Skrynšot ź videa
Alaksandra Łukašenku supravadžaŭ jaho 18-hadovy syn Mikałaj, jaki dziela hetaha, treba razumieć, prapuściŭ zaniatki ŭ Biełaruskim dziaržaŭnym univiersitecie, dzie jon nibyta vučycca.
Hości prybyli moram. U Alaksandra Łukašenki zastajucca prablemy z kalennym sustavam: jon zaŭvažna kulhaŭ, padymajučysia ad pryčała da kiraŭnika Abchazii Asłana Bžanii, jaki sustrakaŭ jaho ŭ dziaržaŭnaj rezidencyi. Prytym Łukašenka rabiŭ vyhlad, što jany z Bžanijaj staryja siabry, nazyvaŭ jaho na «ty» i pa imieni, choć raniej pra ich asabistaje znajomstva infarmacyi nie było.
Biełaruskuju delehacyju praviali subtrapičnym parkam. U niejki momant pierad haściami stancavali imklivy abchazski taniec.
Za stałom pieramovaŭ Asłan Bžanija pryvitaŭ Łukašenku pa-abchazsku: «Bziała uaabieit, Alaksandr Hryhory-ipa!», paśla havaryŭ pa-rusku. Kab zrabić Łukašenku pryjemnaje, jon uspomniŭ pra toje, što toj kaliści, jašče ŭ dalokim 1996 hodzie na samicie SND, vykazaŭsia suprać błakady Abchazii. Bolš śviežych prykładaŭ, vidać, nie znajšłosia. Taksama Bžanija vykazaŭsia pra toje, jak dobra było b viarnuć adnosiny pamiž narodami na ŭzrovień jak u «dobryja savieckija časy» — choć uvohule ŭ abchazskaj publičnaj rytorycy savieckija časy zvyčajna zusim nie ličacca dobrymi.
Łukašenka padtrymaŭ nastalhičnuju notku i zhadaŭ pra toje, jak jon kaliści naviedvaŭ hety kraj, pa svajoj zaŭsiodnaj zvyčcy nie źviartajučy ŭvahu na dakładnaść faktaŭ. Pavodle jaho akazałasia, što naviedvaŭ jon Abchaziju 25—27 hadoŭ tamu, kali jašče nie byŭ abrany prezidentam (choć z 1994 hoda prajšło ŭžo 28). Abchazy hetaje niesupadzieńnie, vidać, zaŭvažyli, ale nie viedajučy, jak jaho raźviazać, napisali ŭ aficyjnym pierakazie vystupleńnia Łukašenki, što jon byŭ u Abchazii ŭ 25-27 hadoŭ, to-bok u maładości. Choć sam jon paśla ž udakładniŭ, što tady byŭ deputatam parłamienta.
Uvohule vystup Łukašenki abchazskaje aficyjnaje ahienctva «Apsnypres» (anałah našaha BiełTA) pierakazała dastatkova padrabiazna. Ale pakazalna, što prybrała adzin pasaž, kali Łukašenka staŭ nachvalvać kiraŭnictva Hruzii: «Šmat my abmiarkoŭvali prablemu Abchazii i z byłymi kiraŭnikami Hruzii. Jany mnie prosta raskazvali pra Abchaziju. Ja znoŭ taki nie budu kankretyzavać publična heta, ale ničoha kiepskaha ja nie zaŭvažyŭ. Što ździviła mianie. Ničoha kiepskaha nie zaŭvažyŭ». Dla abchazaŭ takija vykazvańni — «niepalitkarektnyja». Kali b takoje skazaŭ miascovy palityk, to heta, chutčej za ŭsio, mieła b vynikam palityčny skandał.
Sučasnaja Abchazija — vynik kryvavaha kanfliktu i plon žadańnia Rasii stvaryć padkantrolnuju sabie terytoryju za Kaŭkazskim chrybtom. Nasielnictva Abchazii na siońnia składaje ad 170 tysiač čałaviek pa acenkach Tbilisi da 245 tysiač čałaviek u acenkach kiraŭnikoŭ Abchazii. Da hruzina-abchazskaha kanfliktu 1992—1993 hadoŭ nasielnictva składała kala 530 tysiač čałaviek, ź jakich było tolki 18% abchazaŭ i 47% hruzinaŭ. Na siońnia dola abchazaŭ vyrasła da 51%, a hruzinaŭ — upała da 19%, prytym amal usie jany žyvuć va ŭschodnich Halskim (99% nasielnictva) i Tkvarčelskim (63%) rajonach, kudy miascovym hruzinam (minhrełam) praź niejki čas było dazvolena viarnucca paśla vyhnańnia ŭ 1993 hodzie.
Abchazy zdoleli pieramahčy ŭ etničnym kanflikcie dziakujučy dapamozie Maskvy. Finalnym punktam stała ŭviadzieńnie rasijskich vojskaŭ u 2008 hodzie. Abchazija, jak i Paŭdniovaja Asiecija i Prydniastroŭje, niesamastojnaje dziaržaŭnaje ŭtvareńnie, zaležyć ad rasijskaj abarony i finansavańnia.
Alaksandr Łukašenka, jaki staŭ pieršym kiraŭnikom zamiežnaj dziaržavy, jaki pabyvaŭ u Suchumi, havaryŭ ahulnyja słovy pra nieabchodnaść družby i raźvićcia ekanamičnych adnosin, pra hatoŭnaść pamahčy abchazam tym, čym možna.
Pry hetym zhadaŭ, što niejki «hienierał» — mieŭsia na ŭvazie, chutčej za ŭsio, Viktar Šejman, jaki siadzieŭ pobač — byvaŭ tut nieadnarazova ź niejkimi zadańniami i raniej.
Alaksandr Łukašenka namiaknuŭ, što hety vizit nie źviazany ź ciskam Pucina i słabaściu pazicyi ciapierašniaj biełaruskaj administracyi: «U nas narmalnaja situacyja. My nie pakutujem na nijakuju hieapalityku. My prosta, jak i vy, mirny, dobry, pracavity narod i chočam žyć u zhodzie. A ekanomika, handlova-ekanamičnyja suviazi pavinny stać padmurkam našych adnosin. Inšaha nie dadziena».
Źbiadniełaja i izalavanaja 200-tysiačnaja Abchazija, adnak, nie moža dać Biełarusi nijakich asablivych vyhad, nie ŭjaŭlaje kaštoŭnaści jak rynak, u toj ža čas jaje pryznańnie ź vialikaj vierahodnaściu pryviadzie da razryvu adnosin z 5-miljonnaj Hruzijaj.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
