprać» (Leŭ, bo jon Leŭ pa znaku Zadyjaka) — inicyjatyvu pa baraćbie z raśpićciom ałkaholu i kureńniem u niedazvolenych miescach. Ën zdymaŭ videa, jak jon padychodzić da roznych ludziej, jakija pjuć ci kurać dzie nie treba, i čaplajecca da ich. Ź im razam chodziać niekalki dužych chłopcaŭ, jakija abaraniajuć jaho, kab jamu nie prylacieła ŭ adkaz.
Spačatku ŭ jahonyja «rejdy» razam ź im chadzili ŭdzielniki ultrapravasłaŭnaha — choć sam Łazucin pa baćku Džemałavič — ruchu «Sorak sarakoŭ» (SS). U 2014 hodzie hetyja pravasłaŭnyja fundamientalisty ŭdzielničali va ŭkrainskich «Antymajdanach», hurtavalisia vakoł Ihara Hirkina, a ŭ 2021-m adznačylisia krytykaj vakcynacyi ad kavidu z raspaŭsiudam roznych kanśpirałahičnych teoryj.
Tolki z 2014 pa 2015 hady ruch Łazucina atrymaŭ kramloŭskich hrantaŭ na bolš čym 12 miljonaŭ rasijskich rubloŭ.
Fota z sajta «prezidenckich hrantaŭ» Rasii
Z časam jahony kanał pačaŭ hublać papularnaść i jon vyrašyŭ «abvastrać». «Leŭ» z kampanijaj raspačynali bojki. Padčas hetych bojek ludzi časta atrymlivali ciažkija traŭmy, pad razdaču traplali piensijaniery, absalutna ćviarozyja invalidy, dzieci i žančyny. Rasijskaja palicyja na ŭsio heta nie reahavała, što śviedčyć pra mahčymuju suviaź Łazucina z uładami.
Pra vajnu jon na svaich staronkach ničoha nie kazaŭ, ale ŭ adnym ź videa jon vystupaje suprać čałavieka, jaki kaža, što «jakoha ch** my zabyli va Ukrainie» i kaža, što «ŭ vajskoŭcaŭ RF takoje pryzvańnie (iści na vajnu — NN), jak u pažarnych tušyć pažary».
Mikałaj Sobaleŭ
Fota: sacsietki
Mikałaj Sobaleŭ — 29-hadovy błohier, biznesoviec i śpiavak.
Sobaleŭ paŭdzielničaŭ u pieradvybarčaj rekłamie mera Maskvy Siarhieja Sabianina. Tady dziasiatki rasijskich błohieraŭ kinulisia rekłamavać toje, jak «raskvitnieła Maskva pry meru Sabianinie». Sobaleŭ paśla śćviardžaŭ, što «nie viedaŭ», što jaho rolik budzie skarystany ŭ takich metach.
U 2017 hodzie jon udzielničaŭ u prapahandysckaj sustrečy z ultrakansiervatyŭnym ministram kultury Rasii Uładzimiram Miadzinskim.
Miadzinski z błohierami. Sobaleŭ šosty źleva. Fota: wikireality.ru
A ŭ mai biahučaha hoda ŭ intervju zajaviŭ nastupnaje:
«Naša Radzima nie daruje pakajańnia. Heta ŭsim było skazana! <…> Čaho Rasija nie daruje — heta pakajańnia. Voś hetaha «soramna być ruskim». Ciapier Rasija dla hetych ludziej začynienaja».
Tam ža jon zapeŭnivaŭ, što «ŭ jaho nie było dumak vyjechać z Rasii» i kazaŭ, što «budučynia Rasii zaležyć ad vynikaŭ śpiecapieracyi».
Udakładnieńnie. Čytačy «Našaj Nivy» padkazali, što Sobaleŭ ad samaha pačatku vajny zajmaje antyvajennuju pazicyju. U pačatkovaj viersii artykuła pra heta nie havaryłasia.
