Pachavańni ŭ lesie pad Iziumam
Adna z katoŭniaŭ, pavodle słoŭ Klimienki, była ŭładkavanaja ŭ Bałaklei, u adździaleńni palicyi. Tam u kamierach utrymlivali kala 40 ludziej, aryjencirovačna jany prabyli tam da 48 dzion. Druhuju katoŭniu, jak udakładniŭ kiraŭnik NPU, rasijskija vajskoŭcy ŭładkavali ŭ pamiaškańni haradskoj drukarni.
«Byli katavańni — my bačyli na rukach u ludziej ślady ad elektryčnych aholenych pravadoŭ, pa jakich puskali tok, kali dapytvali. Byli znojdzienyja małatki i pietli. Ciapier my pravodzim śledčyja dziejańni pa ŭstanaŭleńni stupieni paškodžańniaŭ, jakija atrymali ludzi», — zajaviŭ jon.
Klimienka taksama raskazaŭ jašče pra šeść katoŭniaŭ, jakija palicejskija vyjavili ŭ Iziumie. Pavodle jaho słoŭ, užo ŭstanoŭlenyja padraździaleńni armii Rasii, jakija zajmalisia katavańniami: heta AMAP z Taljaci, padraździaleńni Rashvardyi, FSB i vajskoŭcy tak zvanaj «ŁNR».
Kiraŭnik NPU paviedamiŭ, što siarod tych, kaho katavali, vyjavili zamiežnych hramadzian. Imi akazalisia siamiora studentaŭ sa Šry-Łanki, jakija vučylisia ŭ miedycynskim kaledžy.
Kiraŭnik Nacpalicyi taksama prakamientavaŭ situacyju sa znojdzienymi 15 vieraśnia ŭ lasach pad Iziumam masavymi pachavańniami.
«Na siońniašni dzień tam naličvajecca kala 445 pachavańniaŭ. Charaktar cialesnych paškodžańniaŭ, abstaviny i pryčyny śmierci ludziej ustanaŭlivajem. Cieły zabitych ludziej, pachavanych tam z sakavika, treba budzie ekshumavać i identyfikavać. Heta praca na šmat tydniaŭ, ale my daviadziom jaje da kanca i vyznačym, chto hetym zajmaŭsia», — paabiacaŭ Klimienka.
