«Siońnia da maci prychodzili siłaviki. Jana žyvie ŭ Kruleŭščynie Dokšyckaha rajona. Ja ŭ jaje domie prapisany, ale nie žyvu tam z 2008 hoda i nijakich maich rečaŭ tam niama.
Pryjechali piać čałaviek, dvoje ź ich u broniekamizelkach, na tanavanym busie. Paklikali susiedziaŭ u jakaści paniatych. Pakazali niejkuju papieru (vidać, pastanovu na ahlad abo pieratrus), ale maci nie zapomniła, što tam było napisana. Što chacieli — niezrazumieła. Ničoha z chaty nie zabrali. Maci nie zatrymlivali. Nijakich papier nie pakinuli.
Prasili pieradać, kab ja viartaŭsia ŭ Biełaruś — maŭlaŭ, «my ź im prosta pahavorym».
Ź jakoj struktury byli niaprošanyja hości — niezrazumieła», — napisaŭ Kastuś Šytal.
Krajazaviec i žurnalist Šytal hod tamu pakinuŭ Biełaruś. Ën vyjechaŭ paśla taho, jak jaho stali ciahać na dopyty pa kryminalnaj spravie pra dokšyckija łakalnyja čaty.