Juryj Chavanski
Fota: sacsietki
32-hadovy Chavanski — błohier, repier i komik, jaki prasłaviŭsia skandalnymi vykazvańniami i vychadkami. Ale jon paŭdzielničaŭ i ŭ kramloŭskich prajektach.
U 2018 hodzie, akurat pierad čarhovym pieraabrańniem Pucina, jon vypuściŭ klip «Seks, buchło, rasijski rep», u jakim ahitavaŭ moładź iści hałasavać. Heta taksama akazałasia klipam dla prajekta «Chto tvoj kandydat?». Paśla taho jak ad Chavanskaha pačali masava adpisvacca, a mnohija błohiery asudzili jahony ŭčynak, jon pačaŭ śćviardžać, što «na im prosta zachacieli adpracavać biudžet» i jon «nie budzie raicca z adkidami, jakim jon ničoha nie pavinien».
Fota: tjournal.ru
Užo ŭ 2019 hodzie Chavanski staŭ pamočnikam samaha maładoha deputata Dziarždumy Rasii Vasilija Ułasava. Toj prasłaviŭsia, siarod inšaha, tym, što prapanavaŭ dazvolić ipateku z 14 hadoŭ. Tady Chavanski zajaviŭ, što psieŭdaapazicyjnaja Libieralna-demakratyčnaja partyja Žyrynoŭskaha — «samaja prahresiŭnaja partyja».
Ale ŭ 2021 hodzie Chavanski trapiŭ u niamiłaść. 9 červienia 2021 hoda jaho aryštavali pa sfabrykavanych abvinavačańniach — byccam by jon u 2018 hodzie vykanaŭ pieśniu, jakaja «apraŭdvaje teraryzm». Ale nasamreč jon vykanaŭ pieśniu ŭ 2012 hodzie, kali takoha zakona nie isnavała. Praz hramadski rezanans historyja skončyłasia ničym: u śniežni jaho vypuścili ź SIZA, a ŭ lipieni sprava razvaliłasia.
Praŭda, u intervju Ksienii Sabčak paśla vychadu ź SIZA Chavanski abciakalna niamiaknuŭ na toje, što nie padtrymlivaje vajny suprać Ukrainy i zajaviŭ, što «svabody słova ŭ Rasii my bolej nie pabačym». Z pačatkam mabilizacyi jon vyjechaŭ u Sierbiju.
Husiejn Hasanaŭ
Fota: sacsietki
28-hadovy Hasanaŭ — adzin z samych papularnych błohieraŭ Rasii. Na jahony instahram padpisanyja bolš za 20 miljonaŭ čałaviek. Palityki jon paźbiahaŭ, tamu ŭ palityčnych skandałach nie zamiašany, akramia taho, što na jahonaje pytańnie pra błakavańnie telehrama ŭ Rasii «źnianacku» adkazaŭ asabista Pucin. Hałoŭnaja pretenzija da jaho z boku hramadstva ŭ tym, što jon ašukaniec.
Pieršy hučny skandał adbyŭsia ŭ 2019 hodzie. Tady jon pravioŭ «rozyhryš» aŭtamabila za niekalki socień tysiačaŭ dalaraŭ. Paśla rozyhryšu vyjaviłasia, što aŭto nie novaje, dziaŭčyna, jakaja jaho vyjhrała — padstaŭnaja asoba, a aŭtamabil prosta pradali. Takich fejkavych rozyhryšaŭ jon zrabiŭ niekalki, i navat zładziŭ fejkavyja kursy.
Taksama Hasanava vinavaciać u nakrutcy padpisantaŭ, bo na jaho padpisanyja niekalki miljonaŭ pustych abo «arabskich» akaŭntaŭ.
Jašče z Rasii vyjechali komik i pradziusar Alaksandr Hudkoŭ i błohiery Maksim Hałapałosaŭ («Maks +100500») — ale jany jak asudzili vajnu va Ukrainie, hetak i nie byli zamiašanyja ŭ kramloŭskich prajektach, a Hudkoŭ navat vypuściŭ mocny klip «Ja vuzki», u jakim pahłumiŭsia z rasijskich ura-patryjotaŭ.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
