Niepapularnaść Karła III
Paviedamleńni ab niaviernaści Čarlza padčas šlubu z Dyjanaj zrabili jaho vielmi niepapularnym. Niahledziačy na toje, što jamu ŭdałosia adnavić niekatoryja simpatyi brytanskaj publiki, jon usio jašče značna mienš papularny, čym mnohija inšyja členy karaleŭskaj siamji.
U krasaviku 2022 hoda apytańnie Ipsos pakazała, što amal pałova brytancaŭ ličyć, što Čarlz pavinien byŭ by pieradać karonu svajmu synu, pryncu Uiljamu. Apytańnie YouGov pastaviła Čarlza na siomaje miesca siarod samych papularnych členaŭ karaleŭskaj siamji — paśla jaho maci, niaviestki Kiejt, syna Uiljama, baćki prynca Filipa, siastry pryncesy Hanny i plamieńnicy Zary Tyndał. Jaho papularnaść siarod brytancaŭ jašče mienšaja — tam jon zajmaje 12 miesca.
Jašče adna pahroza — charaktar karala. Manarch maje być niejtralnym, u niečym navat niezaŭvažnym.
Robiert Błekbern, prafiesar kanstytucyjnaha prava ŭ Karaleŭskim kaledžy Łondana, adznačyŭ:
«Karł budzie abaviazany padparadkavać svaje asabistyja pohlady dziaržaŭnym abaviazkam. Bolš za toje, jamu pryjdziecca zadušyć svaje asabistyja pohlady albo vykazvać ich ź vialikaj aściarožnaściu».
Mnohija sumniavajucca, ci zmoža Karł III heta zrabić. A navat kali zmoža, to ci nie zapozna?
Jaho pohlady (časta supiarečlivyja) na nieźličonyja temy — takija jak sučasnaja architektura, sielskaja haspadarka, baraćba ź biednaściu, hłabalnaje paciapleńnie, hamieapatyja i inšyja — zanadta dobra viadomyja brytanskaj publicy. Bolš za toje, u minułym jaho abvinavačvali ŭ sprobach paŭpłyvać na brytanski ŭrad. U 2015 hodzie vyśvietliłasia, što Čarlz atrymaŭ kanfidencyjnyja dakumienty ab sakretnaj dziejnaści ŭrada, pra jakija nie viedała navat bolšaść ministraŭ. Jon taksama zajmaŭsia łabisckaj dziejnaściu ŭ dačynieńni da vysokapastaŭlenych palitykaŭ. Šmat u čym: ad zakupak vajennych viertalotaŭ padčas vajny ŭ Iraku da niezakonnaj łoŭli peŭnych vidaŭ ryby. Tady jaho nazyvali «najlepš prainfarmavanym łabistam Brytanii».
Usio skončycca kanstytucyjnym kryzisam, ličyć Błekbern: «Na tronie źjavicca bolš naporysty čałaviek, čym Lizavieta II. Pahroza taho, što karol nie zachoča padpisvać zakonaprajekt, ź jakim jon asabista nie zhodny, značna ŭzraście».
Premjer biez padtrymki
Kit Žukies, strateh z francuzskaha inviestycyjnaha banka Société Générale, adznačaje, što funt dasiahnuŭ samaj nizkaj adznaki ŭ dačynieńni da dalara za 37 hadoŭ. I naŭrad ci niechta vieryć u źmieny, «pakul nie adbudziecca siejśmičny zruch kirunku ekanomiki i ekanamičnaj palityki» u Brytanii.
Za dva dni da śmierci karalevy premjer-ministram ekanamična asłablenaj krainy z 10% inflacyjaj i pryvidam humanitarnaha kryzisu stała Liz Tras. Jana «padabajecca» tolki 21 pracentu respandentaŭ, paviedamlaje YouGov. I tolki 12 pracentaŭ dumajuć, što jana budzie dobrym abo vydatnym premjer-ministram. Tras nie maje padtrymki navat siarod deputataŭ svajoj partyi. U pieršym tury papiaredniaha hałasavańnia za jaje addali hałasy tolki 50 z 356 členaŭ. Jana pieršy kansiervatar, jaki staŭ premjer-ministram biez padtrymki bolšaj častki svajoj partyi.
Pryvid kryzisu
Adčuvańnie nadychodziačaj katastrofy ŭzmacniajecca. Brytanija tolki na pačatku najhoršaha padzieńnia ŭzroŭniu žyćcia za apošnija niekalki pakaleńniaŭ. Mećju Tejłar, kiraŭnik Nacyjanalnaj kanfiederacyi słužby achovy zdaroŭja, niekalki tydniaŭ tamu vystupiŭ z papiaredžańniem ab «humanitarnym kryzisie»: mnohija brytancy «mohuć sutyknucca z žachlivym vybaram albo prapuskać niekatoryja pryjomy ježy, kab abahreć svaje damy, albo žyć u chałodnych i vielmi niepryjemnych umovach».
Dachody nasielnictva z papraŭkaj na inflacyju i padatki ŭ hetym i nastupnym hodzie rezka źniziacca. Heta budzie samaje vialikaje padzieńnie z 1960-ch hadoŭ, pieradaje Bank Anhlii.
Rachunki za haz i elektryčnaść vyraśli ŭtraja. Apytańni pakazvajuć, što 1,7 miljona čałaviek razhladajuć mahčymaść admovicca ad apłaty rachunkaŭ za elektraenierhiju. Palicyja pa ŭsioj Anhlii pačała prapracoŭvać płany na vypadak nadzvyčajnych situacyj, kab zmahacca z rostam złačynnaści i parušeńniem hramadskaha paradku. U najbližejšyja miesiacy, siarod inšaha, pra svoj namier pačać strajki abviaścili čyhunačniki, miedsiostry, nastaŭniki, dziaržaŭnyja słužačyja, paštaljony, zborščyki śmiećcia i słužačyja miascovaha samakiravańnia.
Tras abviaściła pra płany skaracić brytanskija rachunki za elektraenierhiju z kastryčnika, što dapamoža vytrymać miljonam chatnich haspadarak i tysiačam pradpryjemstvaŭ. Hety vyratavalny pakiet budzie kaštavać 150 miljardaŭ funtaŭ.
Deutsche Bank apublikavaŭ spravazdaču, u jakoj papiaredziŭ, što Vialikabrytaniju čakaje kryzis, charakterny dla krain, ekanomiki jakich znachodziacca na etapie raźvićcia:
«Masavaje pavieličeńnie dziaržaŭnych vydatkaŭ dla procidziejańnia šoku cen na enierhanośbity i rezkaj inflacyi pavialičvaje imaviernaść taho, što Vialikabrytanii budzie ciažka pryciahnuć dastatkovy kapitał dla finansavańnia svajho deficytu».
Finansavyja rynki pakinuć Łondan, i funt budzie padać. Vialikabrytanija stanie niepłaciežazdolnaj, joj daviadziecca prasić dapamohi ŭ Mižnarodnaha valutnaha fondu. Pakul što jość mahčymaść abaranicca ad takoha scenaryja, ale, jak adznačaje Deutsche Bank, ryzyka raście.
https://d2lur0sisdcrej.cloudfront.net/299451